තාත්තේ අද ළඟ ඉන්න බැරි වුණත්.. හිටපු ජනපති මහින්ද රාජපක්ෂගේ 81 වැනි ජන්ම දිනයට නාමල්ගෙන් සංවේදී සටහනක්
හිටපු ජනාධිපති මහින්ද රාජපක්ෂ මහතාගේ 81 වැනි ජන්ම දිනය අද (18) දිනට යෙදී ඇත. ඒ අනුව 1945 වසරේ නොවැම්බර් 18 වැනි දින දක්ෂිණ ගම්බද හම්බන්තොට දිස්ත්රික්කයෙහි වීරකැටිය ගම්මානයෙහි දා උපත ලැබූ මහින්ද රාජපක්ෂ මහතා අද සිය 81 වැනි උපන්දිනය සමරන බව සඳහන්.
ශ්රී ලංකාවේ දේශපාලන ක්ෂේත්රයේ දශක ගණනාවක් පුරා කැපී පෙනෙන භූමිකාවක් ඉටු කළ ඔහු මෙරට හයවන ජනාධිපතිවරයා වශයෙන් 2005 සිට 2015 දක්වා ජනාධිපති ධුරය ද හෙබ වූ අතර ඔහුගේ ජනාධිපති ධුර කාලය තුළ, 2009 වසරේදී දශක තුනකට ආසන්න කාලයක් පැවති මෙරට යුද්ධය අවසන් වීම ඔහුගේ දේශපාලන ජීවිතයේ සුවිශේෂී සන්ධිස්ථානයක් විය.
වෘත්තියෙන් නීතිඥයෙකු වන මහින්ද රාජපක්ෂ මහතා පළමුවෙන් ශ්රී ලංකාවෙහි පාර්ලිමේන්තුවට තේරී පත්වුණේ 1970 වසරෙහිදී වන අතර, 2004 අප්රේල් 6 දින සිට 2005 ජනාධිපතිවරණයෙහිදී ඔහුගේ ජයග්රහණය දක්වා අග්රාමාත්ය තනතුර හොබවා ඇත.
එසේම ජනාධිපතිවරයා ලෙසින් ඔහුගේ පළමු සය වසර ධූරය සඳහා ඔහු දිවුරුම් දුන්නේ 2005 නොවැම්බර් 19 දිනයි. ඔහු යළි දෙවන ධූර කාලය සඳහා තේරී පත්වුණේ 2010 ජනවාරි 27 දිනදීයි.
කෙසේ වෙතත් තෙවන ධූර කාලය සඳහා ද ප්රයත්නය දරමින් ඔහු ඉදිරිපත් වූ 2015 ජනාධිපතිවරණයෙහිදී මෛත්රීපාල සිරිසේන මහතා වෙතින් පරාජය ලැබ 2015 ජනවාරි 9 දිනදී තනතුරෙන් ඉවත් විය.
අනතුරුව තනතුර හැර ගොස් මාස කිහිපයකට පසුව, අග්රාමාත්ය ධුරයට පත්වීමට රාජපක්ෂ මහතා විසින් ගත් උත්සාහය අසාර්ථක වූයේ 2015 පාර්ලිමේන්තු මැතිවරණයෙහිදී එක්සත් ජනතා නිදහස් සන්ධානය පරාජයට පත්වීමත් සමගයි.
එහෙත් ඔහු කුරුණෑගල දිස්ත්රික්කය වෙනුවෙන් පාර්ලිමේන්තු මන්ත්රීවරයෙකු වශයෙන් පසුව තේරී පත්විය.
මේ අතර අදට යෙදී ඇති මහින්ද රාජපක්ෂ මහතාගේ ජන්ම දිනයට මේ වනවිට රක්ෂිත බන්ධනාගාරගත කර සිටින ඔහුගේ වැඩිමහල් පුත්රායා වන නාමල් රාජපක්ෂ මහතා විසින් සිය නිල ෆේස්බුක් පිටුවේ සටහනක් තබමින් සුබ පැතුම් එක්කර ඇත.
