මිල අධිකම iPhone එකේ තිරය මැදින් කැඩෙන ශබ්දයක්- Apple සමාගමෙන් හදිසි පිළිගැනීමක් - ෆෝන් මාරු කර දෙන්න සූදානම්

ඉහළ බලාපොරොත්තු මධ්‍යයේ වෙළෙඳපොළට හඳුන්වා දුන් Apple සමාගමේ නවතම නැමිය හැකි ස්මාර්ට් ජංගම දුරකථනය වන ‘iPhone Duo’ හි තිර ආශ්‍රිත දෝෂ කිහිපයක් වාර්තා වී ඇති බව සමාගම පිළිගෙන තිබේ.

එක්සත් රාජධානියේදී පවුම් 1,999ක (ඇමෙරිකානු ඩොලර් 2,668ක) ආරම්භක මිලකට අලෙවි කෙරෙන මෙම උපාංගය, Apple සමාගමේ පළමු නැමිය හැකි දුරකථනයයි.

එහි තිර මත ඉරි මතු වී ඇති බව දැක්වෙන ඡායාරූප කිහිපයක් සමාජ මාධ්‍ය ඔස්සේ හුවමාරු වී තිබේ. දුරකථන කිහිපයක අභ්‍යන්තර තිරයට බලපාන ගැටලුවක් පවතින බව Apple සමාගම සඳහන් කර ඇත. එවැනි දෝෂවලට මුහුණ දුන් පාරිභෝගිකයින්ට දුරකථන මාරු කර ගැනීම සඳහා සමාගම හා සම්බන්ධ වන ලෙස ද දැනුම් දී තිබේ.

පසුගිය සතියේ ලොව පුරා Apple වෙළෙඳසැල් වෙත පාරිභෝගිකයින් විශාල පිරිසක් ආකර්ෂණය කර ගැනීමට සමත් වූ මෙම දුරකථනය, සමාගමේ නිෂ්පාදන පෙළට නව මුහුණුවරක් එක් කිරීමටත්, නැමිය හැකි දුරකථන වෙළෙඳපොළේ තරගකරුවන්ට අභියෝග කිරීමටත් ගත් උත්සාහයකි.

තිර ඉරිතැලීම් සහ අසාමාන්‍ය ශබ්ද පිළිබඳ පැමිණිලි ‘iPhone Duo’ භාවිත කරන්නන් කිහිපදෙනෙකු අන්තර්ජාලයට එක් කළ ඡායාරූපවල දුරකථනයේ තිරය නැමෙන මධ්‍යම ප්‍රදේශය ආශ්‍රිතව ඉරිතැලීම් දක්නට ලැබේ.

තවත් පරිශීලකයින් පිරිසක් දුරකථනය විවෘත කිරීමේදී යමක් තැළෙන හෝ කැඩෙන ආකාරයේ ශබ්දයක් ඇසෙන බව වාර්තා කර තිබේ.

ජස්ටින් ලොකොස් (Justin Lokos) නමැති පරිශීලකයෙකු ද තම දුරකථනයේ තිරයේ දකුණු පස ඉරි මතු වී ඇති අයුරු දැක්වෙන ඡායාරූපයක් අන්තර්ජාලයට එක් කර තිබුණි.

පසුව ඔහු හානි වූ දුරකථනය අසලින් නව දුරකථනයක් තබා ගත් ඡායාරූපයක් ද පළ කරමින්, නිව්යෝර්ක්හි Apple වෙළෙඳසැලෙන් ලැබුණු සහාය වෙනුවෙන් ස්තුතිය පළ කළේය.

කෙසේ වෙතත්, මෙම දෝෂවල බරපතළකම හෝ ඒවා බලපා ඇති සමස්ත දුරකථන සංඛ්‍යාව පිළිබඳව Apple සමාගම මෙතෙක් නිශ්චිත තොරතුරු අනාවරණය කර නොමැත. එමෙන්ම, අන්තර්ජාලයේ පළ වී ඇති ඇතැම් දෝෂ සහිත උපාංගවල ඡායාරූප කෘත්‍රිම බුද්ධිය (AI) භාවිතයෙන් නිර්මාණය කර තිබිය හැකි බවට ද සැක පළ වී තිබේ

. වෙළෙඳපොළ පර්යේෂණ ආයතනයක් වන IDC හි තාක්ෂණික විශ්ලේෂක ෆ්‍රැන්සිස්කෝ ජෙරොනිමෝ (Francisco Jeronimo) පවසන්නේ, මෙම සිදුවීම් මත පදනම්ව සමස්ත නිෂ්පාදනයේ ගුණාත්මකභාවය පිළිබඳ අවසන් නිගමනයකට එළඹීමේදී ප්‍රවේශම් විය යුතු බවයි.

එහෙත්, Apple සමාගම සතු ඉංජිනේරු හැකියාවන් සහ සැපයුම් දාම කළමනාකරණ අත්දැකීම් තිබියදීත්, නැමිය හැකි දුරකථන නිෂ්පාදනයේදී සැලකිය යුතු තාක්ෂණික අභියෝග පවතින බව මෙම මූලික ගැටලු මගින් පෙන්නුම් කරන බව ඔහු වැඩිදුරටත් සඳහන් කළේය.

