ලාෆ්ස් ගෑස් සමාගමට හිතන්න බැරි දැවැන්ත පාඩුවක් - සැප්තැම්බර් කාර්තුවේ අලාභය 88%කින් ඉහළට

ශ්‍රී ලංකාවේ ලාෆ්ස් ගෑස් පීඑල්සී සමාගමේ 2026 සැප්තැම්බර් මාසයෙන් අවසන් වූ දෙවැනි කාර්තුවේ සමූහ ශුද්ධ අලාභය, පෙර වසරේ එම කාර්තුවට සාපේක්ෂව සියයට 88කින් ඉහළ ගොස් තිබේ.

ඒ අනුව, අදාළ කාර්තුවේදී සමාගම වාර්තා කර ඇති සමූහ ශුද්ධ අලාභය රුපියල් බිලියන 1.54ක් වන අතර, පසුගිය වසරේ එම කාලසීමාවේදී වාර්තා වූ අලාභය රුපියල් මිලියන 818.2කි.

අතුරු මූල්‍ය වාර්තාවලට අනුව, මෙම කාර්තුවේදී කොටසකට මූලික අලාභය රුපියල් 3.99ක් ලෙස සටහන් වී තිබේ.

පසුගිය වසරේ අදාළ කාර්තුවේදී එම අගය රුපියල් 2.14ක් විය. එමෙන්ම, සමාගමේ කාර්තුමය සමූහ ආදායම ද සියයට 57කින් පහත වැටී රුපියල් බිලියන 5.71ක් දක්වා අඩු වී ඇත.

පසුගිය වසරේ එම කාර්තුවේදී එම ආදායම රුපියල් බිලියන 13.16ක් ලෙස වාර්තා වී තිබුණි.

මෙම ආදායම් පහත වැටීමට ප්‍රධාන වශයෙන් බලපා ඇත්තේ විදේශ බලශක්ති වෙළෙඳාමේ නිරත ඩුබායිහි පිහිටි SLOGAL Energy DMCC සහ LYNQ Energy FZCO යන අනුබද්ධ සමාගම්වලින් ලැබුණු බාහිර ආදායම මෙවර නොලැබීමයි.

කහ ගෑස් ගැන කළකිරුණු පාරිභෝගිකයන්ට ලාෆ්ස් ගෑස් සමාගමෙන් විශේෂ සුබ පණිවුඩයක් - ගෑස් ගන්න යන්න කළින් අමතන්න

එම සමාගම් පසුගිය වසරේ අදාළ කාර්තුවේදී රුපියල් බිලියන 6.7කට වැඩි බාහිර ආදායමක් උපයා තිබුණි. දේශීය ද්‍රව පෙට්‍රෝලියම් ගෑස් (LPG) මෙහෙයුම්වලින් මව් සමාගම ලැබූ ආදායම ද දේශීය සැපයුම් බාධා හේතුවෙන් සියයට 28කින් පහත වැටී තිබේ.

ඒ අනුව, එම ආදායම පසුගිය වසරේ රුපියල් බිලියන 6.42 සිට මෙවර රුපියල් බිලියන 4.62ක් දක්වා අඩු වී ඇත. සමූහයේ විකුණුම් පිරිවැය ද සියයට 52කින් පහත වැටී රුපියල් බිලියන 6.18ක් වී ඇති අතර, පසුගිය වසරේ එම අගය රුපියල් බිලියන 12.75ක් විය.

කෙසේ වෙතත්, අඩු විකුණුම් ප්‍රමාණයක් පැවතිය ද මව් සමාගමේ විකුණුම් පිරිවැය පහත වැටී ඇත්තේ සියයට 8කින් පමණක් වීම හේතුවෙන් ලාභ ආන්තිකය කෙරෙහි පීඩනයක් එල්ල වී තිබේ.

ඒ අනුව, පසුගිය වසරේ අදාළ කාර්තුවේදී රුපියල් මිලියන 408ක දළ ලාභයක් වාර්තා කළ සමූහය, මෙවර රුපියල් මිලියන 470.9ක දළ අලාභයක් වාර්තා කර ඇත.

විකුණුම් හා බෙදාහැරීමේ වියදම් සියයට 44කින් පහත වැටී රුපියල් මිලියන 119.8ක් වී තිබුණ ද පරිපාලන වියදම් සියයට 5කින් ඉහළ ගොස් රුපියල් මිලියන 292.5ක් වී තිබේ.

