AI පුහුණු කරන්න ඔබේ පණිවිඩත්.. Instagram පරිශීලකයින්ට රතු එළියක්

Meta සමාගම Instagram සඳහා end-to-end encryption (E2EE) තාක්ෂණය පුළුල් ලෙස යෙදවීම අත්හිටුවා ඇති බව වාර්තා වේ. ඒ අනුව, Instagram පණිවිඩ සඳහා දැන් සම්මත සංකේතනය (standard encryption) පමණක් ලබාදීමට තීරණය කර ඇත.

මෙම පියවර මගින්, අවශ්‍ය අවස්ථාවකදී සේවා සපයන්නාට පරිශීලක දත්ත වෙත ප්‍රවේශ විය හැකි සම්මත ආරක්ෂණ ක්‍රමයක් යටතට Instagram පණිවිඩ පද්ධතිය පැමිණෙන බව විශ්ලේෂකයින් පෙන්වා දෙති. මෙය Gmail වැනි ප්‍රධාන ඩිජිටල් සේවාවල භාවිත වන ආකෘතියට සමාන වේ.

පෙර සැලසුම් සහ වෙනස

Meta සමාගම 2023 දී Facebook Messenger හි E2EE ක්‍රමය ක්‍රියාත්මක කළ අතර, පසුව Instagram සඳහාද එය සම්මත විශේෂාංගයක් ලෙස දියත් කිරීමට සැලසුම් කර තිබුණි. එහෙත් වසර හතකට පසු එම ව්‍යාප්තිය ඉදිරියට නොගෙන යාමට සමාගම තීරණය කර ඇති බව වාර්තා වේ.

සමාගම පවසන්නේ, මෙම විශේෂාංගය භාවිතා කිරීමට තෝරා ගත් පරිශීලකයින් සංඛ්‍යාව අඩු වීම නිසා මෙම තීරණය ගත් බවයි.

ආරක්ෂාව සහ පෞද්ගලිකත්වය පිළිබඳ විවාදය

ළමා ආරක්ෂණ සංවිධාන කිහිපයක්, එනම් NSPCC වැනි ආයතන, මෙම තීරණය පිළිගෙන ඇති අතර, end-to-end encryption මගින් අපරාධකරුවන්ට සෙවීමෙන් වැළකීමට ඉඩ ලැබිය හැකි බව පෙන්වා දී ඇත.

කෙසේ වෙතත්, පෞද්ගලිකත්වය පිළිබඳ ක්‍රියාකාරීන් සහ විශේෂඥයින් පවසන්නේ මෙය පසුබැසීමක් බවයි. ඔවුන්ගේ මතය අනුව, පණිවිඩ දත්ත සංකේතනය අඩු කිරීම පරිශීලක පෞද්ගලිකත්වයට හානිදායක විය හැකි අතර, විශාල තාක්ෂණ සමාගම් විසින් දත්ත භාවිතා කිරීමේ හැකියාවද ඉහළ යා හැක.

සමාගම් ප්‍රතිපත්තියේ වෙනසක්?

විශ්ලේෂකයින් පෙන්වා දෙන්නේ Meta සමාගම දත්ත එකතු කිරීම සහ AI තාක්ෂණ පුහුණුව සඳහා වැඩි අවධානයක් යොමු කරමින් සිටින බවයි. එම පසුබිම තුළ පණිවිඩකරණ දත්ත ඉතා වටිනා සම්පතක් විය හැකි බවද ඔවුන් සඳහන් කරති.

Instagram පවසන්නේ AI පුහුණුව සඳහා සෘජු පණිවිඩ භාවිතා නොකරන බවයි. එහෙත් සමාගමේ පෞද්ගලිකත්ව ප්‍රතිපත්ති සම්බන්ධයෙන් තවදුරටත් විවෘත පැහැදිලි කිරීමක් නොමැති බව විචාරකයින් පෙන්වා දෙති.

2026 මැයි 8න් පසුව Instagram හි end-to-end encrypted පණිවිඩකරණය තවදුරටත් සහාය නොදක්වන බවද නව යාවත්කාලීන නියමයන්හි සඳහන් වේ.

මෙම තීරණය පෞද්ගලිකත්වය, දත්ත ආරක්ෂාව සහ සමාජ මාධ්‍ය සමාගම්වල බලපෑම පිළිබඳ ගෝලීය විවාදය තවදුරටත් උණුසුම් කරනු ඇතැයි විශේෂඥයෝ පවසති.

"මට අම්මා කෙනෙක් වෙන්න ඕන වුණා, එලොන් ශුක්‍රාණු දෙන්න ඉදිරිපත් වුණා - සිලිකන් නිම්නය කැළඹූ ෂිවොන්ගේ සාක්ෂිය