"එදා ශ්‍රී ලාංකිකයෙක් සෞදි මවකට සමාව දුන්නා - අද ශ්‍රී ලාංකික පුතෙකුට දයාව පෙන්වන්න" - මනෝ ගනේෂන්ගෙන් මානුෂීය ඉල්ලීමක්

සෞදි අරාබියේදී මරණ දණ්ඩනයට මුහුණ දී සිටින ශ්‍රී ලාංකික ජාතික අනෝජන් සිවරාසට සමාව ලබාදෙන ලෙස දෙමළ ප්‍රගතිශීලී සන්ධානයේ (TPA) නායක මනෝ ගනේෂන් මහතා සෞදි ඔටුන්න හිමි කුමරු සහ අග්‍රාමාත්‍ය මොහොමඩ් බින් සල්මාන් කුමරුගෙන් ඉල්ලීමක් කර තිබේ.

මානුෂීය පදනම මත මෙම ඉල්ලීම ඉදිරිපත් කරමින් මනෝ ගනේෂන් මහතා මීට දශක දෙකකට පමණ පෙර සිදුවූ සිද්ධියක්ද සිහිපත් කර තිබේ. එහිදී සිය බිරිඳ ඝාතනය කිරීම සම්බන්ධයෙන් මරණ දණ්ඩනය නියම වූ සෞදි ජාතික කාන්තාවකට ශ්‍රී ලාංකික පුද්ගලයෙකු සමාව ලබාදී ඇති බව ඔහු සඳහන් කළේය.

‘X’ සමාජ මාධ්‍ය ඔස්සේ නිකුත් කළ ප්‍රකාශයක ගනේෂන් මහතා සඳහන් කර ඇත්තේ, සහදේවන් නමැති ශ්‍රී ලාංකික ජාතිකයාගේ බිරිඳ වන රාජමණි සෞදි අරාබියේදී ඝාතනයට ලක්ව ඇති බවයි. එම ඝාතනය සම්බන්ධයෙන් වරදකාරිය වූ සෞදි ජාතික කාන්තාවකට පසුව මරණ දණ්ඩනය නියම කර තිබූ බවද ඔහු සඳහන් කර ඇත.

කෙසේ වෙතත්, එම කාන්තාවගේ දරුවන් කෙරෙහි ඇති වූ අනුකම්පාව හේතුවෙන් සහදේවන් මහතා ඇයට සමාව දීමට තීරණය කළ බව ගනේෂන් මහතා පවසයි. එම සමාව හේතුවෙන් අවසානයේ ඇයට මරණ දණ්ඩනයෙන් ගැලවීමට හැකි වූ බවද ඔහු පෙන්වා දෙයි. අනෝජන් සිවරාසගේ සිද්ධිය සම්බන්ධයෙන් අදහස් දක්වමින් මනෝ ගනේෂන් මහතා සෞදි ඔටුන්න හිමි කුමරුගෙන් ඉල්ලා ඇත්තේ, එම ශ්‍රී ලාංකික ජාතිකයා සම්බන්ධයෙන්ද එවැනිම දයාව සහ අනුකම්පාව දැක්වීමට කටයුතු කරන ලෙසයි.

අස්වැසුම වැඩිහිටි දීමනාව ගෙවීමට සියලු කටයුතු ලෑස්තියි - සුබසාධක ප්‍රතිලාභ මණ්ඩලයෙන් නිවේදනයක්

“මීට පෙර ශ්‍රී ලාංකික පවුලක් සෞදි මවකට සමාව දුන්නා. දැන් සෞදි අරාබිය ශ්‍රී ලාංකික පුත්‍රයෙකුට දයාව පෙන්වනු ඇතැයි අපි බලාපොරොත්තු වෙනවා,” යනුවෙන් ගනේෂන් මහතා සඳහන් කර තිබේ.

මානුෂීය කරුණු මත මෙන්ම දයාව, අනුකම්පාව සහ මිනිස් ජීවිතයක් සුරැකීමේ අරමුණ පෙරදැරිව මෙම ඉල්ලීම ඉදිරිපත් කරන බවද ඔහු වැඩිදුරටත් සඳහන් කර ඇත.