කෘත්‍රිම බුද්ධිය සහ Deepfake තාක්ෂණය යොදාගනිමින් සිදුකරන මූල්‍ය වංචා පිළිබඳව ජාත්‍යන්තර පොලිසියෙන් හදිසි අනතුරු අඟවීමක්

කෘත්‍රිම බුද්ධිය (AI) තාක්ෂණය වේගයෙන් දියුණු වෙමින් පවතින අතර, එය අනිසි ලෙස භාවිත කිරීම මගින් මහජනතාව රවටා මුදල් වංචා කිරීමට සහ සංවේදී පෞද්ගලික තොරතුරු සොරකම් කිරීමට අපරාධකරුවන්ට නව අවස්ථා උදා වී තිබේ.

AI තාක්ෂණය යොදාගනිමින් සිදුකරන නවීන වංචාවන්ගෙන් එල්ල වන වර්ධනය වන තර්ජනය පිළිබඳව ජාත්‍යන්තර පොලිසිය (INTERPOL) අනතුරු අඟවා ඇත. සමාජ මාධ්‍ය ඔස්සේ ලබාගන්නා ඡායාරූපයක් හෝ කෙටි හඬ පටයක් භාවිත කරමින්, සැබෑ පුද්ගලයන්ගේ රුවට හා හඬට සමාන ව්‍යාජ වීඩියෝ සහ හඬ පටිගත කිරීම් නිර්මාණය කිරීමට වංචාකරුවන්ට හැකියාව පවතී.

මෙලෙස කෘත්‍රිම බුද්ධියෙන් නිර්මාණය කරන ගැඹුරු ව්‍යාජ (Deepfake) දර්ශන සහ හඬ පට මගින් පවුලේ සාමාජිකයන්, මිතුරන් හෝ වෙනත් විශ්වාසවන්ත පුද්ගලයන් ලෙස පෙනී සිටිමින් ජනතාව රැවටීමට ඔවුන්ට හැකි වේ.

මෙවැනි ව්‍යාජ අනන්‍යතා භාවිත කරමින් වින්දිතයන්ගෙන් මුදල් ලබාගැනීම, රහස්‍ය තොරතුරු හෙළි කරවා ගැනීම සහ මූල්‍යමය අලාභ සිදුවිය හැකි ක්‍රියාමාර්ග ගැනීමට ඔවුන් පොළඹවා ගැනීම සිදුකළ හැකිය.

වංචාවක් බව හඳුනාගැනීමට අවධානය යොමු කළ යුතු ලක්ෂණ ඥාතීන්, මිතුරන් හෝ වෙනත් විශ්වාසවන්ත පුද්ගලයන් ලෙස පෙනී සිටිමින් හදිසියේ මුදල්, බැංකු ගිණුම් තොරතුරු හෝ වෙනත් පෞද්ගලික තොරතුරු ඉල්ලා ලැබෙන අනපේක්ෂිත දුරකථන ඇමතුම්, කෙටි පණිවිඩ සහ වීඩියෝ ඇමතුම් පිළිබඳව විශේෂ අවධානයෙන් පසුවන ලෙස ජනතාවට උපදෙස් දෙනු ලැබේ.

එවැනි ඉල්ලීමක් ලැබුණු විට, එය සැබෑ පුද්ගලයකුගෙන් ලැබුණු එකක් බව තහවුරු කරගැනීමකින් තොරව මුදල් හෝ රහස්‍ය තොරතුරු ලබාදීමෙන් වළකින ලෙස ද අවධාරණය කෙරේ.

හෙට හදිසි ජල කප්පාදුවක් - පැය 8ක් වතුර නැති වන ප්‍රදේශ මෙන්න

ඥානසාර හිමි නිදහස් කරන්නැයි ඉල්ලා කෙරෙන සත්‍යග්‍රහය අද 7 වන දිනටත්