කොවිඩ් ආසාදිත අලෙවි නියෝජිතයෙක් නිසා නගර 5ක වෙළෙඳසැල් 400ක් වසා දැමේ

පෞද්ගලික වෙළෙඳ ආයතනයකට සම්බන්ධ කොවිඩ් ආසාදිත අලෙවි නියෝජිතවරයෙක් ගම්පොළ, වැලිගල්ල, ගෙලිඔය, කොස්සින්න හා පේරාදෙණිය යන නගරවල වෙළෙඳසල් 400ක ආසන්න සංඛ්‍යාවකට පැමිණ තිබීම හේතුවෙන් එම වෙළෙඳසැල් තාවකාලිකව වසා දැමීමට සෞඛ්‍ය අංශ පියවර ගෙන තිබේ.

ඉන් වෙළෙඳසල් 120 ක් අයත් වන්නේ ගම්පොළ නගරයට ය.

ගම්පොළ නගර සීමාවේ පමණක් කොවිඩ් ආසාදිත පුද්ගලයින් මේ වන විට 33 දෙනෙක් වාර්තා වී තිබේ.

මීට අමතරව උඩපළාත කොට්ඨාසයේ ආසාදිතයින් 77ක් හා ගම්පොළ ආසනය තුළ ආසාදිතයින් 130කට ආසන්න ප්‍රමාණයක් වාර්තා වී ඇතැයි ගම්පොළ නගර සභාවේ නගරාධිපති, සමන්ත අරුණ කුමාර මහතා පැවසීය.

මේ අතර පවුල් 524ක පුද්ගලයින් 1024ක පුද්ගලයින් 1,870ක් පමණ මේ වන විට නිරෝධායනයට ලක්කර ඇතැයි ද පැවසු නගරාධිපතිවරයා, විවිධ ආයතනවලින් ආසාදිත වු පුද්ගලයින් කිහිප දෙනෙක් මේ වන විට හමුවී ඇතැයි ද කියා සිටියේය.

“ඊයේ දිනයේ දී කඩ 120කට පමණ ගිහින් තියෙනවා එක වෙළෙඳ ආයතනය නියෝජිතවරයෙක්. එතුමා කොවිඩ් ආසාදිතයෙක් බවට පත්වෙලා තියෙනවා. ඒ ආශ්‍රිතව අපිට විශාල කටයුතු රාශියක් කරන්න තියෙනවා. ඒ කඩ පරීක්ෂා කර වහන්න වෙයි. ඒ ආශ්‍රිතව සේවය කරන අයගේ පීසීආර් පරීක්ෂණ හෙට දිනයේ පවත්වනවා. ඒ සඳහා සහභාගි වෙන්න කියලා ඒ අයගෙන් කාරුණිකව ඉල්ලනවා. ඒ වගේම ගම්පොළ ජනතාවගෙන් ඉල්ලනවා, ජනතාව රාශියක් පමණ දිනකට ඒකරාශී වෙනවා. ගම්පොළ නගරය අද අවදානම් තත්ත්වයක තියෙන්නේ ඒක නිසා සංචරණ පුළුවන් තරම් සීමා කරන්න. අත්‍යාවශ්‍ය දෙයක් හැරුණ විට නගරයට එන්න එපා. “