ෆීනික්ස් පක්ෂියා මෙන් ශ්‍රී ලංකා නිදහස් පක්ෂය ද නැගී ...?

 ශ්‍රී ලංකා නිදහස් පක්ෂයේ 70 වන සංවත්සරය සැමරෙන මෙම අවස්ථාවේ අපේ පක්ෂයේ අවශ්‍යතාවය මුළු රටටම දැනෙමින් පවතින්නේ යැයි යැයි ශ්‍රීලනිප ජ්‍යෙෂ්ඨ උපසභාපති, එජනිස මහලේකම් පරිසර අමාත්‍ය මහින්ද අමරවීර මහතා පවසයි.

ශ්‍රී ලංකා නිදහස් පක්ෂයේ 70 වන සංවත්සරය නිමිති කර ගනිමින් හෙට දින (02) පැවැත්වෙන සමරු වැඩ සටහන කොවිඩ් 19 වසංගත තත්ත්වය සැළකිල්ලට ගනිමින් පැවැත්වීමට අපි තීරණය කර ඇත්තෙමු. ශ්‍රී ලංකාවේ දේශපාලන පක්ෂ අතර අද්විතීයම පක්ෂය වන්නේ ශ්‍රී ලංකා නිදහස් පක්ෂයයි.

ශ්‍රී ලංකාව පාලනය කළ මහජන ගෞරවාදරයට පත් කීර්තිමත් නායකයින් රැසක් යටතේ වර්ධනය වූ ශ්‍රී ලංකා නිදහස් පක්ෂය ගත වු ඉතිහාසය තුළ වරින් වර ඇද වැටෙමින් මෙන්ම යළි යළිත් නැගී සිටිමින් ද ජනතාව අතර විරාජමානව පවතින එකම දේශපාලන පක්ෂය වේ. දේශපාලනයේ නිරත වන සමහර කළටි පොල් වැනි පැසුනු බව පෙන්වීමට උත්සාහ දරණ දේශපාලකයින් විසින් මෙම ගෞරවණීය පක්ෂයේ කීර්ති නාමයට පහර ගැසීමටත්, උපහාසයට හා අපහාසයට ලක් කිරීමට උත්සාහ ගත්තද, ශ්‍රී ලංකා නිදහස් පක්ෂය යනු ෆීනික්ස් පක්ෂියා වැනි පක්ෂයකි. ගින්නෙහි දමා මරා දමන්නට උත්සාහ කළත්, අවසානයේ තටු ගසා ගිනි අඟුරු මතින් නැගිටින ෆීනික්ස් පක්ෂියා මෙන්ම ශ්‍රී ලංකා නිදහස් පක්ෂය ද නැගී සිටින බව අප පක්ෂයේ ඉතිහාසය ගැන දන්නා කවුරුන් වුවද පිළිගන්නා සත්‍යයකි.

එමනිසාම වර්තමානයේ අපේ රටේ දේශපාලන භාවිතාව තුළ පවතින දේශපාලන පක්ෂ අතර ගෞරවනීයම පක්ෂය ශ්‍රී ලංකා නිදහස් පක්ෂය බව ක්‍රියාවෙන්ම ඔප්පු කර හමාරය. දිවංගත බණ්ඩාරනායක ශ්‍රීමතාණන් විසින් ආරම්භ කරන ලදුව ඉන් අනතුරුව අපගේ ශ්‍රේෂ්ඨ නායිකා දිවංගත සිරිමාවෝ බණ්ඩාරනායක මැතිණිය එදා 70 දශකයේ ගෙන ගිය දේශීය ආර්ථිකය ගොඩ නැංවීමේ වැඩ සටහනෙහි අගය අද අපිට වඩ වඩාත් දැනෙන්නේ අද අපි ණය බරින් පෙළෙමින් විදේශ විනිමය හිඟය නිසා අසරණව සිටින තත්ත්වය තුළය. තමන් සතු පුද්ගලික ධනය හා දේපොළ පවා රටේ ජනතාව වෙනුවෙන් කැප කළ එතුමිය වැනි ලෝක ප්‍රකට දේශපාලන චරිතයක් අපේ සදානුස්මරණීය පක්ෂයෙන් බිහිවීම ගැන අපිට තිබෙන්නේ නිහතමානී ආඩම්බරයකි.

එතුමිය ඇතුළු ශ්‍රී ලංකා නිදහස් පක්ෂය එදා ගෙන ගිය වැඩ පිළිවෙළ අඛණ්ඩව ක්‍රියාත්මක කිරීමට ඉඩ ලැබුනා නම් වර්තමානයේ ආසියාවේ දියුණුම රාජ්‍ය ශ්‍රී ලංකාව බව අපේ පක්ෂය විවේචනය කරන බොහෝ දේශපාලන පුඟුලෝ නොදනිතත් බුද්ධිමත් හැම කෙනෙක්ම අවිවාදිතව පිළිගනිති. නමුත් දැන් සියල්ල සිදු වී හමාරය. නැවතත් මේ සුන්දර රට සංවර්ධනය කරා ගෙන යා හැක්කේ ශ්‍රී ලංකා නිදහස් පක්ෂයට පමණක් බව බොහෝ දෙනෙක් පිළිගෙන අවසානය.