අවමංගල්‍ය උත්සවයක් මැදට කඩා වැදුණු වෙඩි ප්‍රහාරය - ජෝර්දානයේදී අත්වූ ඛේදනීය ඉරණමක් [VIDEO]

ජෝර්දානයේ දේවස්ථානයක පැවති අවමංගල්‍ය උත්සවයක් අතරතුර සිදු වූ වෙඩි තැබීමකින් පුද්ගලයන් හත්දෙනෙකු මියගොස් තවත් 40 දෙනෙකු තුවාල ලබා තිබේ. සිද්ධියට අදාළව තුවක්කුකරුවන් පිරිසක් දේවස්ථානය වෙත පැමිණ වෙඩි තබන ආකාරය දැක්වෙන වීඩියෝ දර්ශන ද විකාශය වී ඇත.

විදෙස් මාධ්‍ය වාර්තා කරන පරිදි, මෙම ප්‍රහාරය සිකුරාදා ජෝර්දානයේ කරක් ප්‍රදේශයේ පිහිටි ග්‍රීක ඕතඩොක්ස් දේවස්ථානයකදී සිදුව තිබේ. එම ප්‍රදේශය ජෝර්දාන අගනුවර වන අම්මාන් නගරයට දකුණින් කිලෝමීටර් 180ක පමණ දුරකින් පිහිටා ඇත.

ජෝර්දාන රාජ්‍ය රූපවාහිනිය ඔස්සේ විකාශය වූ දර්ශනවල දැක්වෙන්නේ පිස්තෝල අතැති බව පෙනෙන පුද්ගලයන් දෙදෙනෙකු දේවස්ථානය වෙත පැමිණ වෙඩි තබන ආකාරයයි.

අනතුරුව අර්ධ ස්වයංක්‍රීය රයිෆලයක් අතැති බව පෙනෙන තවත් පුද්ගලයෙකු පැමිණ වෙඩි තැබීමට එක්වන අතර, පසුව ඔවුන් තිදෙනාම දේවස්ථානය දෙසට දිව යන අයුරු ද දර්ශනවල සටහන්ව තිබේ.

ඉරාන පාසලට එල්ල වූ බිහිසුණු ප්‍රහාරයට AI සම්බන්ධද? - CIA හිටපු ප්‍රධානියාගෙන් ප්‍රකාශයක්

සිද්ධිය ඇසින් දුටු පුද්ගලයන් විසින් ලබාගත් වීඩියෝ දර්ශනවල දේවස්ථානය තුළ කැඩී ගිය වීදුරු සහ ලේ පැල්ලම් දක්නට ලැබෙන බව වාර්තා වේ. අවමංගල්‍ය උත්සවයට සහභාගී වී සිටි දෝර්ගම් හලාසා සඳහන් කර ඇත්තේ උත්සවය ආරම්භ වී මිනිත්තු 15ක් පමණ ගත වූ පසු දැඩි වෙඩි හඬ ඇසුණු බවත්, ඒ සමඟම පිරිස දිව යාමට පටන් ගත් බවත්ය.

“එය අසාමාන්‍ය තත්ත්වයක්. දැඩි වෙඩි ප්‍රහාරයක් එල්ල වුණා,” යනුවෙන් ඔහු සඳහන් කර තිබේ. ප්‍රහාරය සිදුකළ පුද්ගලයන් කවුරුන්ද යන්න මෙතෙක් නිල වශයෙන් හෙළි වී නොමැත. ජෝර්දාන රජය නිකුත් කළ නිවේදනයක දැක්වෙන්නේ මෙම ප්‍රහාරය “නාඳුනන ප්‍රහාරකයන්” විසින් සිදුකර ඇති බවයි. සැකකරුවන් අත්අඩංගුවට ගෙන තිබේද නැතහොත් ඔවුන් මියගොස් තිබේද යන්න පිළිබඳව එම නිවේදනයේ සඳහන් කර නොමැත.

සිද්ධිය සම්බන්ධයෙන් විමර්ශන කඩිනමින් සිදුකරන බව ද ජෝර්දාන බලධාරීන් ප්‍රකාශ කර තිබේ.

තුවාල ලැබූවන් අතරින් දෙදෙනෙකුගේ තත්ත්වය බරපතළ බව ජෝර්දාන සෞඛ්‍ය අමාත්‍ය ඉබ්‍රාහිම් අල්-බුදූර් සඳහන් කර ඇත. ප්‍රහාරයෙන් පසුව ජෝර්දානයේ දින තුනක ජාතික ශෝක කාලයක් ප්‍රකාශයට පත්කර තිබේ.

පිළිකාවට තිත ? - නව එන්නතේ සාර්ථකත්වය ඉහළට

ජෝර්දානයේ දෙවන අබ්දුල්ලා රජු මෙම ප්‍රහාරය හෙළා දකිමින් ප්‍රකාශ කර ඇත්තේ කරක් ප්‍රදේශය ඉලක්ක කරගත් ත්‍රස්ත ක්‍රියාවට එරෙහිව දැඩි දඬුවම් ලබාදීමට පියවර ගන්නා බවයි. මියගිය පුද්ගලයන්ගේ පවුල්වලට ශෝකය පළ කළ ඔහු තුවාල ලැබූවන්ට ඉක්මන් සුවය ද ප්‍රාර්ථනා කර තිබේ.

ජෝර්දාන අග්‍රාමාත්‍ය ජෆාර් හසන් ද මෙම ප්‍රහාරය අන්තවාදී මතවාද හා සම්බන්ධ ක්‍රියාවක් ලෙස හඳුන්වා දී ඇති අතර, ඊට වගකිව යුතු පුද්ගලයන්ට එරෙහිව නීතිමය පියවර ගන්නා බව සඳහන් කර ඇත.

එක්සත් ජාතීන්ගේ මහලේකම් අන්තෝනියෝ ගුටරෙස් ද ප්‍රහාරය හෙළා දකිමින්, ඊට වගකිව යුතු සියලු දෙනා හඳුනාගෙන නීතිය හමුවට ගෙන ආ යුතු බව ප්‍රකාශ කර තිබේ. ලෙබනනය, සිරියාව, ඊජිප්තුව සහ ඕමානය ඇතුළු කලාපීය රටවල් කිහිපයක් ද සිද්ධිය සම්බන්ධයෙන් ශෝකය පළ කර ඇත.

කරක් ප්‍රදේශයේ මීට පෙර ද මෙවැනි ප්‍රචණ්ඩකාරී සිදුවීම් වාර්තා වී තිබේ. 2016 වසරේදී එහි සිදු වූ ප්‍රහාර මාලාවකින් පොලිස් නිලධාරීන් හත්දෙනෙකු ඇතුළු පුද්ගලයන් දසදෙනෙකු මියගොස් තවත් පිරිසක් තුවාල ලැබූහ.

පුස්තකාලයට හොරෙන් ඇතුළු වූ වලසා කළ පුදුම වැඩේ මෙන්න - කැලිෆෝනියාවෙන් අපූරු සිදුවීමක්

BREAKING: New footage shows the moment Islamists entered a church in Jordan and began slaughtering worshippers. Six have been confirmed dead, with dozens more injured. https://t.co/piHLcVnhd0

— Eyal Yakoby (@EYakoby) October 23, 2026