ලෝක ක්‍රිකට් පිටිය හොල්ලපු ශ්‍රී ලංකාවේ අසහාය ශ්‍රේෂ්ඨයාගේ උපන්දිනය - කුමාර් සංගක්කාරට සුබ උපන්දිනයක්

ශ්‍රී ලංකාවෙන් බිහි වූ ලෝක පූජිත ක්‍රීඩක‍යෙක් ලෙසට කුමාර් සංගක්කාර අති විහිෂ්ඨ ක්‍රීඩකයා හැදිවින්විය හැකිය .

ක්‍රිකට් ඉතිහාසය තුළ නොමැකෙන නාමයක් සනිටුවන් කළ ඔහුගේ උපන්දිනය අදයි

ඔහු ගැන බිදක් මෙලෙස දක්වන්නට  පුළුවන්

කුමාර් සංගක්කාර යනු ශ්‍රී ලංකාවෙන් බිහි වූ විශිෂ්ටතම ක්‍රිකට් ක්‍රීඩකයන් අතර ඉදිරියෙන්ම සිටින හිටපු ජාතික ක්‍රිකට් නායකයෙකි. වමත් පිතිකරුවකු ලෙස ජාත්‍යන්තර ක්‍රිකට් පිටියේ අතිවිශිෂ්ට දස්කම් දැක්වූ ඔහු, කඩුලු රකින්නකු ලෙස ද සිය ක්‍රීඩා දිවිය ආරම්භ කළේය.

පසුව ටෙස්ට් ක්‍රිකට් තරගවලදී කඩුලු රැකීමෙන් ඉවත් වී පිතිකරණය කෙරෙහි වැඩි අවධානයක් යොමු කිරීමත් සමඟ ඔහුගේ පිතිකරණ දක්ෂතා තවදුරටත් වර්ධනය විය. සංගක්කාර සිය ජාත්‍යන්තර ක්‍රිකට් දිවිය තුළ ටෙස්ට් පිතිකරුවන්ගේ ශ්‍රේණිගත කිරීම්වල ලොව අංක එකේ ස්ථානයට ද පත්විය.

තාක්ෂණික දක්ෂතාව, ඉවසීම, ක්‍රීඩාව පිළිබඳ අවබෝධය සහ පීඩනය යටතේ දස්කම් දැක්වීමේ හැකියාව ඔහු සතු සුවිශේෂී ලක්ෂණ විය. ටෙස්ට් ක්‍රිකට් ඉතිහාසයේ වැඩිම ද්විත්ව ශතක සංඛ්‍යාවක් වාර්තා කළ පිතිකරුවන් අතර ද සංගක්කාරට සුවිශේෂී ස්ථානයක් හිමි වේ.

ශ්‍රීමත් ඩොනල්ඩ් බ්‍රැඩ්මන් ද්විත්ව ශතක 12ක් රැස් කර ඇති අතර, සංගක්කාර සිය ටෙස්ට් ක්‍රිකට් දිවිය තුළ ද්විත්ව ශතක 11ක් වාර්තා කළේය. ඔහු සිය 11 වැනි ටෙස්ට් ද්විත්ව ශතකය 2015 ජනවාරි 4 වැනිදා නවසීලන්තයේ වෙලින්ටන්හිදී නවසීලන්තයට එරෙහිව රැස් කළේය.

''පාකිස්තානයේ අපරාජීත ජය රැල්ල නවත්වන්න ශ්‍රී ලංකාවට හැකි වෙයිද?'' - තුන්කොන් සටන ලාහෝර්හිදී ගඩාෆි ක්‍රීඩාංගණයේදී

2015 ලෝක කුසලාන ක්‍රිකට් තරගාවලියේදී පිට පිට තරග හතරකදී ශතක හතරක් වාර්තා කිරීම සංගක්කාරගේ ක්‍රිකට් දිවියේ අමතක නොවන සන්ධිස්ථානයකි. එම දස්කම එක්දින ජාත්‍යන්තර ක්‍රිකට් ඉතිහාසයේ සුවිශේෂී වාර්තාවක් බවට පත්විය. 2011 ලෝක කුසලාන අවසන් මහා තරගයේදී ඉන්දියාව හමුවේ ශ්‍රී ලංකාව පරාජයට පත්වීමෙන් අනතුරුව සංගක්කාර ජාතික කණ්ඩායමේ නායකත්වයෙන් ඉවත් විය. එහෙත් ඔහුගේ පිතිකරණ දස්කම් සහ කණ්ඩායමට ලබාදුන් දායකත්වය නිසා ඔහු ශ්‍රී ලංකා ක්‍රිකට් ක්‍රීඩාවේ අමතක නොවන චරිතයක් බවට පත්විය.

