නායයෑමේ සුන්බුන්වලින් සොයාගත් මුදල් හා රත්තරන් මුල් අයිතිකරුවන්ටම භාර දෙයි

හඟුරන්කෙත ප්‍රදේශයේ බිම් කඩාගැනීම් හා නායයෑම් ආපදාවෙන් විනාශ වූ නිවෙස්වල සුන්බුන් අතර සෝදිසි මෙහෙයුම්වල නිරත වූ ශ්‍රී ලංකා යුද හමුදා භට පිරිස් විසින් සොයාගත් මුදල් සහ රන් ආභරණ නියම හිමිකරු වෙත විධිමත් ලෙස භාරදී ඇත.

හඟුරන්කෙත ප්‍රාදේශීය ලේකම් කාර්යාලයට අනුයුක්තව ආපදා සහන කටයුතුවල නියැලෙන යුද හමුදා නිලධාරීන්ගේ සෝදිසි මෙහෙයුම් අතරතුර නායයෑමකින් සම්පූර්ණයෙන්ම විනාශ වූ නිවසක සුන්බුන් අතරින් රුපියල් ලක්ෂ 3ක මුදල් මෙන්ම රුපියල් මිලියන 5කට ආසන්න වටිනාකමකින් යුත් රන් ආභරණ සොයාගත් බව හමුදා බලධාරීන් සඳහන් කළහ.

සොයාගත් මෙම මුදල් සහ රන් ආභරණ ආරක්ෂිතව රැකගෙන දෙසැම්බර් 14 වැනිදා විධිමත් උත්සවයකින් නියම හිමිකරු වෙත භාරදීමට යුද හමුදාව කටයුතු කළේය.

මෙම ක්‍රියාකාරකම ආපදා අවස්ථාවලදී යුද හමුදාවේ අඛණ්ඩතාව සහ ජනතාවගේ විශ්වාසය තහවුරු කරන උදාහරණයක් ලෙස සමාජයේ අගය කෙරෙමින් තිබේ. ආපදා සහන මෙහෙයුම් තවදුරටත් ප්‍රදේශයේදී දිගටම ක්‍රියාත්මක වන බවද හමුදා බලධාරීන් පැවසූහ.