මාධ්‍ය වාර්තා කළ චෝදනා ධනංජය ද සිල්වා ප්‍රතික්ෂේප කරයි.

By Sithumi Mar 24, 2023 02:27 PM GMT
Sithumi

Sithumi

Report

තමා අංක 07 ස්ථානයේ ක්‍රීඩා කිරීම ප්‍රතික්ෂේප කළ බවට පළවන මාධ්‍ය වාර්තා අසත්‍ය බව ට්විටර් සටහනක් තබමින් ධනංජය ද සිල්වා පවසනවා.

ක්‍රීඩකයෙකු ලෙස තමා නිරන්තරයෙන් කණ්ඩායම සමග සිටින බවද ධනංජය නිකුත් කළ ට්විටර් සටහනේ වැඩිදුරටත් සඳහන් වනවා. නවසීලන්තය සමග හෙටින් (25) ආරම්භ වන තරග 3කින් සමන්විත එක්දින ක්‍රිකට් තරගාවලියෙන් ධනංජය ද සිල්වා ඉවත් කොට තිබෙන බව මීට පෙර වාර්තා වුණා. ඒ අංක 7 පිතිකරු ස්ථානයේ ක්‍රීඩා කිරීම ඔහු ප්‍රතික්ෂේප කිරීම හේතුවෙන් බව වාර්තා වී තිබුණු අතර ඒ අනුව ඔහු හෙට තරගයට ක්‍රීඩා කරන ක්‍රීඩකයින් 11 දෙනා අතරට ඇතුළත්ව නැහැ.

මේ හේතුවෙන් එක්දින තරගාවලියේ සෙසු තරග දෙක ද ධනංජය ද සිල්වාට අහිමිවනු ඇති බව වාර්තා වනවා. ICC සුපර් ලීග් තරගාවලිය යටතේ සංචාරක ශ්‍රී ලංකා කණ්ඩායම සහ නවසීලන්තය අතර එක්දින තරග 3ම පැවැත්වෙනවා. 

 ඉන්දියාවේ පැවැත්වෙන ලෝක කුසලාන ක්‍රිකට් තරගාවලියට ඍජුව සුදුසුකම් ලබාගැනීමට නම් ශ්‍රී ලංකා පිල මෙම තරග 3ම ජය ගත යුතුවන අතර දෙරට අතර හෙට පැවැත්වෙන්නේ, සියවැනි එක්දින තරගයයි.