බඩඉරිඟු ආනයන වංචාවකින් රජයට රු. කෝටි 12ක පාඩුවක්

කොළඹ අපරාධ කොට්ඨාසය (CCD) විසින් සත්ව ආහාර නිෂ්පාදනය සඳහා බඩඉරිඟු ආනයනය කිරීමේදී රජයට රුපියල් කෝටි 12කට අධික පාඩුවක් සිදුකළ මහා පරිමාණ වංචාවක් පිළිබඳව කොළඹ අතිරේක මහේස්ත්‍රාත් අධිකරණයට සැප්තැම්බර් 2 වන දා වාර්තා කර ඇත.

කොළඹ අපරාධ කොට්ඨාසය (CCD) විසින් සත්ව ආහාර නිෂ්පාදනය සඳහා බඩඉරිඟු ආනයනය කිරීමේදී රජයට රුපියල් කෝටි 12කට අධික පාඩුවක් සිදුකළ මහා පරිමාණ වංචාවක් පිළිබඳව කොළඹ අතිරේක මහේස්ත්‍රාත් අධිකරණයට සැප්තැම්බර් 2 වන දා වාර්තා කර ඇත.

2023 වසරේදී පාකිස්තානයෙන් බඩඉරිඟු මෙට්‍රික් ටොන් 25,000ක් ආනයනය කිරීමට පෞද්ගලික සමාගම්වලට බලපත්‍ර ලබාදී ඇති අතර, ආනයනය කරන බඩඉරිඟු කිලෝග්‍රෑමයකට රුපියල් 3ක මුදලක් ජාතික ආහාර ප්‍රවර්ධන මණ්ඩලයට ගෙවිය යුතුව තිබිණි. එහෙත්, එම මුදල නිසි ලෙස ගෙවා නොමැතිවීම හේතුවෙන් රජයට රුපියල් 12,18,64,655ක පාඩුවක් සිදුව ඇති බව විමර්ශනවලදී අනාවරණය වී තිබේ.

මෙම මූල්‍ය වංචාව සම්බන්ධයෙන් පොදු දේපළ පනත යටතේ විමර්ශන පවත්වන බව කොළඹ අපරාධ කොට්ඨාසය අධිකරණයට දැනුම් දී ඇත. රාජ්‍ය ප්‍රසම්පාදන ක්‍රියාවලිය නිසි ලෙස ක්‍රියාත්මක නොවීම හේතුවෙන් මෙම වංචාවට රාජ්‍ය නිලධාරීන්ගේ සම්බන්ධයක් තිබේද යන්න පිළිබඳව ද පුළුල් විමර්ශනයක් සිදුකරන බව ඔවුන් පවසා ඇත.

මෙම සිදුවීමට සම්බන්ධ පෞද්ගලික සමාගමක සැකකරුවෙකු අත්අඩංගුවට ගෙන අධිකරණයට ඉදිරිපත් කර ඇත. දෙපාර්ශ්වයේ කරුණු සලකා බැලූ කොළඹ අතිරේක මහේස්ත්‍රාත් ලියන් වරුසවිතාන මහතා, සැකකරු 2025 සැප්තැම්බර් 16 වන දා දක්වා රක්ෂිත බන්ධනාගාර ගත කිරීමට නියෝග කළේය. එමෙන්ම, සිද්ධියට සම්බන්ධ සෙසු සැකකරුවන් වහාම අත්අඩංගුවට ගන්නා ලෙසත්, ජාතික ආහාර ප්‍රවර්ධන මණ්ඩලයේ නිලධාරීන්ගේ සාක්ෂි සාරාංශයක් ලබන විමර්ශන දිනයට ඉදිරිපත් කරන ලෙසත් පොලිසියට නියම කළේය.

මෙම වංචාව හරහා රජයට සිදුවූ මූල්‍ය හානිය මෙන්ම රාජ්‍ය ප්‍රසම්පාදන ක්‍රියාවලියේ ඇති අඩුපාඩුකම්ද හෙළිදරව් වී ඇත. ඉදිරි විමර්ශන හරහා මෙම සිදුවීමට සම්බන්ධ තවත් පුද්ගලයන් සහ රාජ්‍ය නිලධාරීන්ගේ සම්බන්ධතාවන් පිළිබඳ තොරතුරු අනාවරණය වනු ඇතැයි අපේක්ෂා කෙරේ.