තවත් නිවසක ගින්නක්..නිවසට දැඩි අලාභ හානී..ගින්න නිවීමට ගිනි නිවන රථ.

මොරොන්තුඩුව , මාවල, මහාරැක්ම සොහොන මැද පාර නිවසක අද රාත්‍රි ගින්නක් හටගෙන ඇතැයි මොරොන්තුඩුව පොලිසිය කියයි . ගින්නෙන් නිවසේ විදුලි පද්ධතියට මුළුමනින්ම හානි සිදුවී ඇති අතර , ගෘහ උපකරණද ගින්නෙන් දැවී ඇත.

හොරණ නගර සභාවට අයත් ගිනි නිවන රථ දෙකක් පැමිණ තිබූ අතර , ප්‍රදේශවාසීන් එක්ව ඒ වනවිටත් ගින්න නිවා දමා තිබුනි . ජීවිත හානි කිසිවක් සිදුව නොමැත.

සිදු වූ හානිය මෙතෙක් ගණන් බලා නොමැති අතර ගින්නට හේතුව මෙතෙක් අනාවරණය වී නොමැත.

එමෙන්ම, ජාඇල - තුඩැල්ල ප්‍රදේශයේ නිවසකින් ද ඊයේ රාත්‍රියේ විශාල ශබ්දයක් සමගින් ගෑස් ලිප පුපුරා යාමේ සිද්ධියක් වාර්තා වුණා. ගෑස් ආශ්‍රිත ගිනි ගැනීම් දෙකක් ඊයේ දිනයේම කෑගල්ල සහ පුත්තලම - ආරච්චිකට්ටුව ප්‍රදේශවලින් ද වාර්තා වූ අතර, ආරච්චිකට්ටුව ප්‍රදේශයේ ගෑස් ආශ්‍රිතව වාර්තා වූ සිදුවීම ද අලුතින් මිල දී ගත් සිලින්ඩරයකට රෙගියුලේරටය සවි කර ලිප දැල්වීමට යාමේදී ඇති වූවක් බව සඳහන්.

එමෙන්ම, ගත වූ දින කිහිපය තුල ගෑස් කාන්දු ආශ්‍රිතව ඇති වු ගිනි ගැනීම් සිද්ධීන් රත්නපුර, අලව්ව, වැලිගම, පන්නිපිටිය, කොළඹ තුරඟ තරඟ පිටිය අසල අවන්හලකින් සහ නිකවැරටිය ප්‍රදේශවලින් ද වාර්තා වී තිබුණා. එම තත්ත්වය හමුවේ සිලින්ඩරවල අන්තර්ගත සංයුතිය සම්බන්ධයෙන් සමාජය තුළ වැඩි කතාබහක් මතුව තිබෙනවා.

ජනතාව තුළ පවතින මෙම ගැටලුකාරී තත්ත්වය සැලකිල්ලට ගනිමින් පාරිභෝගික කටයුතු පිළිබඳ අධිකාරිය පියවර ගත්තේ කොළඹ ඇතුළු දිස්ත්‍රික් 7කින් සාම්පල ලබාගෙන පරීක්ෂණ සඳහා යොමු කිරීමටයි. එහි වාර්තා අද තමන් වෙත ලැබෙන බවයි පාරිභෝගික කටයුතු පිළිබඳ රාජ්‍ය අමාත්‍ය ලසන්ත අලගියවන්න ප්‍රකාශ කළේ.

මේ අතර, ගෑස් අනතුරුවලින් ජනතාව බේරාදෙන ලෙස ඉල්ලා ඊයේ සීනිගම දේවාලයේ දේව කන්නලව්වක් පැවැත්වුණා. ගාල්ල දිස්ත්‍රික් එක්සත් ප්‍රජාතන්ත්‍රවාදී සංවිධානයේ නියෝජිතයින් පිරිසක් ගෑස් ටැංකියක් ද රැගෙන සීනිගම දේවාලයට ගොස් පඬුරක් ගැට ගසා දේව කන්නලව්වක් පැවැත්වූ බවයි  වාර්තාකරු සඳහන් කළේ.

සිලින්ඩරවල පවතින ගෑස් සංයුතිය වෙනස්වීම හේතුවෙන් ගිනිගැනීම් සිදුවන බවට පැහැදිළි කිරීම සඳහා මහජනයා සුරැකීමේ පදනමේ සභාපති අසේල සම්පත් පසුගිය දා සමාජ මාධ්‍ය වෙත වීඩියෝවක් ද නිකුත් කර තිබුණා.