ඔබේ දිස්ත්‍රික්කය නියෝජනය කරන්න තරුණ ඔබටත් චාන්ස් එකක්- මානව හිමිකම් හා සමාජ වගකීම් තරුණ කඳවුරට අයදුම්පත් විවෘතයි

ශ්‍රී ලංකා මානව හිමිකම් කොමිෂන් සභාව (HRCSL) විසින් සංවිධානය කරන මානව හිමිකම් සහ සමාජ වගකීම් පිළිබඳ තේමාත්මක තරුණ කඳවුර සඳහා අයදුම්පත් මේ වන විට විවෘත කර තිබේ.

කඳවුර 2026 ඔක්තෝබර් 26 සිට 31 දක්වා දින හයක නේවාසික වැඩසටහනක් ලෙස පැවැත්වීමට නියමිතය. ශ්‍රී ලංකාවේ දිස්ත්‍රික්ක 25 නියෝජනය කරමින් වයස අවුරුදු 18ත් 29ත් අතර තරුණ නායකයින් 55 දෙනෙකු මෙම වැඩසටහන සඳහා තෝරා ගැනීමට නියමිතය.

සමකාලීන මානව හිමිකම් අභියෝගවලට මුහුණදීමට අවශ්‍ය දැනුම, කුසලතා සහ වටිනාකම් තරුණ පරපුර වෙත ලබාදීම මෙන්ම ක්‍රියාශීලී හා වගකිවයුතු පුරවැසිභාවය ප්‍රවර්ධනය කිරීම මෙම කඳවුරේ ප්‍රධාන අරමුණු වේ.

කඳවුර තුළ අන්තර්ක්‍රියාකාරී ඉගෙනුම් සැසි, නායකත්ව සංවර්ධන වැඩසටහන්, කණ්ඩායම් සාකච්ඡා, සමාකරණ, ප්‍රායෝගික අභ්‍යාස, ප්‍රජා ක්‍රියාකාරකම් සැලසුම් කිරීම සහ කණ්ඩායම් ගොඩනැගීමේ ක්‍රියාකාරකම් පැවැත්වීමට නියමිතය.

රත්මලාන කළඹපු කඳවල හන්දියේ වෙඩි තැබීමේ ඝාතනයට සම්බන්ධ සැකකරුවන් දෙදෙනෙක් කොටු

මානව හිමිකම්, අඛණ්ඩතාව, වගවීම, සමානාත්මතාව, වෙනස්කම් නොකිරීම, විවිධත්වය, ප්‍රජාතන්ත්‍රවාදී සහභාගීත්වය සහ සමාජ වගකීම යන කරුණු කඳවුරේ ප්‍රධාන අවධානයට ලක්වන ක්ෂේත්‍ර වේ.

මීට අමතරව, මත්ද්‍රව්‍ය භාවිතය, දූෂණය, සයිබර් අපරාධ, වැරදි තොරතුරු, වෛරී ප්‍රකාශ, ප්‍රචණ්ඩත්වය, වෙනස්කම් කිරීම, පාරිසරික හායනය සහ මානසික සෞඛ්‍ය ගැටලු වැනි තරුණයින් මුහුණ දෙන නැගී එන අභියෝග පිළිබඳවද අවධානය යොමු කෙරේ.

අයදුම්කරුවන් වයස අවුරුදු 18ත් 29ත් අතර විය යුතු අතර සිංහල, දෙමළ හෝ ඉංග්‍රීසි යන භාෂාවලින් අවම වශයෙන් එක් භාෂාවකින් සන්නිවේදනය කිරීමේ හැකියාව තිබිය යුතුය.

කඳවුරේ සියලුම ක්‍රියාකාරකම් සඳහා පූර්ණ වශයෙන් සහභාගී වීමටද ඔවුන් කැපවී සිටිය යුතුය. මානව හිමිකම්, නායකත්වය, ඇතුළත්කිරීම සහ විවිධත්වය පිළිබඳ උනන්දුවක් දැක්වීම මෙන්ම කඳවුරෙන් අනතුරුව ප්‍රජා මට්ටමින් මානව හිමිකම් මුලපිරීම් ක්‍රියාත්මක කිරීමට ඇති සූදානමද තෝරාගැනීමේදී සලකා බැලේ.

තරුණ කණ්ඩායමක්, සංවිධානයක්, ආයතනයක් හෝ ජාලයක් සමඟ සම්බන්ධතාවක් තිබීමද අවශ්‍ය වේ. විවිධත්වය සහ සියලු දෙනාගේ සහභාගීත්වය සහතික කිරීම සඳහා සෑම දිස්ත්‍රික්කයකින්ම සහභාගිවන්නන් දෙදෙනෙකු තෝරා ගැනීමට නියමිත අතර, ආබාධ සහිත පුද්ගලයින් ඇතුළු ආන්තික කණ්ඩායම් නියෝජනය කරන තවත් අපේක්ෂකයින් පස් දෙනෙකුද තෝරා ගැනීමට නියමිතය.

HRCSL විසින් සහභාගිවන්නන් සඳහා නේවාසික පහසුකම් සපයනු ලබන අතර, කොමිෂන් සභාවේ ක්‍රියාපටිපාටිවලට අනුව සුදුසුකම් ලබන ප්‍රවාහන වියදම් ප්‍රතිපූරණය කිරීමටද කටයුතු කරනු ඇත. ප්‍රවාහන වියදම් ප්‍රතිපූරණය ලබා ගැනීම සඳහා වැඩසටහන පුරා අනිවාර්ය සහභාගීත්වය අවශ්‍ය වේ.

අයදුම්කරුවන් සිය අයදුම්පත් 2026 අගෝස්තු 31 දිනට පෙර hrcsl.youthcamp@gmail.com වෙත යොමු කළ යුතුය. වැඩිදුර තොරතුරු සඳහා HRCSL අධ්‍යාපන හා විශේෂ වැඩසටහන් අංශය 011-2505569 ඔස්සේ සම්බන්ධ කරගත හැකිය.