අවුරුද්දට ගම්බිම් බලා යන ඔබට ජාතික ගමනාගමනයෙන් දෙන විශේෂ සේවාව මෙන්න...

අලුත් අවුරුදු සමය වෙනුවෙන් ගම්බිම් බලා යන ජනතාවට හෙට සිට ලබන 15 වනදා දක්වා විශේෂ බස් රථ සේවා ක්‍රියාත්මක බව ජාතික ගමනාගමන කොමිෂන් සභාව සඳහන් කළා.

කොළඹ බැස්ටියන් මාවත ප්‍රධාන බස් පර්යන්තයට අමතරව කඩවත, කඩුවෙල සහ මාකුඹුර බහුවිධ ප්‍රවාහන මධ්‍යස්ථානය තුළද මෙම විශේෂ ප්‍රවාහන සැලැස්ම ක්‍රියාත්මක බවයි

එම කොමිෂන් සභාව කියා සිටියේ. අදියර දෙකක් යටතේ ක්‍රියාත්මක මෙම විශේෂ බස් රථ සේවාව දෙවන අදියර යටතේ මගී ඉල්ලුමට සරිලන පරිදි යළි පැමිණීමට බස් සේවා යෙදවීමටද සැලසුම් කර තිබෙනවා.

කෙසේ වෙතත්, ලංකා පෞද්ගලික බස් හිමියන්ගේ සංගමයේ සභාපති ගැමුණු විජේරත්න කියා සිටියේ එළැඹෙන සෙනසුරාදා සහ ඉරිදා දිනවලදී පෞද්ගලික බස් සඳහා ඩීසල් නොලැබුනහොත් අලුත් අවුරුදු ප්‍රවාහන සේවා ක්‍රියාත්මක කිරීම ගැටළු සහගත වනු ඇති බවයි.

මේ අතර, අලුත් අවුරුදු දුම්රිය සේවා ක්‍රියාත්මක කිරීම සම්බන්ධයෙන්ද මේ වනවිට පවතින්නේ අර්බුදකාරී තත්ත්වයක්. කෙසේ වෙතත්, අලුත් අවුරුදු දුම්රිය සේවා අවලංගු කර ඇති බවට පැතිර යන ප්‍රචාර අසත්‍ය බව දුම්රිය දෙපාර්තමේන්තුව කියා සිටියා.

එම දෙපාර්තමේන්තුවේ ගමනාගමන අංශයේ නියෝජ්‍ය සාමාන්‍යාධිකාරී ගාමිණී සෙනෙවිරත්න කියා සිටියේ දුම්රිය විශාල ප්‍රමාණයක් අලුත් අවුරුදු සමයේ ධාවනයට යෙදවීමට පියවර ගන්නා අතර, එම දුම්රිය ලැයිස්තුව අද පෙරවරුවේ ප්‍රකාශයට පත්කරන බවයි.

කෙසේ වෙතත්, දුම්රිය ස්ථානාධිපති සංගමය ඊයේ ප්‍රවාහන අමාත්‍යාංශ ලේකම්වරයා වෙත ලිපියක් යොමු කරමින් පෙන්වා දුන්නේ, අලුත් අවුරුදු විශේෂ දුම්රිය ධාවන කටයුතු සිදු නොකිරීම තුළින් දුම්රිය හරහා ගමනාගමන පහසුකම් සපයා ගනු ලබන ජනතාව අපහසුතාවයට ලක් කිරීමට පාලනාධිකාරිය කටයුතු කිරීම පිළිබඳව සොයා බලා විශේෂ දුම්රිය ධාවනය සඳහා කටයුතු සලසන ලෙසයි.