"අනේ දෙවියනේ එයාට තියෙන්නෙත් මගේ නාසයමයි '' ළමා කාලයේ වෙන්වූ ඉන්දියානු සහෝදරියන් දෙදෙනා වසර 30කට පසු DNA පරීක්ෂණයකින් හමුවෙයි

ඔවුන්ගේ කතාව සැබැවින්ම බොලිවුඩ් චිත්‍රපටයක තිර පිටපතක් බඳුය. ඉන්දියාවේ උපත ලබා ළදරු වියේදීම වෙන වෙනම පවුල් දෙකක් විසින් දරුකමට හදාගත්, නෙදර්ලන්තයේ එකිනෙකට ආසන්න ප්‍රදේශවල හැදී වැඩුණු ඉන්දියානු සම්භවයක් ඇති කාන්තාවන් දෙදෙනෙකු, වසර ගණනාවකට පසු තමන් ජීව විද්‍යාත්මක සහෝදරියන් බව DNA පරීක්ෂණයකින් තහවුරු කරගෙන තිබේ.

43 හැවිරිදි මීනා ගෙල්ටින්ක් (Meena Geltink) සහ 44 හැවිරිදි මිනාල් ටිජ්සන් (Minal Tijssen) යන දෙදෙනාම 1980 දශකයේ මුල් භාගයේදී ඉන්දියාවේ මුම්බායි නගරයේ පිහිටි වෙන වෙනම අනාථ නිවාස දෙකකින්, උපත ලබා මාස කිහිපයක් ඇතුළත නෙදර්ලන්ත පවුල් දෙකක් විසින් දරුකමට හදාගෙන තිබිණි.

ඔවුන් නව යොවුන් වියේ මුල් අවධියේදී පළමු වරට මුණගැසුණේ, ඔවුන් දරුකමට හදාගත් ආයතනය විසින් සංවිධානය කළ උත්සවයකදීය.

එම අවස්ථාවේදීම දෙදෙනා අතර තිබූ පුදුමාකාර පෙනුමේ සහ හැසිරීම් රටාවේ සමානකම් ඔවුන්ගේ අවධානයට ලක් විය.

"දරුකමට හදාගත් සියලුම දරුවන් එකට එක්ව කාලය ගත කරමින්, එකිනෙකා සමඟ සම්බන්ධතා ගොඩනඟා ගැනීමටත් රාත්‍රී ආහාර වේලක් ගැනීමටත් රැස්ව සිටියා," මීනා පවසයි. එම අවස්ථාවේදී මීනා සහ මිනාල් තම මිතුරන් සමඟ සිටි අතර, ඔවුන්ගේ මිතුරන් දෙදෙනාගේ පෙනුමේ තිබූ සමානකම පෙන්වා දී තිබේ.

"ඔවුන් කිව්වා, 'ඔයාලා කැඩපතෙන් ඔයාලගේ මූණු දිහා බලන්න' කියලා." "එවිට මට හිතුණා, 'අනේ දෙවියනේ, එයාට තියෙන්නෙත් මගේ නාසයමයි. අපේ සිනහවත් එක වගේ' කියලා." රාත්‍රී ආහාරය අතරතුර තමන් දිගින් දිගටම මිනාල් දෙස බලා සිටි බවද මීනා පවසයි.

පසුදා ඔවුන් දෙදෙනා දුරකථන අංක සහ ලිපිනයන් හුවමාරු කරගනිමින් අඛණ්ඩව සම්බන්ධව සිටීමට පොරොන්දු වූහ. එම අවස්ථාවේදී ඔවුන් අතර කිසියම් ලේ ඥාති සම්බන්ධතාවක් ඇති බවට කිසිදු ඉඟියක් නොතිබුණද, දෙදෙනා අතර ක්ෂණික සමීප බැඳීමක් ඇති විය.

