පළාත් පාලන ඡන්දයට ඡන්ද මධ්‍යස්ථාන සකස්කිරීම ඇරඹෙයි
Shehan
පළාත් පාලන ආයතන ඡන්ද විමසීමට අදාළව ඡන්ද මධ්‍යස්ථාන සැකසීමේ කටයුතු අද (මැයි 05) පෙරවරුවේ ආරම්භ කරන බව මැතිවරණ කොමිසන් සභාව පවසයි.
මෙවර ඡන්ද විමසීම හෙට (06) පෙරවරු 7.00ට ආරම්භ වන අතර, දිවයින පුරා ඡන්ද මධ්‍යස්ථාන 13,759කදී පස්වරු 4.00 දක්වා පැවැත්වේ.
පළාත් පාලන ආයතන 339ක් සඳහා පැවැත්වෙන මෙම ඡන්ද විමසීමට ඡන්දහිමියන් එක්කෝටි හැත්තෑඑක් ලක්ෂ 56,338ක් සුදුසුකම් ලබා ඇත.
මැතිවරණ කටයුතු සඳහා සියලු සූදානම් කිරීම් අවසන් කර ඇති අතර, රාජකාරී සඳහා යෙදවෙන රාජ්‍ය නිලධාරීන් අනිවාර්යයෙන් සහභාගී විය යුතු බව මැතිවරණ කොමිසමේ සභාපති ආර්. එම්. ඒ. එල්. රත්නායක මහතා පැවසීය.
නිල ඡන්ද පත්‍රිකා තවමත් නොලැබුණු ඡන්දදායකයින්ට අද සහ හෙට යන දිනවල තම තැපැල් කාර්යාලයෙන් එය ලබාගත හැකි බවද රත්නායක මහතා සඳහන් කළේය.
ඡන්ද විමසීමේ ආරක්ෂාව සඳහා පොලිස් නිලධාරීන් 65,000කට වැඩි පිරිසක් යොදවා ඇති බව පොලිස් මාධ්‍ය ප්‍රකාශක ජ්‍යෙෂ්ඨ පොලිස් අධිකාරී බුද්ධික මනතුංග මහතා පැවසීය.
ඡන්ද කටයුතු නිරීක්ෂණයට නිලධාරීන් 3,000කට ආසන්න පිරිසක් යොදවා ඇති බව පැෆ්රල් සංවිධානයේ විධායක අධ්‍යක්ෂ රෝහණ හෙට්ටිආරච්චි මහතා සඳහන් කළේය.
ඡන්ද විමසීම හේතුවෙන් අද සහ හෙට යන දිනවල දිවයිනේ සියලුම පාසල්වලට නිවාඩු ලබාදී ඇති අතර, මැයි 7 වැනිදා පාසල් යළි ආරම්භ වන බව අධ්‍යාපන අමාත්‍යාංශය පවසයි.
විශ්වවිද්‍යාල සිසුන්ට අද සිට මැයි 7 දක්වා නිවාඩු ලබාදී ඇති නමුත්, අධ්‍යයන හා අනධ්‍යයන කාර්ය මණ්ඩලවලට මෙම නිවාඩු අදාළ නොවන බව විශ්වවිද්‍යාල ප්‍රතිපාදන කොමිෂන් සභාව පැවසීය.
බස්නාහිර පළාතේ ආදායම් බලපත්‍ර නිකුත් කිරීමේ කවුළු අද සහ හෙට වසා තබන බව බස්නාහිර පළාත් ප්‍රධාන ලේකම් කාර්යාලය දැනුම් දෙයි.
වාහන ආදායම් බලපත්‍රවල වලංගු කාලය මෙම දිනවලදී අවසන් වන්නේ නම්, දඩ ගෙවීමකින් තොරව පළමු රාජකාරී දිනයේදී බලපත්‍රය ලබාගත හැකි බව එම කාර්යාලය සඳහන් කළේය.
නාරහේන්පිට මෝටර් රථ ප්‍රවාහන දෙපාර්තමේන්තුවේ ප්‍රධාන කාර්යාලය ද අද සහ හෙට වසා තබනු ඇත, මන්ද එය ඡන්ද මධ්‍යස්ථානයක් ලෙස යොදාගන්නා බැවිනි.
