යළිත් නව ගමනක් ආරම්භ කළ යුතුයි - දිලිත් ජයවීරගේ අලුත් අවුරුදු සුබ පැතුම

සිංහල හා දෙමළ අලුත් අවුරුද්ද යනු අතීතයේ සිදු වූ සියලු අඩුපාඩු සහ අතපසුවීම් නිවැරදි කරගනිමින් නව ගමනක් ආරම්භ කිරීමට ලැබෙන වටිනා අවස්ථාවක් බව සර්වජන බලයේ නායක, පාර්ලිමේන්තු මන්ත්‍රී දිලිත් ජයවීර මහතා පවසයි.

අලුත් අවුරුදු සුබපැතුම් පණිවිඩයක් නිකුත් කරමින් ඒ මහතා සඳහන් කළේ, සාමූහිකව නැගී සිටිමින් රට වෙනුවෙන් නව බලාපොරොත්තු ඇති කරගත යුතු කාලය මෙය බවයි.

අලුත් අවුරුද්දේ ජනපතිගේ සුබ පණිවිඩය

සියලු ජනතාවට සාමය සහ සතුට පිරි අවුරුද්දක් වේවායි ඒ මහතා එම පණිවිඩය හරහා ප්‍රාර්ථනා කර සිටියි.

උපුටාගැනීම..

"ශ්‍රී ලාංකේය සංස්කෘතියේ මහා මෞලි මංගල්‍යය සිංහල හා දෙමළ අලුත් අවුරුද්දයි. සිංහල අලුත් අවුරුද්ද මහා සංස්කෘතික මංගල්‍යයක් සේම, ඒ වටා ඉතාම දියුණු සහ විද්‍යාත්මක පසුබිමක් ද පවති. එක් පැත්තකින් රටක් සහ ජාතියක් ලෙසත්, තනි තනිවත් අප අතීතයේ සිදු වූ සියලූම අඩුපාඩු, අතපසුවීම්, නිවැරදි කරගනිමින් යළිත් අලුතෙන් ආරම්භ කිරීමට සිංහල අලුත් අවුරුද්ද අවස්ථාවක් සලසයි. තවත් පැත්තකින් ඉතා වෙහෙසකර, කාර්යබහුල ජීවිතවලට අලංකාර සහ වර්ණවත් විවේකයක් ලබාදී, අපගේ ආදරණීයයන් සමඟ කාලය ගත කිරීමටත් සිංහල හා දෙමළ අලුත් අවුරුද්ද අවස්ථාවකි. එමෙන්ම අප මහා සංස්කෘතියේ අංග වන කෘතගුණ සැලකීම, යුතුකම් ඉටු කිරීම, ඥාති මිත්‍රකම් රැකගැනීම ආදී උතුම් ගුණයන් ඊළඟ පරපුරට දයාද කිරීමටත් සිංහල සහ දෙමළ අලුත් අවුරුද්දෙන් ඉඩ සැලසේ. මුලු රටක්ම එක මොහොතක ලිප ගිනි මොලවන, ගනුදෙනු කරන, ආගමික වතාවත්වල නිරත වන සහ ආහාර අනුභව කරනා වෙනත් රටක් ලෝකයේ නැත. ඒ අර්ථයෙන් ශ්‍රී ලාංකේය අප ලෝකය ඉදිරියේ වෙනස් සහ චමත්කාරජනක ප්‍රජාවක් සහ සාමුහිකයක් වන්නේ සිංහල සහ දෙමළ අලුත් අවුරුද්ද නිසයි.

එය අප රැකගත යුතු සහ මතු පරපුරට උරුම කර දිය යුතු වටිනා ජාතික උරුමයකි. මේ අපගේ අමිල සංස්කෘතියයි. මෙවර අප සිංහල සහ දෙමළ අලුත් අවුරුද්ද සමරන්නේ අපගේ ඒ මහා සංස්කෘතික උරුමයට තර්ජනයක් සහ අභියෝගයක් එල්ලව තිබෙනා පසුබිමකය. ඉතිහාසයේ පළමු වරට රජය සිංහල සහ දෙමළ අලුත් අවුරුද්ද සැමරීමට විශාල උනන්දුවක් දක්වන්නේ නැත. එමෙන්ම මේ මහා සංස්කෘතික මංගල්‍ය පිළිබඳ සැක ඇති කිරීමටත් ඔවුන් කටයුතු කළහ. අප මැදිහත් වී නිවැරදි නැකැත් පත්‍රය ජාතියට තිළිණ කළේ ඒ නිසයි. සිංහල සහ දෙමළ අලුත් අවුරුද්ද අප රැකගත යුතු, ආරක්ෂා කළ යුතු ජාතික උරුමයකි. සිය පවුලේ ආදරණීයයන් සමගින් ගත කරනා මේ මොහොත ශ්‍රී ලාංකිකයෙකුගේ ජීවිතයේ චමත්කාරජනකම මොහොතයි. ඔබ මෙන්ම මම ද එහි ආශ්වාදය උපරිමයෙන් විඳිමින් සිටිමි. ශ්‍රී ලංකාවාසී සියලූම දෙනාට කිරියෙන්, පැණියෙන් සහ සතුට ඉතිරෙන සුබ අලුත් අවුරුද්දක් වේවායි ප්‍රාර්ථනා කරමි."

උපුටාගැනීම අවසන්.. 

සිංහල හා දෙමළ අලුත් අවුරුද්ද උදාවෙයි