වසර ගණනාවක් පුරා ඔවුන් ලිපි හුවමාරු කරගත් අතර, බොහෝ විට එකිනෙකාට "සහෝදරිය" ලෙස ආමන්ත්‍රණය කළහ.

ඔවුන් පාසල් ජීවිතය, මිතුරන්, පෙම් සබඳතා, විනෝද චාරිකා සහ නැටුම් පිළිබඳව එකිනෙකා සමඟ ලිපි හුවමාරු කරගත්හ. ඔවුන් ක්‍රීඩා සහ සංගීතය පිළිබඳවද අදහස් හුවමාරු කරගත් අතර, දෙදෙනාම 'Backstreet Boys' සංගීත කණ්ඩායමට ප්‍රිය කරන බවද හෙළි විය.

කෙසේ වෙතත්, මීට වසර 15කට පමණ පෙර ඔවුන්ගේ සම්බන්ධතාවය ක්‍රමයෙන් ගිලිහී ගියේය. ඒ වන විට මිනාල් ප්‍රංශයට පදිංචියට ගොස් තිබූ අතර, මීනාද සිය පළමු දරුවා ලැබීමෙන් පසු කාර්යබහුල වී සිටියාය. වසර ගණනාවකට පසු, මේ වසරේ මුල් භාගයේදී මිනාල් DNA පරීක්ෂණයකට යොමු වූවාය.

අප්‍රේල් මාසයේදී නෙදර්ලන්තයේ සිටින තම දෙමාපියන් හමුවීමට පැමිණි අවස්ථාවේදී ඇය එම පරීක්ෂණය සිදු කර තිබිණි. මැයි 20 වනදා මීනාට ෆේස්බුක් හරහා මිනාල්ගෙන් පණිවිඩයක් ලැබුණි. "ඔයාට මාව මතකද?" යනුවෙන් එහි සඳහන් වී තිබූ අතර, මිනාල් තම DNA පරීක්ෂණ ප්‍රතිඵලයේ තිර රුවක්ද එම පණිවිඩයට එක් කර තිබුණාය.

ලැබුණු ප්‍රතිඵලය ඔවුන් දෙදෙනාටම විශ්මයජනක විය. DNA පරීක්ෂණයෙන් ඔවුන් දෙදෙනා "100%ක් ගැලපෙන" බව තහවුරු වී තිබිණි.

ඒ අනුව, ඔවුන් එකම ජීව විද්‍යාත්මක මව සහ පියා බෙදාගන්නා සම්පූර්ණ සහෝදරියන් බව අනාවරණය විය. "මට දැනුණේ මගේ සිරුරට විශාල ශක්තියක් ලැබුණා වගේ.

මම ඇඬුවා. මිනාල් කියන්නේ මම බොහෝ කාලයක් තිස්සේ බලා සිටි, මගේ ජීවිතයේ අඩුවක්ව පැවති කොටසක්. අපි දෙදෙනාම එකිනෙකාට සහෝදරියන් ලෙස ඇමතුවේ ඇයි කියලා දැන් තේරෙනවා,"

මීනා පවසයි.

"මෙම DNA ගැලපීම මගින් අපගේ අභ්‍යන්තර හැඟීම නිවැරදි බව තහවුරු වුණා." සැබෑ සහෝදරියන් බව දැනගැනීමෙන් පසු, අගෝස්තු 11 වනදා නෙදර්ලන්තයේ 's-Hertogenbosch හිදී ඔවුන් පළමු වරට නැවත හමුවූහ.

එම හමුවීම කඳුළු, වැළඳගැනීම් සහ සිනහවෙන් පිරී තිබූ අතර, පසුව ඔවුන් දෙදෙනා පළමු වරට එකට සෙල්ෆි ඡායාරූපයක්ද ලබාගෙන තිබේ.

 දැනට දරුවන් තිදෙනෙකුගේ මවක් වන මීනා එම හමුවීම විස්තර කර ඇත්තේ "නිවසට පැමිණියාක් වැනි හැඟීමක්" ලෙසය.

