නීතිවිරෝධීව එකළස් කරන ලද සුඛෝපභෝගී වාහන 20ක් පොලිස් භාරයට - සැකකරුවන් තිදෙනෙකු අත්අඩංගුවට

පොලීසිය විසින් නීත්‍යනුකූල නොවන ලෙස එකළස් කරන ලද නවීනතම සුඛෝපභෝගී රථ ඇතුළු රථ වාහන 20ක් සමගින් සැකකරුවන් තිදෙනෙකු අත්අඩංගුවට ගෙන තිබේ.

මෙලෙස නීත්‍යනුකූල නොවන අයුරින් එකළස් කරන ලද රථ වාහන සංවිධානාත්මක අපරාධ සදහා යොදා ගෙන ඇති බවට හෙළිවී ඇත .

තවද අදාළ රථ වාහන නීත්‍යනුකූල නොවන ලෙස එකලස් කිරීමට පොලිසියේ සහ ත්‍රිවිධ හමුදා සාමාජිකයින්ගේ සහයෝගය ලැබී ඇති බවටත් කරුණු අනාවරණය වී තිබේ.

මෙලෙස අත්අඩංගුවට ගෙන ඇත්තේ කඩවත, ගම්පහ සහ ජාඇල ප්‍රදේශවල පදිංචිකරුවන් තිදෙනෙකි. සැකකරුවන්ගෙන් ලද තොරතුරුවලට අනුව කඩවත, මීගහවත්ත සහ මොනරාගල ප්‍රදේශවල තිබී මෙම රථවාහන සොයා ගෙන ඇති අතර මෙවැනි නීත්‍යනුකූල නොවන රථ වාහන 40කට ආසන්න සංඛාවක් පිළිබඳව ද තොරතුරු අනාවරණය වී තිබේ.

පොලිස් භාරයට ගත් මෙම වාහන අතර සුඛෝපභෝගී මෝටර් රථ, ජීප් රථ, වෑන්, ලොරි සහ යතුරුපැදි ද වන සදහන්ය.

බස්නාහිර උතුර අපරාධ කොට්ඨාශය මහජනතාවගෙන් ඉල්ලා සිටින්නේ තමන්ගේ රථ වාහනය සොරකම් කර හෝ අස්ථානගත වී ඇත්නම් 0112947780 යන අංකයට දැනුම්වත් කරන ලෙසයි .

තවද අත්අඩංගුවට ගත් සැකකරුවන් තිදෙනා අදාළ බල ප්‍රදේශවල අධිකරණ වෙත ඉදිරිපත් කිරීමට නියමිතය.