ලීසිං ආයතනයකදී 14 හැවිරිදි දරුවෙකුට ලිංගික අතවර කීරීමේ සිදුවීම බොරුවක්.. පොලිසියෙන් විශේෂ දැනුම්දීමක්.

පසුගියදා කුරුණෑගල ප්‍රදේශයෙන් වාර්තා වූ ළමා අපචාර සිද්ධියක් හේතුවෙන් නොසන්සුන්කාරී තත්ත්වයක් ඇති වූ අතර එය ව්‍යාජ ප්‍රකාශයක් හේතුවෙන් සිදුවූවක් බව පොලිස් මාධ්‍ය ප්‍රකාශක ජ්‍යෙෂ්ඨ පොලිස් අධිකාරී නිහාල් තල්දූව මහතා ප්‍රකාශ කළා.

ඔහු ප්‍රකාශ කළේ, කුරුණෑගල - යන්තම්පොල ප්‍රදේශයේ පෞද්ගලික ලීසිං ආයතනයකදී මානසික ආබාධයකින් පෙළෙන 14 හැවිරිදි දරුවෙකු ලිංගික අතවර කළ බව පැවසීමත් සමඟ එම ප්‍රදේශයේ නොසන්සුන්කාරී තත්ත්වයක් වාර්තා වූ බවයි.

14 හැවිරිදි මෙම දරුවා කාත්තන්කුඩි ප්‍රදේශයේ පදිංචිකරුවෙකු බවත්, වෛද්‍ය ප්‍රතිකාර ලබමින් සිටින අතර එම කාලය තුළ දෙමාපියන් සහ භාරකරුට නොදැනී කුරුණෑගල ප්‍රදේශයට ගොස් ඇති බවට පරීක්ෂණවලදී අනාවරණය වී ඇති බව ජ්‍යෙෂ්ඨ පොලිස් අධිකාරී තල්දූව මහතා පැවසීය.

මෙම තරුණයා යතුරුපැදියක් මිලදී ගන්නා මුවාවෙන් ලීසිං ආයතනයට පැමිණ අලෙවිය ප්‍රතික්ෂේප කිරීම නිසා ඔහු පිටතට ගොස් තමාට එම ආයතනය තුළ ලිංගික අතවරවලට ලක් වූ බව ප්‍රකාශ කර ඇති බව වාර්තා වේ.

ඉන් අනතුරුව ආයතනයට පිටතින් මහජනතාව රැස්ව සිටීමත් සමඟ නොසන්සුන්කාරී තත්ත්වයක් ඇති වූ අතර තත්ත්වය පාලනය කිරීමට පොලිසියද යොදවා තිබුණා.

ජ්‍යෙෂ්ඨ පොලිස් අධිකාරී නිහාල් තල්දූව මහතා පැවසුවේ, ලිංගික අපයෝජනය පිළිබඳ ප්‍රකාශය ව්‍යාජ එකක් බවට පරීක්ෂණවලින් අනාවරණය වී ඇති බවත් එවැනි සිදුවීමක් සිදුවී නොමැති බවට සීසීටීවී දර්ශනවලින් අනාවරණය වී ඇති බවයි.

ලිංගික අපයෝජන චෝදනාව තහවුරු කර ගැනීම සඳහා වෛද්‍ය පරීක්ෂණයක් පවත්වන අතර දරුවා රෝහල් ගත කර ඇති බව ඔහු වැඩිදුරටත් පැවසීය.

මෙම සිද්ධිය සම්බන්ධයෙන් සමාජ මාධ්‍ය ඔස්සේ ප්‍රචාරය වන තොරතුරු අසත්‍ය බව ද පොලිස් මාධ්‍ය ප්‍රකාශකවරයා වැඩිදුරටත් සඳහන් කළා.