සෞදියේ ලොකුම තෙල් පිරිපහදුවට හූති මිසයිල ප්‍රහාරයක් - මැදපෙරදිග යුද ගිනි මැද ලෝක තෙල් මිල මාස 6ක ඉහළම මට්ටමට

ඉහළ මිලකින් යුත් නව නිෂ්පාදනයක් ‘iPhone Duo’ හි අඟල් 7.6ක (සෙන්ටිමීටර 19.3ක) අභ්‍යන්තර තිරය සන්ධියක් (hinge) මගින් කොටස් දෙකක් ලෙස සම්බන්ධ කර ඇත.

තිරය නැවත නැවත නැමීමට සහ දිගහැරීමට හැකි වන පරිදි නිර්මාණය කිරීම සංකීර්ණ ඉංජිනේරු ක්‍රියාවලියකි. Apple සමාගම මෙම නිෂ්පාදනය හඳුන්වා දීමට පෙර වසර ගණනාවක් එහි තාක්ෂණය සංවර්ධනය කර තිබූ අතර, ඒ වන විටත් ඇන්ඩ්‍රොයිඩ් මෙහෙයුම් පද්ධතිය භාවිත කරන පාරිභෝගිකයින්ට විවිධ සමාගම්වල නැමිය හැකි දුරකථන මාදිලි රැසක් තෝරා ගැනීමට අවස්ථාව තිබිණි.

මෙය Apple සමාගමේ මිල අධිකම iPhone මාදිලිය වන අතර, ඉහළම විශේෂාංග සහිත අනුවාද සඳහා පවුම් 3,199ක් දක්වා වැය වේ. ජෙරොනිමෝ පෙන්වා දෙන්නේ, Apple සමාගම මෙම උපාංගය වෙළෙඳපොළේ දැනට පවතින නැමිය හැකි දුරකථන අතර ඉහළ මට්ටමේ විකල්පයක් ලෙස ස්ථානගත කර ඇති බැවින්, පළමු පරම්පරාවේ දෝෂවලට සමාගම ප්‍රතිචාර දක්වන ආකාරය පාරිභෝගික විශ්වාසය කෙරෙහි සැලකිය යුතු බලපෑමක් ඇති කළ හැකි බවයි.

Apple සමාගම සතු විශ්වාසවන්ත පාරිභෝගික පදනම සහ පුළුල් වෙළෙඳසැල් ජාලය හරහා ඇතැම් උපාංග එම ස්ථානයේදීම මාරු කර දීමට හැකියාව තිබේ. එහෙත් ඔක්තෝබර් 30 වැනිදා තවත් වෙළෙඳපොළවල් 28කට මෙම දුරකථනය හඳුන්වා දීමට නියමිතව තිබූ බැවින්, වගකීම් සහ උපාංග මාරු කිරීමේ ප්‍රතිපත්තිය පිළිබඳ පැහැදිලි කිරීමක් ඉක්මනින් ලබාදීම වැදගත් බව ඔහු සඳහන් කළේය.

Apple සමාගමේ නව යුගයකට අභියෝගයක් ‘iPhone Duo’ හඳුන්වාදීම Apple සමාගමේ iPhone නිෂ්පාදන ඉතිහාසයේ දශක දෙකකට ආසන්න කාලයකින් සිදු වූ ප්‍රධානතම සැලසුම් වෙනසක් ලෙස සැලකේ. සැප්තැම්බර් මාසයේදී ටිම් කුක්ගෙන් ප්‍රධාන විධායක නිලධාරී ධුරයේ වගකීම් භාරගත් ජෝන් ටර්නස් විසින් ද මෙම උපාංගය හඳුන්වා දෙන ලදී.

දුරකථනය වසා ඇති විට සාමාන්‍ය iPhone මාදිලියක පළල් අනුවාදයක් මෙන් දිස්වන අතර, විවෘත කළ විට කුඩා ටැබ්ලට් පරිගණකයකට සමාන විශාල තිරයක් සහිත උපාංගයක් බවට පත්වේ.

පසුගිය මාසයේ Apple සමාගමේ කැලිෆෝනියා මූලස්ථානයේ පැවති උත්සවයකදී ටර්නස් සඳහන් කළේ, ඇතැම් තරගකාරී නැමිය හැකි දුරකථන එකිනෙකට අසීරුවෙන් සම්බන්ධ කළ දුරකථන දෙකක් මෙන් හැඟෙන බවයි. ‘Duo’ මගින් නැමිය හැකි දුරකථනයක් භාවිත කිරීමේ අත්දැකීම නැවත අර්ථ දැක්වීම සමාගමේ අරමුණ බව ද ඔහු ප්‍රකාශ කළේය.

කෙසේ වෙතත්, නව උපාංගයේ තිර දෝෂ පිළිබඳ වාර්තා හමුවේ Apple සමාගමට දැන් මුහුණ දීමට සිදුව ඇත්තේ තාක්ෂණික අභියෝගයකට පමණක් නොවේ. පාරිභෝගික විශ්වාසය රැකගැනීම, දෝෂ සහිත උපාංග සඳහා කාර්යක්ෂම විසඳුම් ලබාදීම සහ නැමිය හැකි දුරකථන වෙළෙඳපොළේ තම ස්ථානය තහවුරු කරගැනීම ද සමාගම ඉදිරියේ ඇති ප්‍රධාන අභියෝග වේ.

ලිට්‍රෝ ගෑස් සහ ලාෆ් ගෑස් ගැන අමාත්‍ය නිවේදනය - මේ දැන් නිකුත් වූ විස්තරේ මෙන්න