යලිත් ලොක්ඩවුන් එකක්..?සියලු උත්සව නවතාදමයි?

රට විවෘත කර ඇති තත්වයක් මත ජනතාව වගකීමෙන් තොරව හැසිරෙන බව නිරීක්ෂණය වන බව සෞඛ්‍ය සේවා අධ්‍යක්ෂ ජනරාල් වෛද්‍ය අසේල ගුණවර්ධන මහතා සඳහන් කරයි.

ජනතාව වගකීම් විරහිතව හැසිරෙන්නේ නම් ආසාදිතයන් සංඛ්‍යාව ඉහළ යනු ඇති බව ද ඔහු පැවසීය.

මෑත කාලයේදී උත්සව සාද මංගල අවස්ථා කිහිපයක් වසංගතය පැතිර යන ආකාරයට පැවැතුණු බවට වාර්තා වූ බවද ඒ මහතා කියා සිටියි.

ආසාදිතයන් ප‍්‍රමාණය යළි ඉහළ ගියහොත් නැවතත් සංචාරන සීමා පැනවීමට සිදුවුණු ඇති බවද ඔහු තවදුරටත් කියා සිටියේය.

පවතින තත්වය මත උත්සව පැවැත්විම සදහා ඉක්මණින්ම සීමා පැනවිමට සිදුවනු ඇති බවත් ඔහු පැවසිය.

මේ අතර ඊයේ (06) අඛණ්ඩව දෙවන දිනටත් කොවිඩ්-19 ආසාදිතයින් 600 සීමාව ඉක්මවා ගොස් තිබුණි.

දින 20කට පසුව මෙරට දෛනික කොවිඩ් -19 ආසාදිතයින් සංඛ්‍යාව පෙරේදා (05) දිනයේ 600 සීමාව ඉක්මවා ගිය අතර ඊයේ (06) දිනයේත් නව ආසාදිතයින් 617 දෙනෙකු හඳුනාගෙන ඇති බව රජයේ ප්‍රවෘත්ති දෙපාර්තමේන්තුව සඳහන් කළේය.

ඔවුන් සියලුදෙනා අලුත් අවුරුදු කොවිඩ් පොකුරට අයත් බව සඳහන් වේ. ඒ අනුව මෙරට සමස්ත කොවිඩ් -19 ආසාදිතයින් සංඛ්‍යාව 544,630 දෙනෙකු දක්වා ඉහළගොස් තිබේ.

කොවිඩ් ආසාදිතයින් 514,912 දෙනෙකු සුවය ලබා ඇති අතර තවත් ආසාදිතයින් 15,877 දෙනෙකු ප්‍රතිකාර ලබමින් සිටින බව රජයේ ප්‍රවෘත්ති දෙපාර්තමේන්තුව සඳහන් කළේය.

මේ අතර පෙරේදා දිනයේත් කොවිඩ් ආසාදිත මරණ 20 ක් වාර්තා වී ඇති බව සෞඛ්‍ය සේවා අධ්‍යක්ෂ ජනරාල්වරයා විසින් තහවුරු කළේය.

ඒ අනුව මෙරට සමස්ත කොවිඩ් -19 ආසාදිත මරණ සංඛ්‍යාව 13,841 ක් දක්වා ඉහළ ගොස් ඇති බව සෞඛ්‍ය අමාත්‍යංශය පවසයි.