පාසල් 28ක දරුවන් 64කට කොරෝනා..කොවිඩ් ආසාදිත දරුවෙක් මිය යයි.

කොවිඩ් ආසාදනය වූ අවුරුද්දයි මාසයක් වයසැති දරුවෙක් ජීවිතක්ෂයට ඉකුත් සති දෙකක කාලය තුළදී ගාල්ල දිස්ත්‍රික්කයේ පාසල් දරුවන් 64 දෙනෙකුට කොවිඩ් වයිරසය ආසාදනය වී ඇති බවට තහවුරු වී ඇතැයි ගාල්ල දිස්ත්‍රික් ප්‍රාදේශීය වසංගත රෝග විද්‍යාඥ වෛද්‍ය එරංග හෙට්ටිආරච්චි පවසයි.

පසුගිය ඔක්තෝබර් 31 වැනිදා සිට නොවැම්බර් 14 වැනි දින දක්වා කාලය තුළදී එම දිස්ත්‍රික්කයේ පාසල් 28ක පාසල් දරුවන් 64 දෙනෙකුට මෙලෙස කොවිඩ් වයිරසය ආසාදනය වී තිබේ.

ඒ අනුව ඉඳුරුව සෞඛ්‍ය වෛද්‍ය නිලධාරී බල ප්‍රදේශයෙන් පාසල් දරුවන් 16 දෙනෙකුට, යක්කලමුල්ල සෞඛ්‍ය වෛද්‍ය නිලධාරී බල ප්‍රදේශයේ 5 දෙනෙකුට ආදි වශයෙන් කොවිඩ් වයිරසය ආසාදනය වී ඇති බවද හෙතෙම පවසයි.

මෙම ආසාදිත දරුවන්, ඔවුන්ගේ පවුල්වල සාමාජිකයන් සමග නිවෙස්වල නිරෝධායනය කිරීමට කටයුතු කර ඇති බවද වෛද්‍යවරයා සඳහන් කළේය.

මේ අතර හල්දුම්මුල්ල කොට්ඨාස අධ්‍යාපන කාර්යාලයට අයත් සොරගුණේ මහා විදුහලේ 10 වැනි ශ්‍රේණියේ ඉගෙනුම ලබන සිසුවකුට කොවිඩ් ආසාදිත බවට තහවුරු වීමත් සමග එම ශ්‍රේණිය ඊයේ (15 වැනිදා) සිට තාවකාලිකව වසා දැමීමට පියවර ගෙන තිබේ.

මේ හේතුවෙන් එම ශ්‍රේණියේ සිසුන් සහ ගුරුවරුන් හල්දුම්මුල්ල සෞඛ්‍ය වෛද්‍ය නිලධාරී කාර්යාලයේදී ඊයේ (15 වැනිදා) දිනයේදී ඇන්ටිජන් පරීක්ෂාවකට ලක් කළ බවද සෞඛ්‍ය අංශ සඳහන් කරයි.

ඊට අමතරව හල්දුම්මුල්ල කොස්ලන්ද මකල්දෙණිය වත්තේ වයස අවුරුදු එකයි මාස එකක් වයසැති කුඩා දරුවකුට කොවිඩ් ආසාදිතව පසුගිය 14 වැනිදා ජීවිතක්ෂයට පත් වූ බව හල්දුම්මුල්ල සෞඛ්‍ය වෛද්‍ය නිලධාරී කාර්යාලය ප්‍රකාශ කළේය.

මෙසේ ජීවිතක්ෂයට පත්ව ඇත්තේ කොස්ලන්ද මකල්දෙණිය වත්තේ පදිංචිව සිටි නගුලේෂ්වරන් පස්වාන් නමැති කුඩා දරුවෙකි.

මෙම දරුවා නිවසේ දී ජීවිතක්ෂයට පත්ව ඇති අතර දියතලාව රෝහලේදී එම මළ සිරුර සම්බන්ධයෙන් කළ පී.සී.ආර්. පරීක්ෂාවේදී කොවිඩ් ආසාදිත බව තහවුරු වී තිබේ.

එච්.එම්. සමන් – අක්මීමන සමන් පාලිත – හල්දුම්මුල්ල