බද්දේගම උපසභාපතිට මැර ප්‍රහාරයක් - පොලිස් කණ්ඩායම් දෙකකින් විමර්ශන

බද්දේගම ප්‍රාදේශීය සභාවේ උපසභාපති සමන් සී. ලියනගේ මහතාට එල්ල වූ මැර ප්‍රහාරය සම්බන්ධයෙන් මේ වන විට පොලිස් කණ්ඩායම් දෙකක් යොදා විමර්ශන ආරම්භ කර ඇති බව පෝද්දල පොලිසිය පවසයි.

මෙම ප්‍රහාරය ඉකුත් 24 වැනිදා රාත්‍රියේදී ගාල්ල ගොඩකන්ද ප්‍රදේශයේදී සිදුවූ අතර, උපසභාපතිවරයා තම බිරිඳ සමඟ යතුරුපැදියකින් නිවස බලා යෑමේදී සැකකරුවා මාර්ගය හරහා පහර දීමක් සිදු කර ඇති බව පොලිස් ප්‍රකාශකයෙකු තහවුරු කළේය.

බද්දේගම උපසභාපතිට මැර ප්‍රහාරයක්

ප්‍රහාරයට පෙර, උපසභාපතිවරයා තම බිරිඳ සමඟ ගාල්ල කරාපිටිය ප්‍රදේශයේ මල් ශාලාවකදී මියගිය හිතවතෙකුගේ දේහයට අවසන් ගෞරව දැක්වීම සඳහා පැමිණි අවස්ථාවේදීම සැකකරුවා විසින් ඔහුගේ ඇඟේ හැපිලා මුහුණට සහ පපුවට පහර දීමක් සිදු කර ඇත.

මෙයට පසුව නිවස බලා යෑමේදී ගොඩකන්ද ප්‍රදේශයේදී දෙවැනි වරටත් මාර්ගය හරහා පහර දීමක් සිදුවීමෙන් උපසභාපතිවරයා බරපතළ තුවාල ලබා ගාල්ල ජාතික රෝහලට ඇතුළත් කර ඇත.

වැලිගම සභාපති ඝාතනයේ සැකකරු පුද්ගලයෙක් කොළඹ කොටුවේ - පොලිසිය කොළඹම පීරයි

සැකකරුවා ලෙස හඳුන්වන්නේ පසුගිය පළාත් පාලන මැතිවරණයේදී සමගි ජන බලවේගයෙන් බද්දේගම ප්‍රාදේශීය සභාවට තරග කර පරාජයට පත්වූ අපේක්ෂකයෙකු බව උපසභාපතිවරයාගේ පැමිණිලියකින් හඳුනාගෙන ඇත.

ඔහුට එරෙහිව මරණීය තර්ජන ඇතුළු චෝදනා එල්ල වී ඇති අතර, සැකකරුවාගේ නිවසට පොලිස් කණ්ඩායම් පැමිණි විට ඔහු ප්‍රදේශයෙන් පලාගොස් ඇති බව පොලිසිය සඳහන් කරයි.

වැලිගම සභාපති ඝාතනයට සැකපිට තවත් අයෙක් අත්අඩංගුවට

පෝද්දල පොලිසිය විසින් සැකකරුවා සොයාගැනීම සඳහා කණ්ඩායම් දෙකක් යොදා විමර්ශන තීව්‍ර කර ඇති අතර, CCTV දර්ශන සහ සාක්ෂි රැස්කිරීමේ ක්‍රියාමාර්ග ගනිමින් සිටී. 

උපසභාපතිවරයාගේ ආරක්ෂාව සඳහා වැඩි පියවර ගැනීමට ද පොලිසිය සූදානම් ව ඇති බව පොලිස් ප්‍රකාශකයා පැවසීය.