ඉන්ධන ගැටලුවෙන් සෞඛ්‍ය සේවාව අනතුරේ

ශ්‍රී ලංකා රජයේ වෛද්‍ය නිලධාරීන්ගේ සංගමය  රජයෙන් ඉල්ලා සිටින්නේ, වෛද්‍යවරුන් මුහුණ දෙන ඉන්ධන හා ප්‍රවාහන ගැටළු කඩිනමින් විසඳා ගන්නා ලෙසයි. වත්මන් ඉන්ධන කෝටා ක්‍රමය රටේ සෞඛ්‍ය සේවාවන්හි ක්‍රියාකාරිත්වයට බාධාවක් විය හැකි බවට සංගමය අනතුරු ඇඟවී තිබේ.

අද (15) නිකුත් කළ නිවේදනයක ශ්‍රී ලංකා රජයේ වෛද්‍ය නිලධාරීන්ගේ සංගමය පෙන්වා දී ඇත්තේ, රජයේ රෝහල් පද්ධතිය වසර පුරා අඛණ්ඩව ක්‍රියාත්මක වන අතර, වෛද්‍ය සේවා සැපයීම සඳහා වෛද්‍යවරුන් හා සෞඛ්‍ය සේවා කාර්ය මණ්ඩලය රට පුරා නිතර සංචාරය කිරීමට අනිවාර්ය බවයි.

වෛද්‍යවරුන් දැනට සාමාන්‍ය රාජකාරි, ඇමතුම් සේවා හා හදිසි ඇමතුම් සඳහා තමන්ගේම ප්‍රවාහන පහසුකම් සකසා ගන්නා බවත්, අනෙකුත් රාජ්‍ය අංශවල තනතුරු මෙන් නොව ඔවුන්ට නිල වාහන හෝ ඉන්ධන දීමනා ලබා නොදෙන බවත් සංගමය සඳහන් කර ඇත.

මෑතකදී ක්‍රියාත්මක කළ QR මත පදනම් වූ ඉන්ධන බෙදාහැරීමේ ක්‍රමය යටතේ වෙන් කර ඇති ඉන්ධන කෝටාව, දිගු දුර ගමන් කරන වෛද්‍යවරුන්ට – විශේෂයෙන් විශේෂඥයින් හා වෛද්‍ය පරිපාලකයින්ට – ප්‍රමාණවත් නොවන බව ශ්‍රී ලංකා රජයේ වෛද්‍ය නිලධාරීන්ගේ සංගමය පවසයි.

QR පද්ධතිය සම්පූර්යෙන්ම ක්‍රියාත්මකයි – ගැටලුවක් ඇත්නම් අමතන්න, පිළිපැදිය යුතු කොන්දේසි මෙන්න

විශේෂයෙන් නිවෙස්වලින් බැහැරව ස්ථානගත කර ඇති වෛද්‍යවරුන් මේ ගැටලුවෙන් බරපතල ලෙස බලපෑමට ලක්ව ඇත.

ගැටලුව විසඳා නොගතහොත් සමහර වෛද්‍යවරුන්ට තම රාජකාරි ඉටු කිරීම සඳහා රෝහල් වෙත ළඟා වීම පවා අපහසු විය හැකි බව සංගමය අනතුරු ඇඟවී තිබේ.

එබැවින්, සෞඛ්‍ය සේවකයින් මුහුණ දෙන ප්‍රායෝගික අභියෝග කඩිනමින් හඳුනාගෙන, අඛණ්ඩ සෞඛ්‍ය සේවාවන් සහතික කිරීම සඳහා වෛද්‍යවරුන්ට හා අනෙකුත් සෞඛ්‍ය අංශ කාර්ය මණ්ඩලයට වෙන් කර ඇති ඉන්ධන කෝටාව සංශෝධනය කරන ලෙස ශ්‍රී ලංකා රජයේ වෛද්‍ය නිලධාරීන්ගේ සංගමය රජයෙන් ඉල්ලා සිටී.

මහජනතාවගේ සෞඛ්‍ය සේවා අයිතිය ආරක්ෂා කිරීම සඳහා සෞඛ්‍ය සේවකයින් මුහුණ දෙන ඉන්ධන ගැටලුව ජාතික ප්‍රමුඛතාවයක් ලෙස සලකා මැදිහත් වන ලෙසද සංගමය ජනාධිපතිවරයාගෙන් ඉල්ලා සිටී.

අලුත් අවුරුදු සුබ වේලාවන්ට නිසි කාලසටහනක් නෑ – අජිත් පී. පෙරේරා