කොළඹ මහ නගර සභා බල ප්‍රදේශයේ ස්ථිර සහ තාවකාලික පදිංචිකරුවන්ට අද සිට නොමිලේ කොවිඩ් පරීක්ෂණ කර ගැනීමට අවස්ථාව ලබාදී තිබෙනවා.

රැපිඩ් ඇන්ටිජන් පරීක්ෂණ එලෙස කර ගැනීමට හැකි බවයි කොළඹ මහ නගර සභාවේ ප්‍රධාන සෞඛ්‍ය වෛද්‍ය නිළධාරී වෛද්‍ය රුවන් විජයමුණි මහතා පැවසුවේ.

ඒ අනුව අද සිට බොරැල්ල කැම්බල් පිටියේ දී (ඉරිදා හැර අනෙකුත් සෑම දිනයකම) පෙරවරු 09:00 සිට දහවල් 12:00 දක්වා නොමිලේ කොවිඩ් පරීක්ෂණ සිදුකර ගත හැකියි.

මේ අතර කොවිඩ් ප්‍රතිශක්තීකරණ එන්නත් කාඩ්පත නොමැතිව ලබන මාසයේ සිට බස්නාහිර පළාතේ බස් රථවල ගමනාගමනයට අවසර නොදෙන බව බස්නාහිර මාර්ගස්ත මගී ප්‍රවාහන අධිකාරියේ සභාපති ප්‍රසන්න සංජීව මහතා පවසනවා.

මාර්ගස්ත මගී ප්‍රවාහන අධිකාරියේ ජංගම පරීක්ෂකවරුන් මගින් එන්නත් කාඩ්පත් පරීක්ෂා කරවීම් නිරන්තරයෙන් සිදුකිරිමට අපේක්ෂා කරන බවයි ඔහු සඳහන් කළේ.

බස්නාහිර මාර්ගස්ථ මගී ප්‍රවාහන අධිකාරියේ නියාමනය යටතේ පෞද්ගලික බස් රථ 6,200ක් පමණ ධාවනය වන අතර බස් සේවකයින් ද කොවිඩ් එන්නත ලබාගෙන තිබීම අනිවාර්ය කර තිබෙනවා.

කාඩ්පත පරීක්ෂා කර මගීන් බසයට ඇතුළත් කර ගැනීමේ වගකීම කොන්දොස්තරවරයාට පැවරෙන බවද සභාපතිවරයා සඳහන් කළා.