කුසල් මෙන්ඩිස්ට IPL වරම්

ශ්‍රී ලංකා ක්‍රිකට් ක්‍රීඩක කුසල් මෙන්ඩිස්ට ඉන්දීය ප්‍රිමියර් ලීග් (IPL) තරඟාවලියට සහභාගී වීමේ අවස්ථාව හිමිව තිබේ. ඒ අනුව, ඔහු ඉතිරි IPL තරඟ සඳහා ගුජරාටි ටයිටන්ස් කණ්ඩායම සමඟ එක්වීමට නියමිතය.

ගුජරාටි ටයිටන්ස් කණ්ඩායම මෙම තීරණය නිල වශයෙන් ප්‍රකාශයට පත් කරමින් මෙය තහවුරු කළේය.

ඉන්දු-පාකිස්තාන යුධ ගැටුම් හේතුවෙන් කල් දැමුණු IPL තරඟාවලිය නැවත ආරම්භ කිරීමේදී එංගලන්ත ක්‍රීඩක ජෝස් බට්ලර්ට ඉතිරි තරඟවලට සහභාගී වීමට නොහැකි වීම නිසා කුසල් මෙන්ඩිස්ට මෙම අවස්ථාව හිමිව තිබේ. කුසල් මෙන්ඩිස් මෑතකදී පාකිස්තාන සුපර් ලීග් (PSL) තරඟාවලියටද සහභාගී වූ අතර, එහිදී ඔහුගේ දක්ෂතා අවධානයට ලක්විය.

මේ අතර, ශ්‍රී ලංකාවේ තවත් ක්‍රීඩකයෙකු වන දසුන් ශානකද ගුජරාටි ටයිටන්ස් කණ්ඩායමට එක්ව සිටී. ඔහු ආබාධයක් නිසා තරඟාවලියෙන් ඉවත්වූ නවසීලන්ත ක්‍රීඩක ග්ලේන් පිලිප්ස් වෙනුවට අතරමඟදී කණ්ඩායමට එක්විය.

මෙවර IPL තරඟාවලියේ ගුජරාටි ටයිටන්ස් කණ්ඩායම මේ වන විට ලකුණු සටහනේ පෙරමුණේ පසුවන අතර, ඔවුන් ක්‍රීඩා කළ තරඟ 11න් 8ක් ජයග්‍රහණය කරමින් දක්ෂතා අතර සිටී.

යුධ ගැටුම් හේතුවෙන් කල් දැමුණු IPL තරඟාවලිය මැයි 17 වැනිදා නැවත ආරම්භ වීමට නියමිතය. ශ්‍රී ලංකා ක්‍රීඩකයන් දෙදෙනෙකුගේ සහභාගීත්වය මෙම තරඟාවලියට විශේෂ ආකර්ෂණයක් එක් කරනු ඇතැයි අපේක්ෂා කෙරේ.