රන්බීර් කපූර්ගේ ලක්ෂ 35ක ඔරලෝසුවේ සැඟවුණු සික් උරුමයේ කතාවක් හෙළිවෙයි

බොලිවුඩ් නළු රන්බීර් කපූර්ගේ නවතම විලාසිතාවක් මේ දිනවල බොහෝ දෙනාගේ අවධානයට ලක්ව තිබේ. ඒ, ඔහු Ramayana චිත්‍රපටයේ ප්‍රචාරක උත්සවයකට සහභාගී වූ අවස්ථාවේ පැළඳ සිටි ඉන්දියානු රුපියල් ලක්ෂ 35.88ක් (රුපියල් 3,588,000ක්) වටිනා සුඛෝපභෝගී ඔරලෝසුවයි.

එහි විශේෂත්වය වන්නේ මිල අධික බව පමණක් නොව, සික් ආගමික උරුමය සහ ඉතිහාසය නිරූපණය වන ආකාරයෙන් නිර්මාණය කර තිබීමයි.

හයිද්‍රාබාද්හි පැවති Ramayana චිත්‍රපටයේ පූර්ව ප්‍රචාරක උත්සවයට රන්බීර් සහභාගී වූයේ තද නිල් පැහැති ඇඳුමකින් සැරසීගෙනය. එම පෙනුමට විශේෂත්වයක් එක් කළේ ඔහුගේ අතෙහි පැළඳ සිටි නිල් පැහැති ඔරලෝසුවයි.

එය ප්‍රසිද්ධ සුඛෝපභෝගී ඔරලෝසු නිෂ්පාදන සන්නාමයක් වන Jacob & Co. විසින් නිර්මාණය කළ Epic X Sher-E-Punjab Edition ඔරලෝසුවකි. මෙහි නිෂ්පාදන 50ක් පමණක් ලොව පුරා නිකුත් කර ඇති බැවින් එය දුර්ලභ එකතුවක් ලෙස සැලකේ.

‘රාමායණ’ චිත්‍රපටය පළමු දිනයේම කෝටි ගණනක් උපයයි

සික් ආගමික උරුමය නිරූපණය කරන සුවිශේෂී නිර්මාණයක්

මෙම ඔරලෝසුවේ විශේෂත්වයක් වන්නේ සික් ආගමික උරුමය හා ඉතිහාසය නිරූපණය කරන සංකේත ඇතුළත් කර තිබීමයි.

ඔරලෝසුවේ සිරස් පාලම් කොටස්වල සිංහ සංකේතය, ඛණ්ඩා සංකේතය (Khanda) සහ එක් ඕන්කාර් සංකේතය (Ek Onkar) ඇතුළත් කර ඇත.

මෙම සංකේත මඟින් ශක්තිය, එකමුතුකම සහ විශ්වාසය නිරූපණය වන අතර, ඔරලෝසුව සික් ආගමේ දසවැනි ගුරුවරයා වන ගුරු ගෝබින්ද් සිං සහ ඛල්සා සම්ප්‍රදායේ ආරම්භය සිහිපත් කිරීම වෙනුවෙන් නිර්මාණය කර තිබේ.

“ඇය නම් සුපිරිම කෙනෙක්” - ප්‍රියංකා ගැන මේගන් තී ස්ටැලියන් කියූ කතාව

ඔරලෝසුවේ තාක්ෂණික විශේෂතා මොනවාද?

මෙම ඔරලෝසුව ටයිටේනියම් ලෝහයෙන් නිපදවා ඇති අතර, එහි ආවරණයේ විෂ්කම්භය මිලිමීටර් 44කි. විවෘත සැලසුමකින් යුත් ඔරලෝසු මුහුණත හරහා ඇතුළත යාන්ත්‍රික කොටස් ද දැකගත හැකිය.

එහි කැපී පෙනෙන නිල් පැහැති රබර් පටියට පැණි වද හැඩැති මතුපිටක් ලබා දී තිබීම තවත් විශේෂත්වයකි.

එමඟින් ඔරලෝසුවට ක්‍රීඩාශීලී පෙනුමක් එක් වේ. ඔරලෝසුව ක්‍රියාත්මක වන්නේ අතින් වයින්ඩ් කළ යුතු JCAM02 යාන්ත්‍රණය මඟිනි.

Concepto සමාගම විසින් Jacob & Co. වෙනුවෙන් නිපදවා ඇති මෙම යාන්ත්‍රණයට කොටස් 158ක් ඇතුළත් වන අතර, එක් වරක් සම්පූර්ණයෙන් වයින්ඩ් කළ පසු පැය 48ක් දක්වා ක්‍රියාත්මක විය හැකිය.

එමෙන්ම එහි මැණික් ගල් 21ක් යොදා ඇති අතර, පැයට කම්පන 28,800ක වේගයකින් ක්‍රියා කරයි.

නිල් මැණික්වලින් නිපදවන සෆයර් වීදුරුවක් සහ මීටර් 100ක් දක්වා ජලයට ඔරොත්තු දීමේ හැකියාව ද මෙහි ඇතුළත්ය.

ටයිටේනියම් භාවිතය නිසා එහි බර ද සාපේක්ෂව අඩු මට්ටමක පවතී. මෙම ස්විස් නිෂ්පාදනය සඳහා වසර දෙකක වගකීමක් ද ලබා දී ඇත.

රන්බීර්ගේ Ramayana චිත්‍රපටය ළඟදීම තිරයට

මේ අතර, නිතිෂ් තිවාරි අධ්‍යක්ෂණය කරන Ramayana චිත්‍රපටයේ පළමු කොටස නොවැම්බර් 5 වැනිදා සිනමාහල්වල ප්‍රදර්ශනය කිරීමට නියමිත බව මාධ්‍ය  වාර්තාවේ සඳහන් වේ. කොටස් දෙකකින් සමන්විත මෙම චිත්‍රපටයේ දෙවැනි කොටස ලබන වසරේ නිකුත් කිරීමට නියමිතය.

දීපිකා සහ රන්වීර්ගේ දෙවන දියණියගේ නම හෙළිවෙයි - දසෙහ්රා දවසේ පළමු පවුලේ ඡායාරූපයත් එළියට