සති දෙකකට තහනම් කලාපයක් වුණ ගාල්ල බන්ධනාගාරය..

මේ දිනවල ගාල්ල බන්ධනාගාර රැඳවියන් අතර මෙනින්ගොකොකස් නම් බැක්ටීරියාව ව්‍යාප්ත වෙමින් පවතියි.

ඒ හේතුවෙන් එම බන්ධනාගාරයට නව රැඳවියන් ඇතුළත් කිරීම, රැඳවියන් උසාවි ගෙන්වීම සති 2ක් යන තෙක් තහනම් කර ඇත.

එමෙන්ම රැඳවියන් මුණගැසීමට බන්ධනාගාරය තුළට පැමිණෙන අමුත්තන් ද සති 2ක් යන තෙක් සීමා කර ඇති බව ගාල්ල බන්ධනාගාර සෞඛ්‍ය සේවා අධ්‍යක්ෂකවරයා සඳහන් කළේ ය.

මෙම බැක්ටීරියා තත්ත්වය පැතිර යාම මේ වන විට පාලනය කර ඇති අතර ඒ සඳහා අවශ්‍ය ඖෂධ ඊයේ දිනයේ දී ගාල්ල බන්ධනාගාරයේ රැඳවියන්ට සහ නිලධාරීන්ට ලබා දීම ආරම්භ කළ බව වැඩිදුරටත් අදහස් දක්වමින් බන්ධනාගාර සෞඛ්‍ය සේවා අධ්‍යක්ෂවරයා පැවසීය.

මේ අතර ගාල්ල බන්ධනාගාරයේ රැඳවියන් දෙදෙනෙකු ද හදිසි අසනීප තත්ත්වයෙන් මිය ගියේ ය. 

එවන් පසුබිමක් තුළ බන්ධනාගාරයේ සිටින සියලු රැඳවියන්ට මුව ආවරණ පළදින ලෙස ද උපදෙස් ලබා දී තිබෙනවා.