පැරණි බව රැකගෙන නවීන අලංකාරය එක්කළ සංගාගේ නිවස- ගාලු කොටුවේ අපූරු නිර්මාණය ලෝකෙම අවධානය දිනාගනී!

ශ්‍රී ලංකා ක්‍රිකට් කණ්ඩායමේ හිටපු නායක කුමාර් සංගක්කාර සහ ඔහුගේ බිරිඳ යෙහාලි සතු ගාල්ලේ පවුලේ නිවස, ඕස්ට්‍රේලියානු ABC නාලිකාවේ විකාශය වන Culture by Design වැඩසටහනේ දෙවන වාරයේදී ප්‍රදර්ශනය කර තිබේ.

යුනෙස්කෝ ලෝක උරුමයක් ලෙස නම් කර ඇති ගාලු කොටුව තුළ පිහිටි වසර 120ක් පමණ පැරණි ලන්දේසි යටත් විජිත විලා නිවස ප්‍රතිසංස්කරණය කිරීමේ කටයුතු සංගක්කාර යුවළ විසින් සිදුකර තිබේ.

මෙම නිවසේ පැරණි උරුමය ආරක්ෂා කර ගනිමින් නවීන ජීවන රටාවට ගැළපෙන පහසුකම් එක් කළ ආකාරය වැඩසටහනේදී විශේෂයෙන් අවධානයට ලක් කර ඇත

 වසර හයකට ආසන්න කාලයක් පුරා සිදුකළ ප්‍රතිසංස්කරණ ව්‍යාපෘතිය ගෘහ නිර්මාණ ශිල්පීන් වන ජීවන් ඩි'සූසා සහ මුරාඩ් ඉස්මයිල්ගේ මඟපෙන්වීම යටතේ සිදුකර ඇති අතර, නිර්මාණකරු අනිකා ප්‍රනාන්දුද ඊට සිය නිර්මාණාත්මක දායකත්වය ලබාදී තිබේ.

නන්දා මාලිනියන්ට අවසන් ගෞරව දක්වන්න ආ හේමාල් රණසිංහ- කලා ලෝකයම සංවේදී වෙයි

පැරණි ගෘහ නිර්මාණ ශෛලියේ අනන්‍යතාව ආරක්ෂා කරමින් නවීන සුවපහසුව සහ අලංකාරය එක් කිරීම මෙම ව්‍යාපෘතියේ ප්‍රධාන අරමුණක් වී ඇත. ඒ අනුව, ගාලු කොටුවේ ඓතිහාසික හා සංස්කෘතික වටිනාකමට ගැළපෙන අයුරින් නිවස ප්‍රතිසංස්කරණය කර තිබේ.

විශේෂයෙන්ම ශ්‍රී ලංකාවේ ප්‍රකට උරුම ප්‍රදේශයක යටත් විජිත ගෘහ නිර්මාණ ශිල්පයක් නවීකරණය කිරීමේදී උරුම සංරක්ෂණය සහ සමකාලීන ජීවන අවශ්‍යතා අතර සමතුලිතතාව පවත්වා ගැනීමේ අභියෝගයද මෙම ව්‍යාපෘතිය මගින් පෙන්වා දෙයි.

Culture by Design වැඩසටහනේ දෙවන වාරය අගෝස්තු 23 වන දින ABC ඕස්ට්‍රේලියාවේ විකාශය ආරම්භ කර ඇති අතර, සංගක්කාර යුවළගේ ගාල්ලේ නිවස ඉතිහාසය සහ නූතන නිර්මාණකරණය එකට එක්වන සුවිශේෂී උරුම නිවසක් ලෙස එහිදී ඉදිරිපත් කර තිබේ.