නව වසරේ ග්‍රාමීය ආර්ථිකය නැංවීමට ස්වයං රැකියා අවස්ථා 200000.

ග්‍රාමීය ආර්ථිකය ගොඩනැගීමේ වැඩ සටහන යටතේ සමෘද්ධිලාභීන් ජිවනෝපාය මාර්ග වෙත යොමු කිරීමේ ක්‍රියාවලියේ නායකත්වය සමෘද්ධි කළමණාකරුවන්ට සහ සමෘද්ධි සංවර්ධන නිලධාරීන්ට හිමිවන බව ආර්ථික පුනර්ජීවන හා දරිද්‍රතාවය තුරන් කිරීම සදහා වන ජනාධිපති කාර්ය සාධන බලකායේ සභාපති බැසිල් රාජපක්ෂ මහතා පවසයි.

බැසිල් රාජපක්ෂ මහතා අරලියගහ මන්දිරයේදී සමෘද්ධි කළමණාකරුවන් සමග පැවැති සාකච්ජාවකදී මේ වන සදහන් කළේය.

ග්‍රාම නිලධාරී වසම් මට්ටමින් කාන්තා ව්‍යාවසායකයින් තෝරා ගෙන ව්‍යාපාර පවත්වාගෙන යාමේ පුහුණුව සහ පහසුකම් සලසාදී ග්‍රාමීය කාන්තාව බලගැන්වීමටත්,තරුණ විරැකියා ගැටලුවට විසදුම් ලබා දීමටත්,මෙවර අයවැයෙන් වැඩි අවධානයක් යොමුකර ඇත.කෘෂිකර්ම ,සත්ව පාලන ,ධීවර ,පුනර්ජනනීය බලශක්ති උත්පාදනය ,ගෘහ ආශ්‍රිත කර්මාන්ත ,ආදී ස්වයං රැකියාමය අවස්ථා 200000 සදහා මෙලෙස පහසුකම් සැලසීම සදහා රජය අපේක්ෂා කරයි. මෙම වැඩ පිළිවෙල හරහා බිහිවන ග්‍රාමීය නිපැයුම් සදහා අවශ්‍ය වෙළෙදපොල නිර්මාණය කිරිම කෙරෙහිද අයවැයෙන් අවධානය යොමු තිබෙන අතර ඒ වෙනුවනේ නව වෙළෙද සැල් 25000 ක් ඇරබිමටද නියමිතයි.

මේ නිසා දිවයිනට ආවරණය වන ශක්තිමත්ම දෙපාර්තුමේන්තුව වන සමෘද්ධි සංවර්ධන දෙපාර්තුමේන්තුවට 2021 අයවැය ග්‍රාමීය මට්ටමින් ක්‍රියාත්මක කිරිමේදී විශේෂ වගකීමක් පැවරෙන බව බැසිල් රාජපක්ෂ මහතා පැවසුවේය.

සමෘද්ධිලාභීන් සහ ඔවුන්ගේ පවුල් ගොඩනැංවීම වෙනුවෙන් සමෘද්ධි සංවර්ධන දෙපාර්තුමේන්තුවට මසකට බිලියනයක් වැය වෙයි. විරැකියාවෙන් පෙළෙන සමෘද්ධිලාභීන් ජීවනෝපය සංවර්ධන කටයුතු වලට යොමුකර ශක්තිමත් ආර්ථිකයක් ඇති පිරිසක් ලෙස බලගැන්වීම සදහා ප්‍රාදේශීය සම්බන්ධීකරණ කමිටු සමග එක්වෙමින් කටයුතු කරනලෙසද සමෘද්ධි කළමණාකරුවන්ට උපදෙස් දුන්නේය.