ශාසනයට අත තිබ්බොත් දහස් ගණන් ජනතාව පාරට බස්සනවා -ආණ්ඩුවේ 'සංඝ පාතාලය' ලේබල්වලට බය නෑ - උලපනේ සුමංගල හිමියන්ගෙන් සැර ප්‍රකාශයක්

පූජ්‍ය උලපනේ සුමංගල හිමියන් පවසන්නේ තාවකාලිකව විරෝධතා ක්‍රියාමාර්ගවලින් ඉවත් වුවද, ඕනෑම මොහොතක යළි සටන ආරම්භ කිරීමට තමන් වහන්සේලා සූදානම් බවයි.

පූජ්‍ය ගලගොඩඅත්තේ ඥානසාර හිමියන්ගේ සිවුර ඉවත් කිරීමේ සිදුවීම හුදෙකලා සිදුවීමක් ලෙස සලකා අත්හැරීමට සූදානම් නොමැති බව අවධාරණය කළ උන්වහන්සේ, බුද්ධ ශාසනයට එල්ල වන අභියෝග හමුවේ ඉදිරියට පැමිණ කටයුතු කිරීම තමන් වහන්සේලාගේ අරමුණ බව සඳහන් කළහ.

මාධ්‍ය හමුවේදී අදහස් දක්වමින් උලපනේ සුමංගල හිමියන් වැඩිදුරටත් සඳහන් කළේ, මහානායක හිමිවරුන්ගේ අනුදැනුම සහ මඟපෙන්වීම යටතේ තම ක්‍රියාමාර්ග ඉදිරියට ගෙන යන බවයි.

ඥානසාර හිමියන්ට එරෙහිව නීතිමය ක්‍රියාමාර්ග ගෙන ඇත්තේ ඉඩම් කොල්ලකෑම් වැනි කරුණු සම්බන්ධයෙන් නොව, රණවිරුවන් සම්බන්ධයෙන් අදහස් දැක්වීම හේතුවෙන් බව තමන් වහන්සේ විශ්වාස කරන බවද උන්වහන්සේ ප්‍රකාශ කළහ.

ඒ හේතුවෙන් ඥානසාර හිමියන් වෙනුවෙන් පෙනී සිටීමට සහ උන්වහන්සේ නිදහස් කර ගැනීම වෙනුවෙන් කටයුතු කිරීමට තමන් වහන්සේලා පෙළගැසී සිටින බවද සඳහන් කළහ. “ශාසනයට අත තැබුවහොත් ඊට එරෙහිව ක්‍රියාමාර්ග ගන්නවා” වත්මන් ආණ්ඩුව බුද්ධ ශාසනය සම්බන්ධයෙන් අහිතකර ලෙස කටයුතු කර ඇති බවට චෝදනා කළ උලපනේ සුමංගල හිමියෝ, ශාසනයට එරෙහිව කටයුතු සිදුවන ඕනෑම අවස්ථාවක ඊට විරුද්ධව ක්‍රියාමාර්ග ගැනීමට සූදානම් බව පැවසූහ.

තම කණ්ඩායම විසින් මීට පෙර පාගමන් සහ සත්‍යග්‍රහ වැනි විරෝධතා ක්‍රියාමාර්ග සිදු කළ බවත්, එම ක්‍රියාමාර්ග හේතුවෙන් තමන් වහන්සේලාගේ ශක්තිය හෝ බලය අඩු වී නොමැති බවත් උන්වහන්සේ ප්‍රකාශ කළහ.

“ශාසනයට අත තිබ්බොත් දහස් ගණනින් ජනතාව ඕනෑම තැනකට ගෙන්වන්න පුළුවන්” යනුවෙන් සඳහන් කළ උන්වහන්සේ, ඉදිරියේදී ද විවිධ ආකාරයේ විරෝධතා ක්‍රියාමාර්ග ක්‍රියාත්මක කරන බව අවධාරණය කළහ.

