දිවයින පුරා එක්ස්-රේ හා ස්කෑන් සේවා ඇණහිටෙයි

අද (21) උදෑසන 8.00 සිට පැය 24ක සංකේත වැඩවර්ජනයක් දිවයින පුරා රජයේ රෝහල්වල ආරම්භ වී ඇති බව රජයේ විකිරණ විද්‍යා තාක්ෂණවේදීන්ගේ සංගමය පවසයි. මෙම වැඩවර්ජනය හේතුවෙන් රෝහල් 140ක පමණ එක්ස්-රේ, සීටී ස්කෑන්, එම්ආර්ආයි, මැමෝග්‍රෑම්, ඇන්ජියෝග්‍රෑම් වැනි විකිරණ සේවාවන් සහ විකිරණ උපකාරක සැත්කම් තාවකාලිකව ඇණහිටීමට ඉඩ ඇත.

සංගමයේ සභාපති චානක ධර්මවික්‍රම මහතා සඳහන් කළේ, මාළිගාවත්ත විශේෂ වකුගඩු රෝහලේ  නියෝජ්‍ය අධ්‍යක්ෂවරයාගේ අත්තනෝමතික හා අනීතික ක්‍රියාකලාපයන්ට විරුද්ධව සෞඛ්‍ය අමාත්‍යාංශය කිසිදු විධිමත් ක්‍රියාමාර්ගයක් නොගැනීම මෙයට ප්‍රධාන හේතුව බවයි.

මීට පෙර 2024 සහ 2025 දී ලිඛිතව දැනුම් දුන්නත් කිසිදු ප්‍රතිචාරයක් නොලැබුණු බවත් ඔහු පෙන්වා දෙයි.

ජනවාරි 23 සිට අඛණ්ඩ වැඩ වර්ජනයකට සූදානමක්

කෙසේ වෙතත්, මහරගම අපේක්ෂා රෝහල, ලේඩි රිජ්වේ ළමා රෝහල, පේරාදෙණිය සිරිමාවෝ බණ්ඩාරනායක ළමා රෝහල, කාසල් වීදිය කාන්තා රෝහල සහ ද සොයිසා කාන්තා රෝහල වැනි පිළිකා ප්‍රතිකාර ඒකක සහ විශේෂ ළමා/කාන්තා රෝහල් මෙම වැඩවර්ජනයෙන් හැරව තිබේ.

මේ අතර, අක්කරයපත්තු පදනම් රෝහලේ වෛද්‍ය අධිකාරීවරයාට විරෝධය දක්වමින් නැගෙනහිර පළාතේ සියලු රජයේ රෝහල්වල රජයේ වෛද්‍ය නිලධාරීන්ගේ සංගමය ආරම්භ කළ වර්ජනය අද පස්වන දිනටත් (අඛණ්ඩව) ක්‍රියාත්මක බව මාධ්‍ය ප්‍රකාශක වෛද්‍ය චමිල් විජේසිංහ මහතා පවසයි. මෙය මුලින්ම ආරම්භ වූයේ පසුගිය සතියේදී වන අතර, මූල්‍ය හා පරිපාලනමය අක්‍රමිකතා චෝදනා හේතුවෙන් එම නිලධාරියා ඉවත් කිරීම ඉල්ලා සිටීමයි. 

අද දවස ඔබේද? මේ ලග්න 06කට ඉතාමත් යහපත් ග්‍රහ පිහිටීමක්