''ලකුණු 200ක් ගත්තත් ජයග්‍රහණය කරන්න බැරි වුණා'' - ලකුණු 430ක වාර්තාගත ඉලක්කය හඹා ගිය ශ්‍රී ලංකාව ගැන හැරී බෲක් කියූ කතාව [VIDEO]

ශ්‍රී ලංකාව සහ එංගලන්තය අතර රාවල්පිණ්ඩි නුවර පැවැති තුන්කොන් එක්දින ක්‍රිකට් තරගාවලියේ ඊයේ (22) පැවැති තෙවැනි තරගයේදී එංගලන්තය ලබාදුන් ලකුණු 430ක දැවැන්ත වර්තාගත ඉලක්කය හඹා ගොස් ජයග්‍රහණය කිරීමට ශ්‍රී ලංකා කණ්ඩායම සමත් විය.මෙය එක්දින ක්‍රිකට් ඉතිහාසයේ දෙවන වැඩිම ලකුණු සංඛ්‍යාව හඹාගෙන ගොස් ජයගත් අවස්ථාවයි.

එම තරගයේදී හැරී බෲක් ලකුණු 200ක් රැස් කළද, සිය කණ්ඩායමට ජයග්‍රහණය ලබා ගැනීමට නොහැකි වීම පිළිබඳව තමන් කනගාටු වන බව ඔහු තරගයෙන් අනතුරුව අදහස් දක්වමින් සඳහන් කළේය.

තමන් ලකුණු 200ක් ලබා ගත්තද එම දක්ෂතාවෙන් කණ්ඩායමට ජයග්‍රහණයක් ලබා දීමට නොහැකි වූ බැවින්, එම ලකුණු සංඛ්‍යාවෙන් ප්‍රයෝජනයක් නොවූ බව තම දෘෂ්ටිකෝණයෙන් පෙනෙන බවද ඔහු පැවසීය.

ලංකාවෙම හීනේ සැබෑ වෙයි - අති දැවැන්ත ඉලක්කයක් හඹාගිය ශ්‍රී ලංකාවට ඉතිහාසගත ජයක්

"ශ්‍රී ලංකා කණ්ඩායමට මගේ ගෞරවය පිරිනමනවා. මොකද ඔවුන් එතනදී විශිෂ්ට ඉනිමක් ක්‍රීඩා කළා. මම ලකුණු 200ක් ලබා ගත්තත් එයින් තරඟය ජයග්‍රහණය කරන්න බැරි වුණා. ඒ නිසා මගේ දෘෂ්ටියෙන් බලද්දී ඒ ලබාගත් ලකුණු 200න් වැඩක් වුණේ නැහැ. නමුත් මෙවැනි ලකුණු ගලාගිය ඇදහිය නොහැකි තරඟයකට සම්බන්ධ වීමට ලැබීම පුදුමාකාර අත්දැකීමක්.''

කෙසේ වෙතත්, මෙතරම් ඉහළ ලකුණු සංඛ්‍යාවක් වාර්තා වූ විශිෂ්ට තරගයකට සහභාගී වීමට ලැබීම පුදුමාකාර අත්දැකීමක් බවද හැරී බෲක් සඳහන් කළේය.

පන්දු යැවීමේ සැලසුම් ක්‍රියාත්මක කිරීමට නොහැකි වුණා

තරගයේදී එංගලන්ත පන්දු යවන්නන්ට සිය සැලසුම් නිසි පරිදි ක්‍රියාත්මක කිරීමට නොහැකි වූ බව හැරී බෲක් පෙන්වා දුන්නේය.

එමෙන්ම, පිතිකරණයේදීද ශ්‍රී ලංකා කණ්ඩායමට අවශ්‍ය වූ දේ කිරීමට තම කණ්ඩායම ඉඩ ලබාදුන් බව ඔහු පැවසීය.

එහෙත් ශ්‍රී ලංකා ක්‍රීඩකයන් පිතිකරණයෙන් දැක්වූ දක්ෂතා සුවිශේෂී බවද ඔහු ප්‍රශංසා කළේය.

පන්දු යැවීමේදී කඩුල්ල කෙළින් ඉලක්ක කරමින් පන්දු යැවීමට තම කණ්ඩායම සැලසුම් කළද, එය නිසි ලෙස ක්‍රියාත්මක කිරීමට නොහැකි වූ බවත්, ඒ වෙනුවට කෙටි පන්දු වැඩි වශයෙන් යොමු කිරීම ශ්‍රී ලංකා පිතිකරුවන්ට වාසිදායක වූ බවත් ඔහු පැවසීය.

