ගල් අඟුරු ගනුදෙනුවේ අක්‍රමිකතා ගැන මුජිබර් CID වෙත පැමිණිල්ලක් ගොනු කරයි [VIDEO]

පසුගිය රජයන් සමයේ සිදුවූ බවට චෝදනා එල්ල වී ඇති දූෂණ හා වංචා මෙන්ම වත්මන් රජය යටතේද පවතින බව කියන චෝදනා සම්බන්ධයෙන් සවිස්තරාත්මක පරීක්ෂණයක් සිදු කරන ලෙස සමගි ජන බලවේගයේ පාර්ලිමේන්තු මන්ත්‍රී මුජිබර් රහ්මාන් මහතා ඉල්ලා සිටී.

ඒ අනුව ඔහු ඇතුළු පක්ෂයේ ප්‍රමුඛ සාමාජිකයින් පිරිසක් අද (13) අපරාධ පරීක්ෂණ දෙපාර්තමේන්තුව වෙත ගොස් ඒ සම්බන්ධයෙන් පැමිණිල්ලක්ද භාර දී ඇත.

ගල් අඟුරු ලංසු ක්‍රියාවලියේදී සිදුවූ බව කියන දැවැන්ත අක්‍රමිකතා පිළිබඳව විශේෂ පරීක්ෂණයක් අවශ්‍ය බව පෙන්වා දෙමින් එම පැමිණිල්ල ඉදිරිපත් කර තිබේ. ජනාධිපතිවරයාට සමීප පුද්ගලයෙකුට ලංසුව ලබාදීම සම්බන්ධයෙන් ශ්‍රව්‍ය පටිගත කිරීමක්ද නිකුත් වී ඇති බව ඔවුහු සඳහන් කරති.

2026 අලුත් අවුරුදු නැකැත්

මේ අතර මාධ්‍ය වෙත අදහස් දක්වමින් මුජිබර් රහ්මාන් මහතා පැවසුවේ 2009 වසරෙන් පසු සිදුවී ඇති බව කියන දූෂණ සම්බන්ධයෙන් විමර්ශනය කිරීම සඳහා ජනාධිපති කොමිසමක් පත් කිරීමේ තීරණය තමන් පිළිගන්නා බවයි.

අතීත දූෂණවලට සම්බන්ධ පුද්ගලයින් හඳුනාගෙන ඔවුන්ට එරෙහිව නීතිමය ක්‍රියාමාර්ග ගැනීමට ජනතාව මෙම රජයට ජනවරමක් ලබාදී ඇති බවද ඔහු අවධාරණය කළේය. එවැනි ක්‍රියාමාර්ග සඳහා තම පක්ෂයේ පූර්ණ සහය ලබාදෙන බවද ඔහු වැඩිදුරටත් පැවසීය.

කෙසේ වෙතත්, අතීත සිදුවීම් පමණක් නොව වත්මන් රජය යටතේ පවතින බව කියන අක්‍රමිකතා සම්බන්ධයෙන්ද විනිවිදභාවයෙන් යුත් හා කඩිනම් පරීක්ෂණ පැවැත්වීම රජයේ විශ්වසනීයත්වය තහවුරු කිරීමට වැදගත් බව ඔහු පෙන්වා දුන්නේය. 

විද්‍යාපීඨ යන්න බලන් ඉන්න ඔයාට සුබ පණිවිඩයක් - අප්‍රේල් 21 සිට ක්‍රියාත්මකයි