ජීව උණ්ඩ නිෂ්පාදනය ලංකාවේ ඇරඹීමට සැරසෙයි.

ශ්‍රී ලංකා යුද හමුදාව විසින් සැහැල්ලු අවි සඳහා ජීව උණ්ඩ නිෂ්පාදනය කිරීම ආරම්භ කිරීමට බලාපොරොත්තු වන බව හමුදා ආරංචි මාර්ග පවසනවා.

දැනට වේයන්ගොඩ පිහිටි යුධ හමුදාවේ නිෂ්පාදන කම්හල භට පිරිස් සඳහා නිල ඇඳුම්, සටන් හිස්වැසුම්, ශරීර සන්නාහ සහ අනෙකුත් උපකරණ නිෂ්පාදනය කිරීමේ නිරතව සිටින අතර යුද හමුදාව ඔවුන්ගේ නිෂ්පාදන ප්‍රයත්නයේ මීළඟ අදියර ලෙස පතොරම් නිෂ්පාදනයට යොමු වීමට සැලසුම් කරන බවයි ආරංචි මාර්ග සඳහන් කරන්නේ.

නිෂ්පාදන ක්‍රියාවලිය අධීක්‍ෂණය කිරීම සඳහා ශ්‍රී ලංකා යුද හමුදාව සතුව දක්ෂ නිලධාරීන් සිටින බව යුද හමුදාවේ මාධ්‍ය ප්‍රකාශක බ්‍රිගේඩියර් රවී හේරත් තහවුරු කර තිබෙනවා.

එමඟින් මිලිමීටර් 9 පිස්තෝල, ටී-56 වර්ගයේ ගිනි අවි, එල්එම්ජී තුවක්කු ඇතුළු සැහැල්ලු අවි සඳහා පතොරම් නිෂ්පාදනය කිරීමෙන් ආනයනික පතොරම් මත යැපීම සැලකිය යුතු ලෙස අඩු වන අතර සැලකිය යුතු විදේශ විනිමයක් ඉතිරි කරගැනීමට හැකිවේවි.