ශ්‍රී ලංකා පිතිකරුවන් හතරේ සහ හයේ පහර එල්ල කරමින් මෙන්ම ලකුණු අතර දිව යමින්ද ඉලක්කය සාර්ථකව හඹා ගිය බව ඔහු සඳහන් කළේය.

ඊයෙ රටම සමරපු අතිවිශිෂ්ට ජයට සංගාගෙන් සටහනක් - පවන්, දසුන්, ජනිත් සහ අවිෂ්කගේ විශේෂ දක්ෂතාවලටත් සැලියුට් එකක්

ශ්‍රී ලංකාව ජයග්‍රහණයට සම්පූර්ණයෙන්ම සුදුසුයි

තරගයේදී ශ්‍රී ලංකා කණ්ඩායමේ ක්‍රීඩකයන් කිහිපදෙනකුම සුවිශේෂී දක්ෂතා දැක්වූ බව පැවසූ හැරී බෲක්, එම ජයග්‍රහණයට ශ්‍රී ලංකා කණ්ඩායම සම්පූර්ණයෙන්ම සුදුසු බවද ප්‍රකාශ කළේය.

එංගලන්ත කණ්ඩායමට මෙම තරගයෙන් ඉගෙන ගැනීමට බොහෝ දේ ඇති බවත්, පන්දු යැවීමේදී තමන් අපේක්ෂා කළ සැලසුම් අඛණ්ඩව ක්‍රියාත්මක කිරීමට නොහැකි වීම පිළිබඳව අවධානය යොමු කළ යුතු බවත් ඔහු සඳහන් කළේය.

එමෙන්ම, තරගයේදී ඩෝර්සි ලෙස හැඳින්වූ ක්‍රීඩකයා හොඳින් පන්දු යැවූ බවත්, එදින කණ්ඩායමේ හොඳම පන්දු යවන්නා ඔහු බව තමන් සිතන බවත් බෲක් පැවසීය.

හැරී බෲක් පිටිය සිසාරා පහර දෙමින් වේගවත්ම ලකුණු 200ත් වාර්තා කරයි - ශ්‍රී ලංකාවට ලකුණු 430ක දැවැන්ත ඉලක්කයක්

ලකුණු 900කට ආසන්න ප්‍රමාණයක් වාර්තා වූ තණතීරුවක්

තරගයේදී ලකුණු 900කට ආසන්න සංඛ්‍යාවක් වාර්තා වීමෙන් තණතීරුවේ ස්වභාවය පැහැදිලි වන බව හැරී බෲක් සඳහන් කළේය.

එය ඉතා හොඳ තණතීරුවක් බවත්, තරගයේ දෙවැනි ඉනිමේදී පිණි පතිත වීමත් සමඟ පිතිකරණය තවදුරටත් පහසු වන්නට ඇති බවත් ඔහු පැවසීය.

කෙසේ වෙතත්, තණතීරුවේ ස්වභාවය කුමක් වුවත් තම කණ්ඩායමට සැලසුම් නිසි ලෙස ක්‍රියාත්මක කිරීමට නොහැකි වූ බව ඔහු නැවතත් අවධාරණය කළේය.

එංගලන්ත රසිකයන්ටත් ස්තුති‍යි

ලෝකයේ ඕනෑම රටක ක්‍රීඩා කළද එංගලන්ත කණ්ඩායමට සහාය දැක්වීමට රසිකයන් පැමිණීම සතුටට කරුණක් බවද හැරී බෲක් පැවසීය.

රාවල්පිණ්ඩි ක්‍රීඩාංගණයේ ප්‍රේක්ෂකාගාරය තුළ එංගලන්ත ධජ රැගෙන පැමිණි රසිකයන් කිහිපදෙනකු දුටු බවත්, තම කණ්ඩායමට සහාය දැක්වීම සඳහා මෙතරම් දුරක් පැමිණීම පිළිබඳව ඔවුන්ට ස්තුතිවන්ත වන බවත් ඔහු සඳහන් කළේය.

එංගලන්ත රසිකයන් ලෝකයේ සිටින හොඳම ක්‍රීඩා ලෝලීන් බව තමන් පෞද්ගලිකව විශ්වාස කරන බවද ඔහු වැඩිදුරටත් පැවසීය.   

වසර 76ක වාර්තාවක් බිඳ වැටෙයි - බවුමා ක්‍රිකට් ඉතිහාසය අලුත් කරයි