මෙරට පැතිරෙන තවත් දරුණු රෝගයක් ගැන අනතුරු ඇඟවීමක්...

දොස්තරලාගේ අවධානයෙන් මැලේරියා රෝගය ගිලිහී ගිහින් මැලේරියාව පවතින රටවල සිට මෙරටට පැමිණෙන පුද්ගලයන්ගේ ලේ සාම්පල පරීක්‍ෂා කිරීම ගෙවුණු වසරේ සිට සිදු නොවීමෙන් මෙරට මැලේරියාව පැතිරයාමේ අවදානමක්හට ගෙන ඇති බව ජාතික මැලේරියා මර්දන ව්‍යාපාරය පවසයි.

එම ව්‍යාපාරයේ අධ්‍යක්‍ෂ වෛද්‍ය ප්‍රසාද් රණවීර පැවැසුවේ වෛද්‍යවරුන්ගේ අවධානයෙන් මැලේරියා රෝගය ගිලිහී යාම ද රෝගය පැතිරයාමට බලපා තිබෙන බවයි.

මෙම වසරේ ගෙවුණු මාස 09 ට මැලේරියා රෝගීන් 15ක් සොයා ගත් බවත් ගෙවුණු වසරේ (2020) සොයා ගත් රෝගීන් 30 දෙනකුගෙන් 10 දෙනකු නිරෝධායන මධ්‍යස්ථානවලින් හඳුනා ගත් බවත් ඔහු පැවැසීය.

මැලේරියාව පවතින රටවල සිට පැමිණෙන පුද්ගලයන් රුධිර පටල පරීක්‍ෂාවකින් තොරව සමාජ ගත කිරීමෙන් රෝගය පැතිරයාමට ඇති අවස්ථාව ඉහළ ගොස් ඇති බව ද කියයි.

මැලේරියාව පවතින රටවල සිට පැමිණෙන පුද්ගලයන් උණ රෝග ලක්‍ෂණ ඇතිවුවහොත් රජයේ රෝහලකින් ප්‍රතිකාර ගත යුතු බවත් තමන් රැඳී සිටි රට පිළිබඳව වෛද්‍යවරයා දැනුවත් කළයුතු බවටත් ඉල්ලීමක් කළ අධ්‍යක්‍ෂවරයා උණ රෝග ලක්‍ෂණ ඇතිව ප්‍රතිකාර ලබාගැනීමට පැමිණෙන රෝගීන්ගේ රුධිර පටල පරීක්‍ෂාවට උපදෙස් ලබා දෙන්නැයි ද වෛද්‍යවරුන්ගෙන් ඉල්ලීමක් කරයි.