රනිල් විදෙස් සවාරි 23ක් ගිහින් රු.බිලියනයට වැඩි වියදම්

හිටපු ජනාධිපති රනිල් වික්‍රමසිංහ ඔහු බල‍යේ සිටි වසර දෙකක කාලය තුළ විදෙස් සංචාර 23 කට සහභාගී වී ඇති බව අමාත්‍ය වෛද්‍ය නලින්ද ජයතිස්ස පවසනවා. ඒ අනුව ඔහු 2022 වසරේ විදෙස් සංචාර 4 ක්, 2023 වසරේ විදෙස් සංචාර 14 ක් හා 2024 වසරේ නිල විදෙස් සංචාර 5 කට සහභාගී වී ඇති බවයි අද (08) පාර්ලිමේන්තුවේදී යොමුකළ ප්‍රශ්නයකට පිළිතුරු ලබාදෙමින් අමාත්‍යවරයා සඳහන් කළේ.

මෙම විදෙස් සංචාර සඳහා ජනාධිපතිවරයාට අමතරව රජයේ වියදමින් සම්බන්ධ වූ පුද්ගලයින් ගැන විස්තර ද අමාත්‍යවරයා ඉදිරිපත් කළ අතර, 2022 වර්ෂයේ සිදුකරන ලද සංචාර 4 සඳහා පුද්ගලයන් 63 ක්, 2023 වසරේ විදෙස් සංචාර 14 සඳහා පුද්ගලයින් 252 ක් හා 2024 වසරේ නිල විදෙස් සංචාර 5 සඳහා පුද්ගලයින් 111 ක් සම්බන්ධ වී ඇති බවද අමාත්‍යවරයා ප්‍රකාශ කළා.

මෙම විදෙස් සංචාර 23 සඳහා හිටපු ජනාධිපතිවරයා වියදම් කර ඇති මුළු මුදල රුපියල් බිලියන 1 කට වඩා වැඩි බවත්, හිටපු ජනාධිපතිවරයා බලයේ සිටි කාලය තුළ ඔහු පෞද්ගලිකව සහභාගී නොවූ නමුත් ඔහුගේ නියෝජිතයින් සහභාගී වූ සංචාර 19 ක් ඇති බවත්, ඒ සඳහා රුපියල් මිලියන 19 කට වැඩි මුදලක් වැය කර ඇති බවයි අමාත්‍ය වෛද්‍ය නලින්ද ජයතිස්ස වැඩිදුරටත් ප්‍රකාශ කර සිටියේ.