යුරෝපා රැකියා සිහින පෙන්වූ තවත් ජාවාරමක් හසුවේ

යුරෝපා රැකියා සිහින පෙන්වූ තවත් ජාවාරමක් හසුවේ යුරෝපා රටවල රැකියා ලබාදෙන බව පවසා රුපියල් කෝටි දෙකකට ආසන්න මුදලක් වංචා කළ මහා පරිමාණ ජාවාරමකට සම්බන්ධ වූ පුද්ගලයින් දෙදෙනෙකු ශ්‍රි ලංකා විදේශ සේවා නියුක්ති කාර්යාංශයේ විශේෂ විමර්ශන අංශයේ පොලිස් ඒකකයේ නිළධාරීන් විසින් අත්අඩංගුවටගෙන තිබේ.

මීගමුව ප්‍රදේශයේ වසර එක හමාරක කාලයක් පමණ පවත්වාගෙන ගිය FC International ආයතනය මගින් හංගේරියාව, නෙදර්ලන්තය හා ෆින්ලන්තය වැනි රටවල සාත්තු සේවා අංශයේ රැකියා ලබාදෙන බව පවසා දිවයිනේ විවිධ ප්‍රදේශවල පදිංචි පුද්ගලයින්ගෙන් මුදල් අය කර ඇත.මුදල් ලබාදුන්නද පොරොන්දු වූ පරිදි රැකියාව ලබානොදුන් බවට කාර්යාංශය වෙත පැමිණිලි 20ක් පමණ ලැබී තිබුණි.

නි.ඇමතිගෙ දුව ශිෂ්‍ය නායක මණ්ඩලේට ගත්තෙ නෑ කියලා මානව හිමිකම් ගිහින් - චාමර

කාර්යාංශයේ ලියාපදිංචි බලපත්‍රලාභී රැකියා නියෝජිතායතනයක් ලෙස මෙම ආයතනය කටයුතු කර තිබේ. එහිදී විමර්ශන නිළධාරීන් විසින් සිදුකළ සොයාබැලීමේදී අදාල රැකියා නියෝජිතායතනයට හංගේරියා රටට පමණක් රැකියා ඇණවුම් ලැබී ඇති නමුත් ඒ අතරට සාත්තු සේවා අංශයේ රැකියා අවස්ථා නොමැති බවත් අනාවරණය කරගෙන තිබේ.

මේ සම්බන්ධව ලද පැමිණිලි අනුව ඔවුන් වංචාකර ඇති මුදල රුපියල් කෝටි 2ට ආසන්න බවත් හෙළි වූ අතර, මෙම නීතිවිරෝධි ක්‍රියාවට සම්බන්ධ වංචාකරුවන් අත්අඩංගුවට ගැනීම සදහා කාර්යාංශයේ විශේෂ විමර්ශන පොලිස් ඒකකය විසින් කටයුතු කරන ලදි.

අන්තිම සටනේ ශ්‍රී ලංකා හමුදාව දෙමළ ජනතාව සමූල ඝාතනය කරා මම ඊට සාක්ෂියි - මන්ත්‍රී ගජේන්ද්‍රකුමාර්

ඒ අනුව මෙම ජාවාරම සඳහා සෘජුව සම්බන්ධ වූ, විදේශ රැකියා අංශයේ වසර ගණනක පළපුරුද්දක් ඇති මාවනැල්ල ප්‍රදේශයේ පදිංචි පුද්ගලයෙකු මාවනැල්ලේදී හා කඩවත ප්‍රදේශයේ පදිංචි විශ්‍රාමික යුධ හමුදා කර්නල්වරයෙකු ගම්පහ, ඉඹුල්ගොඩ ප්‍රදේශයේදී අත්අඩංගුවට ගන්නා ලදී. අදාළ රැකියා නියෝජිතායතනයේ හිමිකාරිය ඇයගේ සැමියා හා අදාළ ආයතනයේ මුදල් භාරව කටයුතු කළ කළමනාකරු මෙම අත්අඩංගුවට ගැනීම පිළිබඳව තොරතුරු හෙළිවීමෙන් පසු විමර්ශන නිළධාරීන් මගහරිමින් සැගවී ඇති අතර ඔවුන් අත්අඩංගුවට ගැනීමට ඉදිරි විමර්ශන කටයුතු මෙහෙයවනු ලබයි .

මෙලෙස අත්අඩංගුවට ගත් සැකකරුවන් මීගමුව මහේස්ත්‍රාත් අධිකරණයට ඉදිරිපත් කිරිමෙන් අනතුරුව ඔක්තෝම්බර් මස 10 දින දක්වා රක්ෂිත බන්ධනාගාර ගතකිරීමට මහේස්ත්‍රාත්වරයා නියෝග කර තිබේ. තවද විමර්ශන නිළධාරීන් මගහැර සැගව සිටින පුද්ගලයින්ට විදේශ ගමන් තහනමක් පැනවීමටද මහේස්ත්‍රාත්වරයා නියෝග කරන ලදී.

බීඩි මිල ඉහළට - නව මිල ගණන් මෙන්න

මෙම වංචාවට හසුවූ තවත් පුද්ගලයින්ගෙන් තවදුරටත් කාර්යාංශය වෙත පැමිණිලි ලැබෙමින් පවතින අතර, ඊට අදාළවද මේ වන විට විමර්ශන සිදුකරමින් පවතී. ශ්‍රි ලංකා විදේශ සේවා නියුක්ති කාර්යාංශය සඳහන් කර සිටියේ අදාළ රැකියා නියෝජිතායතනයේ බලපත්‍රය අත්හිටුවීමටද මේ වන විට පියවර ගෙන තිබෙන බවයි . 

වංචනික විදේශ රැකියා ආයතන හෝ පුද්ගලයින් පිළිබඳව තොරතුරු දන්නේ නම් 0112882228 අංකය ඔස්සේ කාර්යාංශ විශේෂ විමර්ශන අංශය යටතේ ස්ථාපිත පොලිස් ඒකකයට දැනුම් දෙන ලෙස කාර්යාංශය මහජනතාවගෙන් ඉල්ලා සිටියි.

සාමාන්‍ය පෙළ නැවත සමීක්ෂණ ප්‍රතිඵල නිකුත් වෙයි