ඩයස්පෝරා ආයෝජන ගේන්න TNA සුදානම් - ජනපති පොරොන්දු වූ දේවල් සුමන්තිරන් එළියට දමයි..? (VIDEO)

රට ගොඩනැගීම සඳහා තමා සමග එක්ව කටයුතු කරන ලෙස ජනාධිපති ගෝඨාභය රාජපක්ෂ මහතා ඊයේ (25) දෙමළ ජාතික සන්ධානය සමග පැවති සාකච්ඡාවකදී ඔවුන්ට ආරාධනා කර සිටියේය.

සාකච්ඡාව සඳහා අග්‍රාමාත්‍ය මහින්ද රාජපක්ෂ මහතා ඇතුළු පිරිසක් එක්ව සිටි අතර නව ආණ්ඩුක්‍රම ව්‍යවස්ථාවක් ඇතුළු කරුණු 5ක් සම්බන්ධයෙන් එහිදි සාකච්ඡාවට ලක්වී තිබේ.

දෙමළ ජාතික සන්ධානයේ නායක ආර්. සම්බන්ධන් මහතා,

"අපි ගැඹුරින් අපේක්ෂා කරන්නේ එක්සත්, නොබෙදුණු, වෙන්කළ නොහැකි ශ්‍රී ලංකාවක්. සියලුදෙනාගේ ස්වෛරීත්වයට ගෞරව කරන රටක්. එවිට සියලුදෙනාටම ස්වෛරීත්වයට සාධාරණ ප්‍රවේශයක් ලැබේවි. එක්සත්, නොබෙදුණු, වෙන්කළ නොහැකි ශ්‍රී ලංකාවක් තුළ ශ්‍රී ලංකාව සශ්‍රීකත්වයට පත්වීම අපේ අපේක්ෂාවයි."

මෙම සාකච්ඡාවේදී ජනාධිපතිවරයා එකඟවූ කරුණු පැහැදිලි කළා දෙමළ ජාතික සන්ධානයේ පාර්ලිමේන්තු මන්ත්‍රී එම්. ඒ. සුමන්තිරන් මහතා,

"වහාම කරන්න පුළුවන් දේවල් කිහිපයක් තියෙන බව අපි පිළිගත්තා. පළමුවෙන්ම ත්‍රස්තවාදය වැළැක්වීමේ පනත යටතේ දීර්ඝ කාලීනව රඳවාගෙන සිටින අය නිදහස් කිරීමට අධිකරණ ඇමතිතුමා සහ මම එකතුවෙලා අවශ්‍ය නිර්දේශ ඉදිරිපත් කරන්න එකඟ වුණා. දෙවනුව ඉඩම් ප්‍රශ්නය. උතුරු - නැගෙනහිර ජන සංයුතිය වෙනස් කිරීමේ මුවාවෙන් ඉඩම්වල සිදුකරන සියලුදේ නතර කරන්න සහතික වුණා. උතුරු - නැගෙනහිරට විශේෂ සංවර්ධන අරමුදලක් පිහිටුවන්න පියවර ගන්නවා. ඒ තුළින් ඩයස්පෝරා ආයෝජන ගේන්න අපි කටයුතු කරනවා. රජය ඒකට අවශ්‍ය වාතාවරණය සකස් කරන බව කිව්වා."

විඩියෝ දර්ශන - Hiru News Y-Tube Channel