අඟහරු ග්‍රහයාගේ මතුපිට සාගරයක් නිර්මාණය කරන්න තරම් ජලය හමුවෙයි..අලුත්ම සොයා ගැනීම මෙන්න.(PHOTOS)
Aruna
අඟහරු ග්‍රාහකය මතුපිට සාගරයක් නිර්මාණය කිරීමට ප්‍රමාණවත් ජල ධාරිතාවක් එහි ගැඹුරු පතුලේ තැන්පත්වී ඇති බව නාසා ආයතනයේ නව පර්යේෂණයකින් හෙළි වී තිබෙන බව විදෙස් මාධ්‍ය වාර්තා පවසනවා.
නාසා ආයතනයේ විද්‍යාඥයන් කණ්ඩායමක් ප්‍රකාශ කර තිබෙන්නේ, ග්‍රහයාගේ කිලෝමීටර් 20ක් තරම් ගැඹුරකින් එම ජල ධාරිතාව තැන්පත් වී ඇති බවට එහි මතුපිට ඇති කුඩා ඉරි තැලීම් හා පාෂාණ සිදුරුවලින් අනුමාන කළ හැකි බවයි.
නාසා ආයතනයේ විද්‍යාඥයන් කණ්ඩායම එසේ අනුමාන කර ඇත්තේ, මීට වසර කිහිපයකට පෙර අඟහරු ග්‍රහයාගේ අභ්‍යන්තරය අධ්‍යයනය කිරීම සඳහා භූ කම්පන මාපකයක් සවි කළ ලැන්ඩරයක් යැවීමෙන් ලබාගත් දත්ත වාර්තා විශ්ලේෂණය කිරීමෙන් බවත් විදෙස් මාධ්‍ය වැඩිදුරටත් වාර්තා කළේ.
එම ලෑන්ඩරය වසර 2018 සිට 2022 දක්වා කාලයේදී අඟහරු ග්‍රහයාගේ මතුපිට ගොඩ බස්වා අධ්‍යයන කටයුතු සිදු කර ඇති බවයි විදෙස් මාධ්‍ය වාර්තා පවසන්නේ.
නාසා ආයතනයේ විද්‍යාඥයන් ප්‍රකාශ කර තිබෙන්නේ, ජලය ඇතැයි අනුමාන කරන ගැඹුරු සීමාවට ප්‍රවේශ වීමට ඉදිරි අනාගතයේදී විද්‍යාඥයන් සමත් වන්නේ නම් අඟහරු මතුපිට ජීවින්ට වාසය කිරීමට සුදුසු පරිසරයක් නිර්මාණය කිරීමේ හැකියාව ද පවතින බවයි.
කෙසේ වුවද එය විශාල අභියෝගයක් වනු ඇතැයි ද ඔවුන් වැඩිදුරටත් සඳහන් කර තිබේ.
