කාංචන ගෙනා යෝජනාව ජනක ප්‍රතික්ෂේප කරයි - විදුලි බිල අඩු කිරිමට කුමක් වෙයිද?.

ජූලි මස 01 දා සිට ක්‍රියාත්මක වන පරිදි සියයට තුනක විදුලි ගාස්තු අඩුකිරීමක් සඳහා විදුලිබල මණ්ඩලය ඉදිරිපත් කළ යෝජනාව පිළිගත නොහැකි බව මහජන උපයෝගිතා කොමිසම සඳහන් කළේ ය.

කොළඹ ඊයේ (18) පැවති මාධ්‍ය හමුවකට එක්වෙමින් මේ බව එහි සභාපති ජනක රත්නායක කියා සිටියේ ය.

මේ අතර, ජුලි මස 01 වනදා සිට ක්‍රියාත්මක කිරීමට නියමිත විදුලි ගාස්තු සංශෝධනය සම්බන්ධයෙන් විදුලිබල මණ්ඩලය සකස් කළ විදුලි ගාස්තු යෝජනාව (15) වෙනිදා පස්වරුවේ මහජන උපයෝගිතා කොමිසම වෙත භාර දෙනු ලැබුවේ ය.

ඒ අනුව සියයට 3 ක ප්‍රතිශතයකින් විදුලි ගාස්තු අඩු කිරීමට යෝජනා කර තිබෙනවා.

විදුලි ජනන දත්ත සහ විකුණුම් දත්ත, ඉන්ධන, ගල් අඟුරු සහ අනෙකුත් අමුද්‍රව්‍ය මිල ගණන් මෙන්ම මෙම වසරේ විදුලි ජනන සැළසුම හා අවශ්‍යතාව සැළකිල්ලට ගනිමින් එම යෝජනාව සකස් කර ඇති බව විෂය භාර අමාත්‍ය කංචන විජේසේකර සඳහන් කළේ ය.

ඒ ට්විටර් පණිවුඩයක් නිකුත් කරමින් ය.විදුලි නිෂ්පාදනය සඳහා දැරීමට සිදුවන වියදම් මේ වනවිට පහත වැටී ඇති අතර ඩීසල්, පෙට්‍රල්, ගල් අඟුරු මිල ද පහත වැටී තිබෙනවා.

එමෙන්ම විදුලි ඉල්ලුම ද සියයට 18 කින් පමණ අඩු වී ඇති අතර පවතින තත්ත්වය හමුවේ සියයට 20 කින් පමණ විදුලි ගාස්තු අඩු කිරීමට හැකි බව ද මහජන උපයෝගිතා කොමිසමේ සභාපති ජනක රත්නායක පසුගියදා කියා සිටියේ ය.