අපි ත්‍රස්තවාදය වැළැක්වීමේ පනත වෙනුවට ජනතාවාදී පනතක් ගේනවා - හර්ෂණ නානායක්කාර

රට තුළ දීර්ඝ කාලයක් තිස්සේ දැඩි කතාබහට ලක්ව ඇති ත්‍රස්තවාදය වැළැක්වීමේ තාවකාලික පනත ඉදිරි කාලයේදී සම්පූර්ණයෙන්ම අහෝසි කර දමා ඒ වෙනුවට වඩාත් ප්‍රගතිශීලී සහ ජනතාවාදී නව පනතක් පාර්ලිමේන්තුවට ඉදිරිපත් කරන බව අධිකරණ සහ ජාතික ඒකාබද්ධතා අමාත්‍ය නීතිඥ හර්ෂණ නානායක්කාර මහතා පවසයි.

අමාත්‍යවරයා මෙම සුවිශේෂී ප්‍රකාශය සිදු කර සිටියේ කිලිනොච්චිය දිස්ත්‍රික් ලේකම් කාර්යාල ශ්‍රවණාගාරයේදී අද 19 වැනිදා පැවැති ප්‍රදේශයේ ක්‍රියාකාරී සිවිල් සංවිධාන නියෝජිතයින් සහ මහජන නියෝජිතයින් සමඟ පැවති විශේෂ සාකච්ඡාවකට සක්‍රීයව එක්වෙමිනි.

අද සිට අධිවේගයේ යන වාහනවලට මෙම නීතිය ක්‍රියාත්මකයි - සියලු වාහන පරික්ෂා කරයි

රටේ ජාතික ආරක්ෂාව මෙන්ම ප්‍රජාතන්ත්‍රවාදය ද එකලෙස සුරැකෙන අයුරින් සකස් කෙරෙන මෙම අදාළ නව පනත ඉදිරි මාස 2 ක් වැනි කෙටි කාලයක් තුළදී ව්‍යවස්ථාදායකයට ඉදිරිපත් කර සම්මත කර ගැනීමට අපේක්ෂා කරන බව ද ඔහු මෙහිදී විවෘතව සඳහන් කළේය.

මෙම නව නීතිමය ප්‍රතිපාදන රට තුළට ගෙන එනු ලබන්නේ සැබෑ ත්‍රස්තවාදී ක්‍රියාකාරකම් මර්දනය කිරීම වෙනුවෙන් පමණක් මිස දේශපාලන ක්‍රියාකාරීන්, සාමාන්‍ය පුද්ගලයින් හෝ වෙනත් සමාජයීය පාර්ශ්වයන් අසාධාරණ ලෙස මර්දනය කිරීම සඳහා නොවන බව ද අමාත්‍ය නීතිඥ හර්ෂණ නානායක්කාර මහතා මෙහිදී දැඩිව අවධාරණය කළේය.

එහිදී වැඩිදුරටත් අදහස් දැක්වූ ඔහු ,

"අපේ රජය බලයට ඇවිත් දැනට වසර එක හමාරක් වෙනවා. මම මීට වසරකට පෙර මෙම ස්ථානයට පැමිණි අවස්ථාවෙත් අතුරුදන් වු පුද්ගලයින් සම්බන්ධයෙන් කතා කරන්න සිදු වුණා. ඒ වන විට මේ අතුරුදන් වු තැනැත්තන් සම්බන්ධයෙන් වු විමර්ශනය කිරී‌මේ යාන්ත්‍රණය බිඳ වැටිලා තිබුණේ. වසරක් තුළ අතුරුදහන් වු තැනැත්තන් පිළිබඳව වු කාර්යාලයට අවශ්‍ය බඳවා ගැනීම් සිදු කර ප්‍රතිපාදන වෙන් කළා. අතුරුදහන් වු තැනැත්තන් පිළිබඳව වු කාර්යාලය සහ පැවති රජයන් සම්බන්ධයෙන් ඔබට වේදනා තිබුණා. එවකට පැවති දේශපාලනය ඒ ආයතන මෙහෙය වු ආකාරය එයට හේතු වුණා.

පැවති රජයන්ට දේශපාලනිකව අවශ්‍යතාවයක් පැවතියා නම් මේවා කරන්න තිබුණා. 2009 වසරේ යුද්ධය අවසන් වුණා. නමුත් අතුරුදන් වු තැනැත්තන් සම්බන්ධයෙන් ගැටලු පවතිනවා කියන්නේ පෙර පැවති රජයන්ට මේ විමර්ශන අවසන් කිරීමේ අවශ්‍යතාවයක් තිබිලා නැහැ. තිස් වසරක යුද්ධය නිසාවෙන් උතුරත් දකුණත් ඇති වෙන්න ලේ කදුළු හෙලුවා. නැවතත් එවැනි තත්වයන් සිදු වෙන්න බැහැ.

ඉදිරි මාසවලදී සුපිරි එල් නිනෝවක් ශක්තිමත් වෙන ලකුණු - ලෝක ආහාර සැපයුමටත් දරුණු පහරක්

යළි යුද්ධයක් ඇති නොවන්න නම් සහජීවනය මිත්‍රත්වය ගොඩ නැගිය යුතුයි. අතුරුදන් වු අයට යුක්තිය ඉටු කිරීමට මෙන්ම විමර්ශනවල අවසානයක් දැකිය යුතුයි. ඒ සම්බන්ධයෙන් වත්මන් රජයට දැඩි අවශ්‍යතාවයක් තිබෙනවා. මේ වන විට උතුරේ ඉඩම් නිදහස් කිරීමේ කටයුතු විධිමත්ව සිදු වෙනවා. මාර්ග විවෘත කිරීමට කටයුතු කර තිබෙනවා. තවදුරටත් දමිළ ජනතාවට දෙවන පුරවැසියෙක් කියලා හිතන්න දෙන්න බැහැ. උතුරේ ජනතාව තුළ විශ්වාසය ඇති කළ යුතුයි. ඒ වෙනුවෙන් අපි කැප වෙනවා. ජාතිවාදයෙන් ආගම්වාදයෙන් වර්ගවාදයෙන් විෂ වෙලා තියෙන පොළොවක් නිදහස් කරන එක පහසු නැහැ. ඒ වෙනුවෙන් රජය කැපවී කටයුතු කරනවා."