නොවැම්බර් 15 ගැන කාලගුණයෙන් විශේෂ අනාවැකියක් - බෙංගාල බොක්කේ අඩු පීඩන කලාපයක් වර්ධනය වෙයිද?

විදේශ විනිමය අනුපාත වෙනස්වීම් කාර්තුවේ ආදායමට අහිතකර බලපෑමක් එල්ල කර නොමැති අතර, ශුද්ධ විදේශ විනිමය හුවමාරු ලාභය සියයට 295කින් ඉහළ ගොස් රුපියල් මිලියන 91.4ක් වී ඇත.

පසුගිය වසරේ එම ලාභය රුපියල් මිලියන 23.2කි. කෙසේ වෙතත්, විදේශීය අනුබද්ධ සමාගම්වල විදේශ විනිමය පරිවර්තන වෙනස්කම් හේතුවෙන් වෙනත් සමස්ත ආදායම් යටතේ රුපියල් මිලියන 122.3ක අලාභයක් වාර්තා වී තිබේ.

පසුගිය වසරේ එම අගය රුපියල් මිලියන 126.4ක ලාභයක් ලෙස පැවතිණි. මේ හේතුවෙන් සමූහයේ සමස්ත විස්තීරණ අලාභය සියයට 157කින් ඉහළ ගොස් රුපියල් බිලියන 1.67ක් වී ඇත.

තවද, පසුගිය වසරේ රුපියල් මිලියන 11.5ක මෙහෙයුම් ලාභයක් වාර්තා කළ සමාගම, මෙවර රුපියල් මිලියන 703.8ක මෙහෙයුම් අලාභයක් වාර්තා කර තිබේ.

කාර්තුවේ මූල්‍ය පිරිවැය ද සියයට 13කින් ඉහළ ගොස් රුපියල් මිලියන 789.4ක් වී ඇත. කෙටිකාලීන ණය ගැනීම් පසුගිය වසරේ රුපියල් බිලියන 17.19 සිට මෙවර රුපියල් බිලියන 24.85ක් දක්වා ඉහළ යාම ඊට බලපා තිබේ.

මේ අතර, ආදායම් බදු වියදම සියයට 53කින් පහත වැටී රුපියල් මිලියන 69ක් වී ඇත. 2026 සැප්තැම්බර් 30 වන විට සමූහයේ මුළු වත්කම් ප්‍රමාණය රුපියල් බිලියන 43.86ක් ලෙස වාර්තා වී තිබේ.

සමුච්චිත අලාභ හේතුවෙන් සමූහයේ කොටස් හිමිකම් අගය ඍණ රුපියල් බිලියන 4.33ක් දක්වා පහත වැටී ඇති අතර, එක් කොටසක ශුද්ධ වත්කම් අගය ද ඍණ රුපියල් 12.88ක් ලෙස සටහන් වී ඇත.

මූල්‍ය වාර්තාවලට අනුව, මව් සමාගම වන LAUGFS Holdings සමාගම සතුව ලාෆ්ස් ගෑස් සමාගමේ ඡන්ද හිමි කොටස්වලින් සියයට 74.02ක හිමිකාරීත්වයක් පවතී.

මහජනතාව සතු කොටස් ප්‍රමාණය මත ගණනය කළ වෙළෙඳපොළ ප්‍රාග්ධනීකරණය රුපියල් බිලියන 3.70ක් වී තිබේ.

සැප්තැම්බර් මාසය අවසානයේදී ලාෆ්ස් ගෑස් ඡන්ද හිමි කොටසක මිල රුපියල් 42.60ක් ලෙස සටහන් වූ අතර, එය පසුගිය වසරේ එම කාලයේ පැවති රුපියල් 55.40ක මිලට වඩා පහළ අගයකි. මේ වන විට එම කොටස් රුපියල් 49.90ක පමණ මිලකට ගනුදෙනු වෙමින් පවතී.

''පාර්ලිමේන්තුවේ වස්කවි කිය කියා කාලය නාස්ති කරලා අණ්ඩු පෙරළන්න බැහැ '' - ජනපතිගෙන් විපක්ෂයට සැර ප්‍රහාරයක්