මුල් කාලය සහ පාසල් දිවිය ගැන සොයා බැලීමේදී කුමාර් සංගක්කාර 1977 ඔක්තෝබර් 27 වැනිදා මාතලේදී උපත ලැබීය. ඔහු සිය මූලික හා ද්විතීයික අධ්‍යාපනය ලැබුවේ මහනුවර පිහිටි කීර්තිමත් පාසලක් වන ත්‍රිත්ව විද්‍යාලයෙනි. ක්‍රිකට් ක්‍රීඩාවට දිගු ඉතිහාසයක් හිමි මෙම පාසල, ශ්‍රී ලංකාවට දක්ෂ ක්‍රිකට් ක්‍රීඩකයන් රැසක් දායාද කළ අධ්‍යාපන ආයතනයකි. පාසල් සමයේදී අධ්‍යාපනයට මෙන්ම ක්‍රීඩාවට ද එකසේ දක්ෂතා දැක්වූ සංගක්කාර, ක්‍රිකට් සහ ටෙනිස් යන ක්‍රීඩා දෙකෙහිම කැපී පෙනුණේය.

ඔහුගේ අධ්‍යාපනික හා නායකත්ව හැකියාවන් ද ඇගයීමට ලක් වූ අතර, පාසලේ වසරේ විශිෂ්ටතම ශිෂ්‍යයාට පිරිනමන The Ryde Gold Medal සම්මානයෙන් ද පිදුම් ලැබීය

1996 වසරේදී ත්‍රිත්ව විද්‍යාලයේ ප්‍රධාන ශිෂ්‍ය නායක ධුරයට පත්වීම ඔහුගේ පාසල් දිවියේ තවත් වැදගත් සන්ධිස්ථානයක් විය.

ක්‍රීඩා ක්ෂේත්‍රයේ ඔහු දැක්වූ දක්ෂතා හඳුනාගත් එවකට විදුහල්පති ලෙනාඩ් ද අල්විස් මහතා, සංගක්කාරගේ ක්‍රිකට් අනාගතය වෙනුවෙන් වැඩි අවධානයක් යොමු කරන ලෙස ඔහුගේ මවගෙන් ඉල්ලා සිටි බව ද සඳහන් වේ. පාසල් වියේ සිටම විනය, කැපවීම සහ නායකත්ව ගුණාංග ප්‍රදර්ශනය කළ සංගක්කාර, පසුව ශ්‍රී ලංකා ජාතික ක්‍රිකට් කණ්ඩායමේ ප්‍රමුඛතම පිතිකරුවකු සහ නායකයකු බවට පත්විය.

ලෝක ක්‍රිකට් පිටියේ සුවිශේෂී සලකුණක් කුමාර් සංගක්කාරගේ ක්‍රිකට් දිවිය වාර්තා රැසකින් සහ සුවිශේෂී ජයග්‍රහණවලින් සමන්විත වේ. ටෙස්ට් සහ එක්දින ජාත්‍යන්තර ක්‍රිකට් තරගවලදී ඔහු දැක්වූ දස්කම් ශ්‍රී ලංකාවට ජාත්‍යන්තර කීර්තියක් ගෙන දුන්නේය.

විශේෂයෙන්ම 2015 ලෝක කුසලාන තරගාවලියේදී පිට පිට ශතක හතරක් රැස් කිරීමෙන් ඔහු සිය නම ලෝක ක්‍රිකට් ඉතිහාසයේ සදාකාලිකව සටහන් කළේය. පිතිකරුවකු ලෙස ඔහු සතු ස්ථාවරත්වය, තරගය කියවීමේ හැකියාව සහ දිගු ඉනිම් ක්‍රීඩා කිරීමේ දක්ෂතාව නව පරපුරේ ක්‍රීඩකයන්ට ද ආදර්ශයකි.

ක්‍රීඩා පිටියෙන් ඔබ්බට ද ක්‍රිකට් ක්‍රීඩාවේ වටිනාකම් ප්‍රවර්ධනය කළ සංගක්කාර, ශ්‍රී ලංකාවේ ක්‍රීඩා ඉතිහාසයේ ගෞරවනීය නාමයක් ලෙස අදටත් සැලකේ.

ඔහුගේ ක්‍රීඩා දිවිය දක්ෂතාව, කැපවීම සහ අඛණ්ඩ උත්සාහය තුළින් ජාත්‍යන්තර සාර්ථකත්වය ළඟා කරගත හැකි ආකාරය පෙන්වා දෙන කදිම නිදසුනකි.

කෙසේ වෙතත් මෙලෙස ලෝකයම ක්‍රිකට් වලින් හොල්ලපු ඒ අපූරු ක්‍රීඩකයාගේ උපන්දිනය අදයි

සුබ උපන්දිනයක් විශිෂ්ඨයානෙණි.....