මීගමුව රෝහලේදී තරුණියකට වෛද්‍යවරයෙකු විසින් ලිංගික හිංසනයක්!
Shehan
මීගමුව දිස්ත්‍රික් මහ රෝහලේ බාහිර රෝගී අංශයට ප්‍රතිකාර සඳහා පැමිණි තරුණියකට එහි වෛද්‍යවරයෙකු විසින් ලිංගික හිංසනයක් සිදු කළ බවට පැමිණිල්ලක් ලැබී ඇත.
වින්දිත තරුණිය ප්‍රතිකාර ලබා ගැනීමට ගිය අවස්ථාවේදී අදාළ වෛද්‍යවරයා විසින් හිංසනයක් කළ බව එම පැමිණිල්ලේ වැඩිදුරටත් සඳහන් වෙනවා.
මේ සම්බන්ධයෙන් විමසීමක් කළ විට, රජයේ වෛද්‍ය නිලධාරීන්ගේ සංගමයේ මාධ්‍ය ප්‍රකාශක වෛද්‍ය චමිල් විජේසිංහ මහතා පැවසුවේ, චෝදනා එල්ල වී ඇති වෛද්‍යවරයා එම සංගමයෙන් නෙරපා හරින ලද සාමාජිකයෙකු බවයි.
ඔහු වැඩිදුරටත් පවසා සිටියේ, මෙම සිදුවීම සම්බන්ධයෙන් අපක්ෂපාතී පරීක්ෂණයක් පවත්වා, වහාම නීතිය ක්‍රියාත්මක කර වැරදිකරුවන්ට එරෙහිව දැඩි පියවර ගත යුතු බවයි.
"මේ ගැන මීගමුව රෝහලෙන් වාර්තාවක් ඉල්ලුවා. එහිදී තහවුරු වුණා අදාළ වෛද්‍යවරයා මීට කලින්නුත් රජයේ වෛද්‍ය නිලධාරීන්ගේ ව්‍යවස්ථාව උල්ලංඝනය කළ කෙනෙක් බව. ඔහු 2021 දී විනය විරෝධී හැසිරීම් නිසා සංගමයෙන් නෙරපා හරින ලද අයෙක්. මේ සිද්ධිය අපිට සුළු කාරණයක් නෙවෙයි. ඒ නිසා සාධාරණ හා අපක්ෂපාතී පරීක්ෂණයක් අවශ්‍යයි. රජයේ වෛද්‍ය නිලධාරීන්ගේ සංගමය කිසිසේත්ම වැරදිකරුවන් ආරක්ෂා කිරීමට සූදානම් නැහැ. පරීක්ෂණයට පූර්ණ සහයෝගය ලබාදෙන්න අපි සූදානම්," යනුවෙන් ඔහු සඳහන් කළා.
