බසයෙන් වැටී කොන්දොස්තර අවසන් ගමන් යයි..මගියෙකුත් එළියට

කොන්දොස්තරවරයෙක් ධාවනය වෙමින් තිබූ බස් රථයකින් ඇද වැටී මියගොස් තිබෙනවා.තලංගම පොලිසිය පවසන්නේ,  ධාවනය වෙමින් තිබූ ලංගම බස් රථයක පාපූරුවෙන් අද (18) අලුයම ඇද වැටුණු පුද්ගලයන් දෙදෙනෙකුගෙන් අයෙක් වන කොන්දොස්තරවරයා මෙසේ මිය ගිය බවයි.

අනතුරින් මියගොස් ඇත්තේ බදුල්ල ප්‍රදේශයේ පදිංචි පුද්ගලයෙක්. පානදුර ඩිපෝවට අයත් බස් රථය පානදුර සිට මහනුවර දක්වා කඩුවෙල - කොල්ලුපිටිය මාර්ගයේ ධාවනය කර තිබෙනවා.

පොලිසිය පැවසුවේ, කොස්වත්ත මංසන්ධිය ආසන්නයේදී බස් රථයේ පිටුපස පාපූරුවේ සිටි කොන්දොස්තරවරයා සහ මගියෙකු ඉවතට විසි වී මෙම අනතුර සිදුවී ඇති බවයි.

අනතුරින් බරපතල තුවාල ලද ඔවුන් දෙදෙනා ප්‍රතිකාර සඳහා කොළඹ ජාතික රෝහල වෙත ඇතුළත් කර සිටියදී කොන්දොස්තරවරයා මියගිය බව රෝහල ආරංචි මාර්ග පැවසුවා.