විශ්වවිද්‍යාල සිසුවියක් දුම්රියෙන් ඇද වැටෙයි.. බරපතළ තුවාල ලබා.. වහාම රෝහල්ගත කරයි..
krishani
අද (12) උදෑසන දුම්රියේ ගමන් ගත් තරුණියක් හපුතලේ දුම්රිය ස්ථානයේ දී ඇද වැටීමෙන් බරපතළ තුවාල ලබා තිබෙනවා.
ඒ බව හපුතලේ පොලීසිය සඳහන් කළේ ය.
කොළඹ කොටුව සිට බදුල්ල බලා ගමන් කරමින් තිබු අංක 1045 දරණ රාත්‍රි තැපැල් දුම්රියේ එම තරුණිය සිට ඇත.
එලෙස, අනතුරට ලක්ව ඇත්තේ අරලිය උයන මාවඩවිල පදිංචි 21 හැවිරිදි විශ්වවිද්‍යාල සිසුවියක බව පොලීසිය පැවසීය.
ඇල්ල ප්‍රදේශයේ සංචාරයක් සඳහා ඇය ඇතුළු 18 දෙනෙකු පැමිණෙමින් සිටියදී උදෑසන 6.30ට පමණ හපුතලේ දුම්රිය ස්ථානයේ දුම්රිය නැවැත්වු අවස්ථාවේ දී ඉන් බැස ඇත.
නැවත දුම්රිය ගමන් ගන්නා අවස්ථාවේ දී එයට ගොඩවීමට යාමේදී තරුණිය ඉන් ඇද වැටී තිබෙනවා.
එලෙස ඇද වැටීමත් සමග ඇගේ වම් පාදයේ විලුබ මතින් දුම්රිය ගමන් කර ඇත.
ඒ හේතුවෙන් බරපතළ තුවාල සිදුව ඇතැයි පොලීසිය පැවසීය.
කෙසේ වෙතත්, අනතුරට ලක්වූ තරුණියව කඩිනමින් ප්‍රතිකාර සඳහා දියතලාව මුලික රෝහලට ඇතුළත් කර ඇත.
හපුතලේ පොලීසිය වැඩිදුර විමර්ශන සිදුකරයි.
