"අපේ තාත්තාට බැණ බැණ හයිවේ යන වත්මන් ජනාධිපති" - නාමල්ට ඒක දැක්කම හිනත් යනවලු!
Shehan
"මම දැක්ක ජනපති අනුර කුමාර දිසානායක අපේ තාත්තාට බැණ බැණ හයිවේ එක දිගේ යනවා; ඒක දැක්කම හිනත් යනවා," යැයි පාර්ලිමේන්තු මන්ත්‍රි නාමල් රාජපක්ෂ පැවසීය.
මන්ත්‍රිවරයා මේ බව ප්‍රකාශ කළේ ඉදිරි පළාත් පාලන මැතිවරණයට කළුතර දිස්ත්‍රික්කය නියෝජනය කරමින් ශ්‍රී ලංකා පොදුජන පෙරමුණෙන් තරග කරන අපේක්ෂකයන්ගේ රැස්වීමක් අමතමින්ය.
"වත්මන් ජනපති අනුර කුමාර කියනවා මාස හයකින් ඔවුන් හැම දෙයක්ම කළා කියලා. එතුමා අපේ තාත්තාට බැණ බැණ හයිවේ එක දිගේ යනවා. නමුත් අපි එහෙම දේශපාලනයක් කරන්නේ නැහැ. ඉතිහාසයේ වැඩිපුරම වැඩ කළ ප්‍රාදේශීය සභා සහ පළාත් සභා යාන්ත්‍රණය බිහි වුණේ මහින්ද රාජපක්ෂ යුගයේදී. අපිට බලය ගන්න බොරු කතා කියන්න අවශ්‍ය නැහැ. චරිත ඝාතනය කරන්නත් ඕන නැහැ.
එක් එක් අපේක්ෂකයන්ගේ පෞද්ගලික ජීවිත ගැන අපිට සම්බන්ධයක් නැහැ. ඔවුන්ගේ දරුවන් අඳින හැටි, පළඳින හැටි ගැන අපිට වැඩක් නැහැ. අපි පක්ෂයක් හැටියට එකිනෙකාට ගරු කරනවා. අපි ප්‍රතිපත්ති එක්ක ගමට යමු. අපි කරපු වැඩ සහ ඉදිරියට කරන්න තියෙන වැඩ ගැන විතරක් කතා කරමු. අපිට වැඩ කරන්න ආණ්ඩුවක් තිබීම අවශ්‍ය නැහැ. අපි කෙඳිරි ගාන්නේ නැහැ 'ජනපති අපේ නෙවෙයි, අගමැති අපේ නෙවෙයි, පාර්ලිමේන්තුව අපේ නෙවෙයි' කියලා. දැන් ඉන්න ආණ්ඩුව කෙඳිරි ගානවා ප්‍රාදේශීය සභා තමන්ගේ නෙවෙයි, ඒ නිසා වැඩ කරන්න බැහැ කියලා. අපි කෙඳිරි ගාලා හිටියේ නැහැ.
අපි වමේ ව්‍යාපාරයේ වැඩ කළ කණ්ඩායමක්. 2018 ප්‍රාදේශීය සභා මැතිවරණය ඔබ සියල්ලෝම ජයග්‍රහණය කළ වෙලාවේ පාර්ලිමේන්තුව තිබුණේ නැහැ. මන්ත්‍රිවරු 34ක් හෝ 35ක් විතරයි පාර්ලිමේන්තුවේ හිටියේ. එදා වත්මන් ජනාධිපතිවරයා රනිල් වික්‍රමසිංහ එක්ක තිබුණ සම්බන්ධතා මත විපක්ෂයේ ප්‍රධාන සංවිධායක බවට පත්වුණා. පසුව ආණ්ඩුවේ සම්බන්ධතා මත විපක්ෂ නායක තනතුරු බෙදා ගත්තා. ඒත් අපි ප්‍රාදේශීය සභාව ජයග්‍රහණය කළා. 'ආණ්ඩුව අපේ නෙවෙයි, විපක්ෂය අපේ නෙවෙයි, ප්‍රාදේශීය සභාව අපේ නෙවෙයි' කියලා අපි කෙඳිරි ගෑවේ නැහැ. අපි වැඩ කළා. ඒ නිසා අපි විපක්ෂයේ හිටියත්, ආණ්ඩුවේ හිටියත්, වැඩ කරන ක්‍රමය අපි දන්නවා.
අද ආණ්ඩුවේ ප්‍රකාශවලින් පැහැදිලිව පේනවා ප්‍රතිපත්ති ප්‍රකාශනයේ තියෙන හැම දෙයක්ම කරන්න ඕන නැහැ කියලා. එහෙම නම් ඒවා ලියලා මොකටද? ආණ්ඩුවේ ඇමතිවරුත් කියනවා ප්‍රතිපත්ති ප්‍රකාශනයේ තියෙන හැම දෙයක්ම කරන්න ඕන නැහැ කියලා. එහෙනම් ඇයි පිටු ගණන් ලියලා, වියදම් කරලා, ගෙවල්වලට බෙදුවේ? දැන් ආණ්ඩුවට වැඩ කරන්න බැරි වුණාම මොකද කරන්නේ? යන්නේ මර්දනය දිහාවට. දක්ෂ රාජ්‍ය නිලධාරීන් පැත්තකට කරලා තියෙන්නේ. අපි ජනපතිගෙන් ඉල්ලනවා ඒ අයගෙන් වැඩක් ගන්න. ඒ අය පුල් එකේ තියලා වැඩක් නැහැ.
පොලිසිය සම්පූර්ණයෙන්ම දේශපාලනීකරණය කරලා. තමන්ගේ වේදිකාවේ හිටපු අයව නිලධාරීන් බවට පත් කරනවා. දේශපාලන උවමනාවන් මත පොලිස් නිලධාරීන් මාරු කරනවා. පොලිසියේ යාන්ත්‍රණය එක රැයකින් වෙනස් කරනවා. අද පොලිස් මාධ්‍ය ප්‍රකාශකයාගේ කතාවයි ජනපතිගේ කතාවයි අතර වෙනසක් පේන්න නැහැ. දෙන්නම කතා කරන්නේ හොරු අල්ලන එක ගැන. ජනපතිත් එහෙමයි. දෙන්නම කෙඳිරි ගානවා.
පොලිස්පති අත්අඩංගුවට ගන්නකල් උසාවියට ගිහින් ප්‍රශ්නයක් ඇති කරගත්ත නංගිව හෙව්වා. පොලිස්පති භාර වුණාට පස්සේ ඒ නංගිවත් දැන් අමතකයි. මේ ආණ්ඩුවේ වැඩ එහෙමයි. එකක් යට ගහන්න තව එකක් ගේනවා. තමන්ගේ නොහැකියාව හංගන්න විවිධ විහිළු කරනවා."