"වසර ගණනාවක් පුරා මිනාල්ටත් මටත් අපේ හදවත් තුළ විශාල හිස්බවක් තිබුණා. දැන් අපි සම්පූර්ණ වී ඇති බවක් දැනෙනවා. සියල්ල සිදුවිය යුතු ආකාරයටම සිදුවන බව දැන් හැඟෙනවා," ඇය පවසයි.

ප්‍රංශයේ තම සහකරු සහ පුතුන් දෙදෙනා සමඟ ජීවත් වන මිනාල් පවසන්නේ DNA ප්‍රතිඵලය ලැබුණු අවස්ථාවේදී තමන් සමඟ ගැලපුණු පුද්ගලයා වසර 30කට පමණ පෙර පළමු වරට හමුවූ එම තරුණිය බව වහාම හඳුනාගැනීමට නොහැකි වූ බවයි. කෙසේ වෙතත්, මීනාගේ සමාජ මාධ්‍ය ඡායාරූප නැරඹීමේදී ඇයට සත්‍යය අවබෝධ විය."මීනා... සහෝදරිය," යනුවෙන් ඇය සඳහන් කළාය.

"මට ඒක විශ්වාස කරන්න බැරි වුණා. සහෝදරියන් වීමට පෙර අපි මිතුරියන්ව සිටියා. අපි මුල සිටම සහෝදරියන්ව සිටියා. නමුත් අපි ඒ බව දැනගෙන හිටියේ නැහැ." මීනා කුඩා අවධියේදී නෙදර්ලන්තයේ කුඩා ගම්මානයක හැදී වැඩී ඇති අතර, ඇයව දරුකමට හදාගත් දෙමාපියන් දෙදෙනා පෞද්ගලික පාසලක ගුරුවරුන් ලෙස සේවය කර තිබේ. "ඔවුන් මගේ ගුරුවරුන් ද වුණා. ඔවුන් ඉතා ආදරණීය සහ විශ්වාසවන්ත පුද්ගලයන්,"මීනා පවසයි.

ඇගේ පියා මීට වසර කිහිපයකට පෙර මියගොස් ඇති අතර, මව තවමත් එම ගම්මානයේ ජීවත් වේ. 2003 වසරේදී, වයස අවුරුදු 19ක්ව සිටියදී මීනා තම දරුකමට හදාගත් දෙමාපියන් සහ ගෝවා ප්‍රදේශයේදී දරුකමට හදාගත් තම සහෝදරයා සමඟ මුම්බායි වෙත ගොස් තිබිණි.

එහිදී ඇය තම ජීව විද්‍යාත්මක දෙමාපියන් පිළිබඳ තොරතුරු සොයා ගැනීමේ අරමුණින් සති දෙකක් පුරා ඇයව දරුකමට හදාගත් අනාථ නිවාසයේ වාර්තා පරීක්ෂා කළාය. "මම කොහෙන් ආවාද කියලා දැනගැනීම මට වැදගත් වුණා. නමුත් අනාථ නිවාසය මගේ ජීව විද්‍යාත්මක දෙමාපියන් පිළිබඳ කිසිදු තොරතුරක් හෙළි කළේ නැහැ," ඇය පවසයි.

කෙසේ වෙතත්, දශක ගණනාවකට පසු සිදුකළ DNA පරීක්ෂණයකින් තම සැබෑ සහෝදරිය සොයා ගැනීමට හැකිවීම, ඇයගේ ජීවිතයේ අතිශය සංවේදී අවස්ථාවක් බවට පත්ව තිබේ.

ආයු' හි ඩොක්ටර් නිශ්මි ලෙස ප්‍රේක්ෂක සිත් දිනූ සැන්ඩ්‍රාගෙන් අසමසම රංගනයක් -සරසවියම හොල්ල්ලමින් සම්මාන දෙකක්