තවත් ඇත් රජෙකුට අසාධ්‍යයි - උදරය දැඩි ලෙස ඉදිමී දරුණු වේදනාවෙන් - වනජීවී නිලධාරීන් පැමිණෙයි

අම්පාර, සමන්තුරේ ප්‍රදේශයේදී ඇද වැටුණු වන අලියෙකුගේ ජීවිතය බේරා ගැනීම සඳහා වනජීවී බලධාරීන් සහ තවත් ආයතන කිහිපයක් එක්ව හදිසි ප්‍රතිකාර ලබා දෙමින් සිටී.

වයස අවුරුදු 25ත් 30ත් අතර පසුවන මෙම පිරිමි සතාගේ උදරය දැඩි ලෙස ඉදිමී තිබූ නමුත්, බාහිර තුවාල කිසිවක් දක්නට නොලැබුණි.

මෙම සතා යම් විෂ සහිත ද්‍රව්‍යයක් ආහාරයට ගෙන තිබීම හෝ පොලිතීන් වැනි ද්‍රව්‍ය ගිල දැමීම හේතුවෙන් එහි ආහාර ජීර්ණ පද්ධතියේ අවහිරතාවක් ඇති වී තිබිය හැකි බව නිලධාරීහු සැක කරති.

දරුණු භූමිකම්පා දෙකක් - සුනාමි අනතුරු ඇඟවීමේ නිවේදන නිකුත් වෙයි - දකුණු පැසිෆික් සාගරය කැලඹෙයි

පශු වෛද්‍ය කණ්ඩායම් සහ වනජීවී නිලධාරීන් විසින් ප්‍රතිජීවක ඖෂධ ලබා දීම ඇතුළු ප්‍රතිකාර කටයුතු ආරම්භ කර ඇත.

කෙසේ වෙතත්, අධික වර්ෂාව හේතුවෙන් ඇති වූ ගංවතුර තත්ත්වය නිසා සතා සිටින ස්ථානයට ළඟා වීම අපහසු වී තිබේ. ප්‍රතිකාර කටයුතු ආරක්ෂිතව ඉදිරියට ගෙන යාම සඳහා, ජලයෙන් යට වූ බිම් ප්‍රදේශය වැලි යොදා ගොඩ කර ස්ථාවර කිරීමට මේ වන විට කටයුතු යොදා ඇත.

මෙම ගලවා ගැනීමේ මෙහෙයුම සඳහා ශ්‍රී ලංකා යුද්ධ හමුදාවේ සාමාජිකයින් දස දෙනෙකු එක් වී සිටින අතර, පොලිසිය ද ඊට අමතර සහාය ලබා දෙයි. එමෙන්ම, අලියා නිරීක්ෂණය කිරීමට සහ ප්‍රතිකාර කටයුතු අධීක්ෂණය කිරීමට වනජීවී නිලධාරීන් ද අඛණ්ඩව එම ස්ථානයේ රැඳී සිටිති.