කොළඹින් ඉඩමක් ගන්න හීන මැව්වද? එහෙනම් මේක ඔබට ගොඩක් වැදගත් වෙයි.

2023 මුල් කාලයේදී කොළඹ දිස්ත්‍රික්කයේ ඉඩම් වටිනාකම 15%කින් ඉහළ ගොස් තිබෙනවා.

ඒ, අනුව ශ්‍රී ලංකාවේ කොළඹ දිස්ත්‍රික්කය තුළ ඉඩම් වටිනාකම් පෙර වසරට සාපේක්ෂව 2023 මුල් භාගයේ දී සියයට 15 ක කැපී පෙනෙන වර්ධනයක් අත්කර ගෙන ඇති බවයි මහ බැංකුව විසින් සම්පාදනය කරන ලද දර්ශකයක් මගින් පෙන්වා දෙන්නේ.

නේවාසික ඉඩම්වල වටිනාකම සියයට 17.2 කින් ඉහළ ගොස් ඇති අතර වාණිජ ඉඩම් සියයට 15.1 කින් සහ කාර්මික ඉඩම් සියයට 13.5 කින් ඉහළ ගොස් තිබෙනවා.

අර්ධ වාර්ෂික කාල රාමුවක් සලකා බැලීමේදී, දර්ශකය සියයට 4.9ක වැඩිවීමක් නිරීක්ෂණය කිරීමේ හැකියාවක් පවතිනවා.

LVI දර්ශකය 2017 වර්ෂයේ සිට කොළඹ දිස්ත්‍රික්කය තුළ පිහිටා ඇති ප්‍රාදේශීය ලේකම් කොට්ඨාස 13 ක පරාසයක් ආවරණය කරන අතර එය උප දර්ශක තුනකින් ව්‍යුත්පන්න කර තිබෙනවා.

එමෙන්ම එක් එක් ප්‍රාදේශීය ලේකම් කොට්ඨාසය තුළ නේවාසික, වාණිජ සහ කාර්මික ඉඩම් සඳහා වෙන වෙනම ගණනය කර ඇති අතර මෙම දර්ශක ගණනය කරනු ලබන්නේ අදාළ ප්‍රදේශයේ පර්චසයක හිස් ඉඩමක සාමාන්‍ය මිල භාවිතා කරමින්.