තමන් වහන්සේලාට ආණ්ඩුව සමඟ දේශපාලන ගැටලුවක් නොමැති නමුත්, බුද්ධ ශාසනයට මැදිහත් වීමට එරෙහිව කටයුතු කරන බවද උන්වහන්සේ සඳහන් කළහ.

ප්‍රදේශ රැසක ජනතාවට හදිසි නායයෑම් අවදානමක් - හෙට පස්වරු 2.45 දක්වා රතු නිවේදන බලපැවැත්වෙයි

“මහානායක හිමිවරුන්ට ගෞරවයක් ලෙස පියවරක් පසුපසට ගත්තා” විරෝධතා ක්‍රියාමාර්ග තාවකාලිකව අත්හිටුවීමට තීරණය කළේ මහානායක හිමිවරුන්ට ගෞරවයක් දැක්වීමේ අරමුණින් බව උලපනේ සුමංගල හිමියෝ පැවසූහ.

එහෙත් එම තීරණය සටන අත්හැරීමක් නොවන බව අවධාරණය කළ උන්වහන්සේ, තමන් වහන්සේලාගේ ගමන කිසිදු මඩ ප්‍රහාරයකින් නතර කළ නොහැකි බවත්, ඉදිරියේදී අවශ්‍ය ඕනෑම අවස්ථාවක යළි විරෝධතා ආරම්භ කරන බවත් ප්‍රකාශ කළහ. ආණ්ඩුවේ මාධ්‍ය විසින් තම කණ්ඩායම “සංඝ පාතාලය” ලෙස හඳුන්වා දුන් බවත්, “රාජපක්ෂ නිකාය” යන ලේබලයද තමන් වහන්සේලාට අලවා ඇති බවත් උන්වහන්සේ සඳහන් කළහ.

එහෙත් ජනතාවගෙන් තමන් වහන්සේලාට සැලකිය යුතු ප්‍රතිචාරයක් ලැබුණු බවද පැවසූහ. බලංගොඩ කස්සප හිමියන් සම්බන්ධයෙන් කළ ප්‍රකාශය ප්‍රශ්න හා පිළිතුරු වාරයේදී බලංගොඩ කස්සප හිමියන් සම්බන්ධයෙන් අදහස් දක්වමින් උලපනේ සුමංගල හිමියෝ පැවසුවේ, උන්වහන්සේ මෙම විරෝධතාවයට එක් වූ තවත් භික්ෂූන් වහන්සේ නමක් පමණක් බවයි.

කස්සප හිමියන් ගමන් කරන සෑම ස්ථානයක් පිළිබඳවම සොයා බැලීමට තමන් වහන්සේලාට විශේෂ අවශ්‍යතාවක් නොමැති බවද උන්වහන්සේ සඳහන් කළහ. එමෙන්ම, සත්‍යග්‍රහයක් යනු එක් පුද්ගලයෙකුට වුවද සිදු කළ හැකි ක්‍රියාමාර්ගයක් බැවින්, පාගමනට සාපේක්ෂව සහභාගිත්වයේ අඩුවක් දක්නට ලැබුණද එය තම සටනේ ශක්තිය අඩුවීමක් ලෙස නොසලකන බවද පැවසූහ.

අවසානයේදී උලපනේ සුමංගල හිමියන් අවධාරණය කළේ, ඥානසාර හිමියන් නිදහස් කර ගැනීම සහ බුද්ධ ශාසනයට එල්ල වන බව පවසන අභියෝගවලට එරෙහිව කටයුතු කිරීම වෙනුවෙන් ගෙන යන වැඩපිළිවෙළට විරාමයක් නොමැති බවයි.

එම සටන ඕනෑම මොහොතක, ඕනෑම ස්ථානයක සිට යළි ආරම්භ කළ හැකි බවද උන්වහන්සේ වැඩිදුරටත් ප්‍රකාශ කළහ.

අයහපත් කාලගුණික තත්ත්වය හේතුවෙන් දිවයිනේ සියලුම පාසල් හෙට වසා තැබීමට අධ්‍යාපන අමාත්‍යාංශය තීරණය කරයි