බලාපොරොත්තු නොවූ අසීමිත සතුටක් සහ ප්රබෝධයක් ගෙන දෙන සුබ කාරණා රැසක් - අද දවස කිරියෙන් පැණියෙන් උතුරන ලග්න පලාපල
අඳාළ සටහන පහතින්,
ආදරණීය තාත්තේ,
මේ වසරේ ඔබගේ උපන්දිනය වෙනුවෙන්, ඔබ අසලින් සිටිමින් ඔබට සුබ පතන්නට නොහැකි ව පවුලෙන් සහ ආදරණීයයන්ගෙන් වෙන් ව මේ අසීරු කාලය ගත කිරීමට සිදු වුවද, සිර මැදිරියේ බැමිවලට එහා ඔබ වෙනුවෙන් මට ඇති ආදරයත්, ගෞරවයත් අසීමිතව දැනෙන බව සටහන් කරමි. ජීවිතයේ අප කිසිදා නොසිතූ අභියෝගවලට මුහුණ දුන් අවස්ථාවලදී අපට ශක්තියක් වන්නේ අපේ දෙමාපියන්ගෙන් ලැබුණු ආදරය, ආදර්ශය සහ ජීවිත පාඩම්ය. තාත්තේ, නායකත්වය යනු තනතුරක් දැරීම පමණක් නොවන බව ඔබ අපට කියා දුන්නේය. එය වගකීම් භාර ගැනීමත්, අභියෝග හමුවේ නොසැලී සිටීමත්, තමන් විශ්වාස කරන දේ වෙනුවෙන් අභීතව පෙනී සිටීමත් බව ඔබගේ ජීවිතයෙන් අපට පෙන්වා දුන්නේය. අපේ රටේ ඉතිහාසයේ අඳුරුතම කාල පරිච්ඡේදයකදී, මාතෘ භූමියේ දහසක් මව්වරුන්, පියවරුන් මෙන්ම ආදරණීය දුවා දරුවන් වෙනුවෙන් කිසිවෙකුට බිය නොවී සාමය උදා කළ අභීත නායකයා ඔබයි. ඒ වෙනුවෙන් ඔබ දැරූ වගකීම්, කැපකිරීම් සහ අභියෝග හමුවේ ඔබ දරාගත් බොහෝ දෑ පිළිබඳව මම පුතෙකු ලෙස ඉතා සමීපව දනිමි. අද මම මුහුණ දෙන මේ අසීරු කාලය තුළ, ඔබ මට කියා දුන් ඉවසීම, ධෛර්යය සහ නොසැලෙන අධිෂ්ඨානයේ වටිනාකම තවත් ගැඹුරින් අවබෝධ කරගනිමින් සිටිමි. පියෙකුගේ හිත කෙතරම් ශක්තිමත් විය යුතු දැයි මා උගත්තේ ඔබගෙනි. දරුවකු කෙරෙහි ඇති ධාරක ස්නේහය හදවතේ ගැඹුරුම තැන හොවාගෙන ශක්තිමත් පියෙකු ලෙස ලෝකය ඉදිරියේ සමස්ත දැයේ දුවා දරුවන්ටත් පියෙකු වන්නට හැකි වන්නේ කෙසේදැයි මා උගත්තේ ඔබගෙනි. මේ සියල්ල දරා ගනිමින් සත්යය වෙනුවෙන් සටන් කරන මමද පියෙකි. අද ඔබ අසලින් සිටින්නට මට නොහැකි වුණත්, ඔබේ ලේ උරුමයෙන් ලද මගේ දරුවන් අද ඔබ අසල සිටිනු ඇත. මා වෙනුවෙන් ඔවුන් ඔබව වැළඳ ගනු ඇත. දෑත්වලින් ඔබ ව වැළඳ ගත නොහැකි නිසා, අකුරුවලින් ඔබ වැළඳ ගැනීමට සිතුවෙමි. ඒ, පියෙකු සහ පුතෙකු අතර ඇති බැඳීම දුරස්ථභාවයෙන් බිඳ දැමිය නොහැකි නිසාය. දේශපාලන පරිසරය තුළ ඔබට අත්දකින්නට සිදු වූ අසීරුතා මෙන්ම තාඩන පීඩන ගැරහුම් හමුවේ ගිරුවාපත්තුවේ මහින්ද රාජපක්ෂ යන මහපොළොවේ පය ගැසූ මගේ තාත්තාට, ඔබේ ආදරණීය ලොකු පුතා වන මම නිදුක් නිරෝගී සුවයත්, මානසික ශක්තියත්, අසීමිත ආදරයත් මෙසේ ලියා තබමි.
සුබ උපන්දිනයක් වේවා මගේ ආදරණීය තාත්තේ!
හදපිරි ආදරයෙන්,
ඔබේ ආදරණීය ලොකු පුතා,
නාමල්"