සංචාරක ඔබට මෙන්න සුභ ආරංචියක්...!

අද (05) සිට විශේෂ සංචාරක දුම්රියක් මහනුවර සහ ඇල්ල දුම්රිය ස්ථාන අතර ධාවනය කෙරෙනවා.

ඒ අනුව මහනුවර දුම්රිය ස්ථානයෙන් පෙරවරු 07 ට පිටත් වන දුම්රිය දෙමෝදර දුම්රිය ස්ථානයට පස්වරු 2.20 ට ළඟා වනවා.

එය පේරාදෙනිය, නාවලපිටිය, ඇඩම්ස්පීක්, ග්‍රේට් වෙස්ටර්න්, නානුඔය, එල්ජින් දියඇල්ල, පට්ටිපොල - සමිට් ලෙවල්, ඔහිය, ඉදල්ගස්හින්න සහ ආරුක්කු නවයේ පාලම ඇතුළු ආකර්ෂණීය ස්ථානවල නවත්වන අතර, නැවත දෙමෝදර දුම්රිය ස්ථානයෙන් පස්වරු 3.40 ට මහනුවර බලා පිටත් වනවා.

එය රාත්‍රි 9.35 ට මහනුවරට ළඟාවීමට නියමිතයි.

මෙම දුම්රිය දෙස් විදෙස් සංචාරකයින් ඉලක්ක කර ගනිමින් හඳුන්වා දුන් බවයි දුම්රිය දෙපාර්තමේන්තුව පැවසුවේ.

මේ අතර, මහව - ඕමන්තේ දුම්රිය මාර්ග නවීකරණ ව්‍යාපෘතිය හේතුවෙන් අද සිට තාවකාලිකව වසා දැමීමට තීරණය කර තිබූ අනුරාධපුර සහ වවුනියාව අතර කොටස වසා දමන කාලය වෙනස් කර තිබෙනවා.

ඒ අනුව ව්‍යාපෘතිය ආරම්භ වන්නේ මැයි මස 05 වැනිදා බවයි දුම්රිය ස්ථානාධිපති සංගමය ප්‍රකාශ කළේ.

ජනාධිපතිවරයා විසින් ප්‍රවාහන අමාත්‍යාංශයට ලබාදුන් උපදෙස් මත වැඩපිලිවෙල ක්‍රියාත්මකයි.